پەرلەمانتاروو بازنەو مێردین و پارتوو دیموکراسی و یەکسانی گەلا (دەم پارتی) کامەران تارهان قسېش پەی ئاژانسوو هەواڵوو فوراتی (ANF)ی کەردۍ و ئانەش وست ڕووە کە گۆشەگیرکەردەی رابەروو گەلوو کوردی عەبدوڵا ئۆجالانی بیەن بە مەڵامەتوو بە بنبەس یاۋای چارەسەری پرسوو کوردی.

تانهان ئاماژەش پانەی کەرد کە جە کەسایەتی عەبدوڵا ئۆجالانینە ئیمراڵینە ٢٥ ساڵېن یاسا پوچە کریێنۆ و قەرارەکۍ پەیوەس پایی گرڎ بە مەیل و ویسوو حەقکەردەیۆ سیاسی جابەجێ مکریا و واتش، "ئا سیستمە دژوو کارەکتەری سەرەکی پرسوو کوردی و سیاسەتی واتە ئۆجالانیا، سیستمێوە گۆشەگیرییا کە جە روو ئابوری، سیاسی، کۆمەڵایەتی و یاساییوە کاریگەری نەرێنی سەروو گلېرگەی منیۆرە".

تانهان یاڎش ئاردۆ کە وەختۍ گۆشەگیری سەروو عەبدوڵا ئۆجالانی کەم کریاوە و پرۆسەو چارەسەری بەردەوام بۍ، ئارامی گێڵابێوە پەی تورکیای و دەسنیشانش کەرد کە بە مەڵامەتوو جەنگیوە جە تورکیا ئاژێوە چەقبەستەی ئابووری ئاما ئاراوە. تانهان باسش چانەی کەرد، "جە ساڵەو ٢٠١٣ ینە  سەمەر(داهات)ی نیشتمانی یاوابۍ بە بەرزتەرین ئاست، بەڵام بە تنکەردەیۆ گۆشەگیری و دەسپنەکەردەیۆ قۆناغەو جەنگی ئا سەمەرە فرە وەستەنەرە".

پەرلەمانتار تانهان ئەرەیاۋناش، کە رابەروو گەلوو کوردی عەبدوڵا ئۆجالان جە پرسوو چارەسەری پرسوو کوردی و دمایی ئاردەی بە جەنگینە کارەکتەرێوە سەرەکیا و دەسنیشانش کەرد کە سیاسەتوو گۆشەگیری سەروو ئۆجالانی قەیرانەی ئابووریەش قووڵتەرە کەردێنۆ. تانهان ئانەیچش وست ڕووە، کە حۊڵ مڎریۆ گۆشەگیری جە ئیمراڵینە فاڕیۆ پەی تەکنیکێوە ڕاوەبەردەی سیاسی و واتش: "گۆشەگیری پی جۆرە بەکۆمەڵایەتی کریان، مەڵامەتی سەرەکی وەشبیەو قەیرانەو ئابوری، یاسایی، دادوەری، پاشێلکەردەی مافەکا مرۆڤی و ۋەرتەسککەردەیۆ ئازاڎییا".

تانهان ئاماژەش بە چالاکی زینڎانیا پەی رەڎکەردەیۆ دیڎاری چنی بنەیانە و پارێزنەرا و بەکارناردەی مافوو پەیوەندی تەلەفونی و بایکۆتکەردەی دادگاکا کەرد و ئەرەیاۋناش، کە ئا چالاکیە جە تەرەفوو تەماموو گلێرگەیۆ پەسەنڎ کریان. تانهان واتش، "جە فرەو مەنتیقانە 'ئێشکگیریی دادپەروەری' ساز مکریۆ. ئینە پەنەوازیۍ کۆمەڵایەتیا. سیستموو گۆشەگیری کە بە تایبەتی سەروو ئیمراڵی جابەجێ مکریۆ، بە تەماموو گلێرگەیرە وەڵابیەنۆ. گۆشەگیری کاریگەریش سەروو تەماموو گلێرگەی نیانەرە. پەی ئانەی ستەم و پاشێلکارییەکۍ زینڎانەکانە دژوارتەرۍ نەبا، مشۆم گرڎوو سەرنجیما وزمۍ سەروو ئا چالاکیا. زینڎانەکانە مافەکاو مرۆڤی پاشێل مکریا. پەی ئانەی ئا پاشێلکاریۍ زیاڎۍ نەبا، مشۆم ئێمە گنمۍ دلۍ کۆشیایۍ کۆمەڵایەتی و چنی زینڎانیا بیمۍ. پەی چارەسەرکەردەی پرسوو کوردی، پەی چەسپنای یاسای مشۆم گردما خاوەنداری چا چالاکیا بکەرمۍ".