جە بەڵخە ئەۋەتەقای تەقەمەنی سەردەمو جەنگی دۊی کەسێش کەردۍ قوربانیۍ
جە هەوارەبەزە سەر بە تەۋەنۍ بەڵخە-ی، تەقەمەنی سەردەمو جەنگی تەقاۋە و بەهۆشەوە دۊۍ کەسۍ گیانیش ئەسپارا و کەسێچ زامدارۍ بی.
ۋێرەگاو ئارۊی جە بەرزایی هەوارەبەرزەی سەر بە تەۋەنۍ دەگاو بەڵخە-و هەورامانی، ئەۋەتەقای ئەۋامەنو سەردەمو جەنگی گیان ئەسپارای دۊۍ کەسا و زامداربییەی کەسێویش ونە کەوتەوە.
زانیان؛ یۆ جە قوربانییەکا نامێش (ئاسۆ کەیکاوس محەمەد) تەمەن ٣١ ساڵانەن و دەمودەس گیانش سپاران و هەرپاسە یۆ تەر جە زامدارەکا بەنامۍ (گەشتیار شەریف)ی جە دمای یاونایش بە نەوەشخانەو هەڵەبجەی گیانش سپاران. هاموەخت زامدارەکەی تەر بریان نەوەشخانە جەدمای تیماری و مەرەخەس کریان.
بەرزان عوسمان، قسەکەرو ڕاوەبەرایەتیی پۆلیسو هەڵەبجە-ی، سەبارەت بە ڤییەرەکەی زانیاریشدا و واتش: قوربانیەکۍ دەسکاری گولـله هاۋەنێۈ سەردەمو جەنگیشا کەردەن و تەقێنە پۆرەشارە.
واتیچش: تەرمۍ قوربانییەکا ڕەوانۍ پزیشکو دادی کریێنۍ و بنکەو پۆلیسو تەۋێڵۍ پەڕاو ونەکۆڵای و پەیجۆریش پەی ڤییەرەکەی کەردنەوە.
جە سەردەم جەنگو هەشت ساڵەو ئێراق/ ئێرانی و جەنگو براکوشی پارتە نەیارەکاو نشورو کوردستانیەنە، ڕووبەرێ فراوان جە خاکو هەرورامانی مین ڕێژ کریا و ئەۋامەنێۋی فرە جە تەقەمەنییەکا جە هەرێمەکەنە ئازیا جیا و بەهۆشاوە ساڵانە هەموڵاتیۍ هەرێمەکەی و گەشتیارۍ ناوچەکاو تەری کەرانۍ قوربانی.
