بەپاو گوزارشتێوە رۆنامەو ئیعتمادی کە پەشتیش بە ئامارە ڕسمیەکا بەستەن، جە ٢١و ئاداری تا ٤و ئایاری واتە جە ماوەو ٤٥ ڕووانە لاو کەمیۆ ٢٣ ژەنۍ جە تەرەفوو هامسەر، تاتەی، برا، کوڕی و یاخوڎ داواکارا وەڵینیشاوە کوشیێنۍ.

بەپاو ئا ئامارۍ چا ماوەنە تارانەنە ٤، مەشهەد ٣، تەورێز ٢ و جە ورمێچەنە ٢ ژەنۍ کوشیێنۍ.

حەرپاسە جە حەر یۆ جە شارەکاو بوشەهر، تاڵش، جویبار، سمنان، ئابادان، ئەلشتەر، ئەهواز، بەردسکەن، خومەین، فەلاوەرجان، سنە و سەبزەواریچەنە ژەنێوە کوشیێنە.

کوشتەی چێروو نامۍ شەرەفی، نەگونجیای خێزانی، رەڎکەردەیۆ داواو هامسەرگیری و حەرپاسە ئانەی کە ژەنی نەلێنۍ چێروو باروو رازیبیەی بە هامسەرگیری دووەموو هامسەرەکەیشا، جە مەڵامەتە سەرەکیەکاو کوشتەو ئا ژەنانە.

تاهیرە تاڵەقانی-ە توێژەرەی ئیسلامیە سەبارەڎ بە مەڵامەتوو بەردەوامی کوشتەی ژەنا بە رۆنامەکەیش واتەن، نەبیەی یاسێوە کە بەتەمامەتی پارێزنای و پەشتیوانی جە ژەنا بکەرۆ، فاکتەری سەرەکیا جە زیاڎبیەی و بەردەوامی تاوانەو کوشتەی دژوو ژەنا.

هەر چا ماوەنە دووۍ پیێچ جە تەرەفوو هامسەرەکاشاوە رووبەڕوو تنووتیژی بیێنێوە و پا مەڵامەتۆ پیێوەیچ کوشیان و پیێوەیچ چەمش جە دەسدان.