پەی شەرمەزارکەردەی قرکەریەکا پاریسی بە سەرمەشقایەتی تەژەکە-ئەی جە پاریس ڕاپیمایۍ ناوەندی ساز کریۆ. پۍ بەشداربیەی جە ڕاپیماکەینە جە دەیان شارا ئەوروپاینە کوردسانیا و دۊسەکېشا کۊتۍ ڕا.

پۍ بەشداربیەی جە ڕاپیماکەو پاریسی جە لەندەنۆ ژمارېوە فرە پاسۍ و ترۊمبېلۍ تایبەتۍ کۊتۍ ڕا. سەروو ترۊمبێلەکاوە لافیتەکۍ سەکینە جانسزۍ (سارا)، فیدان دۆغانۍ (رۆژبین)، لەیلا شایلەمەزۍ (رۆناهی)، ئەمینە کارایۍ (ئەڤین گۆیی)، میرپەروەر و عەبدولرەحمان کزلی هۊرواسیۍ بېنۍ.

ژەنا و گەنجا گۆرانیۍ شۆڕشگێڵنیېشا واتېوە. بەشداربیا ڕاپیماکەی پۆستەرەکا ڕابەروو گەلوو کوردی عەبدوڵا ئۆجالانیشا بەرزکەردېوە و بێ مردای دروشمەکا "گەشمەرڎۍ مەمرا"، "بژیۋۊ سەرۆک ئاپۆ" و "ژەنی، ژیۋای، ئازاڎیی"شا واتېوە.

واتەواچەو ئەنجومەنوو ژەنا و ژیۋای جە لەندەن دەنیز پۆیرازە ئەرەیاۋناش، کە ئەنجامدەروو کۊکوشیەکا دەوڵەتوو تورکین و واتش، "سەرەڕاو ئانەی کۊکوشیەکۍ بە گرڎوو لایەنەکاشۆ مزانیۆ، بەڵام دەوڵەتوو تورکی بە ئاشکرایی باس چانەی مەکەرۆ و حۊڵ مڎۆ ئا تاوانۍ پەردەپۆش کەرۆ. بەڵام ژەناو کوردی دەسبەردارۍ ئا دۆسیەیە مەبا و ۋنەپەرسایش ۋنەکەرا. کۊشیای ژەناو کوردی بە رۆحوو سارا و ئەڤینەکاوە گرڎ وەختۍ ئیلهامبەخشوو ئازاڎیی گەلان. ئێمە پا رۆح و زانایۆ بەشداری جە ڕاپیماکەو پاریسینە کەرمۍ".

حەرپاسە جە گرڎوو کانتۆنەکاو سویسرایۆ بە دەیان پاسۍ کۊتېنۍ ڕا. جەماوەرەکە کە جە باسێل کۊبیېنێوە بۍ مردای دروشمەکاو "ژەنۍ، ژیۋای، ئازاڎیی" ماچاوە.