جە ١٥٠ەمین کۆبیەیۊ ئانارشیستەکانە تا لۆزان
جە یاڎو ١٥٠ەمین ساڵیاڎو ئینتەرناسیۆناڵ دژە-دەسەڵاڎدار کە ساڵەو ١٨٧٢ لۋاڕاۋە، جە ۋڵاتە جیاجیاکاوە ٥ هەزار کەسۍ جە ١٩-٢٣ۍ تەمووزی جە کەشەکا ژورای سویسرای کۆبیېۋە.
ئامانج جە کۊبیەیۊکەی کە چنەشەنە زیاتەر جە ٣٠٠ چالاکیۍ لۋۍ ڕاۋە بریتیا چانەی کە ئانارشیستەکۍ پۍ هەرمانەی پېۋەرەیی کۆباوە و تەجروبەکا ۋېشا هامبەشی پنەکەرا و یۊگېرتەیی ئینترناسیۆناڵەکا زیاتەر کەرا.
گەنجۍ ئینتەرناسیۆناڵیستۍ جە گۆڤارو لێگەڕینە، تۆڕەو پەشتیوانی جە سەرهۊردای فەرەنسای، جەدەکە-سە و ئەکادیمیای مۆدێرنیتەی دیموکراتیکی پەی خوڵقناو بەرنامېۋە و دوورنمای هامبەشی بەشڎاریشا چا کۆبیەیۊینە کەرڎەبۍ.
جە نمایشگاو کتێبو کۆبیۊکەینە سەکوېۋە تایبەت بە کتێبەکا جمیەری ئازاڎیی کورڎسانی و پارادیگمای مۆدێرنیتەی دیموکراتیکی ڕابەرو گەلوو کورڎی عەبدوڵا ئۆجالانی نریابېرە.
گەنجۍ ئینتەرناسیۆنالیستۍ ئاپۆییچ مژار و پەرسەگەرمەکۍ ۋېشاشا جە چالکییەکا و نمایشگاگەنە وستۍ ۋەرو باسی و گفتوگۆی.
جە بارەو کۊشیای تاریخی پەی گلېرگەی دیموکراتیکی، ئیکۆلۆژیکی و ئازاڎیی ژەنۍ کە ئارۊ جە کورڎسانەنە ملۊڕاۋە، چنی ئانارشیستەکا جە مەنتیقە جیاجیاکا جەهانی گفتوگۆ کریا.
مژاری ئەساسی کۊبیەیۊ و گفتوگۆکا ئا پەنج ڕۋەیە بریتی بۍ چانەی گەنجۍ ئینتەرناسیۆناڵیستۍ بە چ بەرنامېۋە متاۋا کۆباوە و سەرو ئاستو جەهانی کۊشیای کەرا.
بە نوێنەرایەتی گەنجا ئینتەرناسیۆناڵی نزیکەو ١٠٠ گەنجا جە نەتەوە جیاجیاکا بەشڎاریشا جە ڕاپیمای گۊرەی بۆنەو سەڎەم ساڵیاڎو پەیمانو لۆزانی کەرڎ. گەنجۍ پەشتەو لافیتەو 'دیفێند کورڎسان- کورڎسانی پارېزنە' ڕاپیمایشا کەرڎ.
هـ . ش
