ئیجازەو جەنگی پۍ درێژکەرڎەیۊ ئەرۍ سەروازا تورکی جە لوبنان پۍ ساڵێوە حەفتەی ۋیەردە جە پەرلەمانوو تورکیای بە فرەینەو دەنگوو ئاکەپە، مەهەپە، ئیی پارتی و جەهەپەی پەسەنڎ کریا. فراکسیۆنوو هەدەپی و پەرلەمانتارا ئەمەپی بە نا دەنگشا دا و تیپ بەشڎاریش جە دەنگداکەینە نەکەرد. چەمەڕایچ کریۊ ئیجازەو جەنگوو عێراق- سوریایچ چی حەفتەنە وزیۊ ۋەروو دەم و پەرلەمانی، ئینەیچ پۍ درێژکەرڎەیۊ ماوەو مەنەیۊ سەروازان پۍ دووۍ ساڵا.

پەرلەمانتاروو بازنەو مێرسینی جە پارتوو یەکسانی و دیموکراسی گەلان (هەدەپ)ی عەلی بۆزان سەروو ئا مژاریە قسېش پۍ ئاژانسوو هەواڵی فورات (ANF)ی کەرڎ و ۋاتش، کە بە دەسوەردای گەرەکشانە دووۍ ساڵۍ تەر ئەرکوو جەنگی بە سەرۆککۆماری بڎا.

جە ساڵەو ٢٠١٦یۊ زیاتەر جە ٦٠٠ مەدەنیا جە عێراقەنە کوشیېنۍ

عەلی بۆزان ئەرەیاۋناش: "بەپاو گوزارشت و بەڵگەنامەکا جە ئۆپراسیۆنەکا تورکیاینە جە بەروو سنوورەکاوە، بە سەڎان کەسۍ مەڎەنیۍ کوشیېنۍ، پۍ نمونەی بە پاو گوزارشتېوە رۆیتەرزی جە ساڵەو ٢٠١٦یۊ  زیاتەر جە ٦٠٠ کەسا مەڎەنی بە مەڵامەتوو ئۆپراسیۆنەکا هێزە چەکڎارەکا تورکیایۊ کوشیېنۍ. ئیسەیچ ئی ئیجازەو جەنگیە پۍ ئانەینە کە پۍ دووۍ ساڵا تەری ڕا بە ئەنجامدای ئۆپراسیۆنی جە سوریانە بڎریۊ و ئێمە مزانمۍ مەڵامەتوو ئینەیچ دەسکۊتەکۍ کورڎینۍ جە ۋەرنیشت و ئیجازەکەیچ دژوو ئا دەسکۊتانە. تا ئیسە جە ۋەرنیشتۊ ۋەران ۋەر بە تورکیای حیچ هجومېوە ئەنجام نەدریان، ئاژەو ئاگەیچ دژوو ئەمنیەتوو تورکیای نییا".

وەڵۍ گرڎ چېۋېنە مشۊم دلۍ سنوورەکامانە قۊرتەو کورڎی چارەسەر کەرمۍ

عەلی بۆزان ئانەیچش وست ڕووە کە ئا ئیجازۍ جەنگی بە بەهانۍ 'ئاسایش و ئەمنی'ۊ ئاماڎۍ کریا، بەڵام مەبانۍ بە مەڵامەتوو چارەسەری. ئانەی پەی ئاسایش و ئەمنیەتی مشۊم کریۊ ئانەن کە دلۍ سنوورەکا تورکیاینە ئاشتی فەراهەم کریۊ. عەلی بۆزان ماچۊ، "پۍ مسۆگەرکەرڎەی ئەمنیەتوو تورکیای تەنیا ڕېوە هەنە؛ ئاڎیچ ڕاو ئاشتیانەی و دیموکراتیکین پەی پەرسوو کورڎی جە تورکیا و تەماموو ۋەرکەوتوو میامینی. مسۊم گۆشەگیری سەروو بەڕێز عەبدوڵا ئۆجالانی هۊرگیریۊ، کە ماوەو ٣٢ مانگان بە حیچ جۆرێوە هەواڵش مەزانیۊ. ۋەرپەرسا کۆماروو تورکیای عال پانەی مزانا کە ئەگەر گەرەکشابۊ جە وڵاتەکەنە قۊرتەو کورڎی بە ڕاچارەو دیموکراتیکی چارەسەر کریۊ، وەڵۍ گرڎ چېۋېنە مشۊم گۆشەگیری سەروو عەبدوڵا ئۆجالانی هۊرگیریۊ. مشۊم راسەوخۆ دیڎار چنی عەبدوڵا ئۆجالانی ئەنجام بڎریۊ. ".

سیاسەتە پێچەوانەکا ئاکەپەی

پەرلەمانتاروو ئیستەنبوڵ و ئەمەپی ئیسکەندەر بایهان کە دەنگش بە ئیجازەو پەیوەس بە لوبنانیوە نەڎا، ئەرەیاۋناش، ئا ئیجازە دەرەنجاموو سیاسەتوو پێچەوانەو ئاکەپەین سەروو ۋەرکەوتوو میامینی. پۍ ڕژېمێوە تاکەکەسین کە جە بەرۊ سیاسەتوو تەشەنەئەسای جەنگی و لدلېچەنە جە پەرسوو چارەسەری دیموکراتیکی پەرسوو کورڎینە سیاسەتی ستەمکارانە ڕاوەبەر کەرۊ و درێژکەرڎەیۊ ئا ئیجازەیچە بە ماناو دەنگدای و پەسەنڎ کەرڎەی و درێژەداین بە سیاسەتی غەڵەتی. ئا سیاسەتۍ خزمەتشا بە ئاشتی جە مەنتیقەکەنە و چارەسەرکەرڎەی پەرسوو کورڎی مەکەرا. بەپێچەوانۊ ئیمپریالیستەکا جە مەنتیقەکەنە بەقوەتتەر کەرۊ و بیەن بە بەشێوە جە دەسوەردای ئا هېزا".

پېسە هېزی ئارۊیچ ۋەران ۋەر بە ئیجازەو جەنگی مردمېوە

بایهان تەئکیدش کەرڎۊ حەرپېسە چنی بە نا دەنگشا بە ئیجازەو ئۆپراسیۆنی جە لوبنانەنە نەڎان، بەهەمان جۊر دژوو ئیجازەو درێژکەرڎەیۊ ئۆپراسیۆنەکا جە عێراق-سوریایچ مرداوە و ئەرەیاۋناش: "ئەردۆغان جە ڕاو ئیجازەو جەنگیۊ جە لایېوە گەلی هەژار کەرۊ جە لېوەتەریچۊ بە ڕاو سیاسەتوو جەنگی حۊڵ مڎۊ گەلی هۊرخەڵەتنۊ و گەلی ملکەچوو سیاسەتوو ئەرەگیری و کۆلۆنیالیستی کەرۊ.

جە دمادمایچەنە ئەرەیاۋناش، مشۊم گەلا چېردەسەی و چەوەسیای ئی وڵاتیە بە دڵنیاییوە ناگنانۍ ئی دامېوە و داوا جە واڵە و برایا رەنجدەر و کرێکاریم کەروو کە دژ پی سیاسەتا جەنگی مرڎاوە".