لە ٢٤/٧/١٩٢٣، وەڵاتە سەرکەوتەکۍ جەنگوو یوەموو جیهانی چەنی تورکیای، پەیمانێوەشا ئیمزا کەرڎە، کە بە پەیمانەو لۊزانی نامۍ بریا، پەیمانەکۍ شاروو لۊزان-وو سویسراینە ئیمزا کریا، ڕێککەوتەیەکە پەی متەیرەی نەخشەی سیاسیی دەوڵەتوو عوسمانیی بۍ، پی پەیمانۍ بە پەراوێزکەرڎەی داوا و مافەکاو گەلوو کوردی، کورڎسان پەی سەروو چوار پارچا بەش کریا ملوو تورکیای، عێراقی، ئێرانی و سووریایرە.

جە سەڎ ساڵەو پەیماننامۍ لۊزانینە، کاروان سەعیڎ ئەنداموو کۊنگرەی نەتەوەیی کورڎسان(کەنەکە)ی، جە چەمپەنەکەوتێوە تایبەتنە سەبارەت بە چند پەرسێوە تایبەت بە پەیمانەکۍ، پەی ئاژانسوو هەواڵوو فوراتی (ANF)، دوا.

بەرژەوەندیی نەتەوەی و نشتیمانی سنووروو حزبایەتی ویەرنۊ

سەبارەت بە گرنگیی یەکڕیزیی نەتەوەیی گەلوو کوردی جە سەڎ ساڵەو لۊزانینە، کاروان سەعیڎ ئەنداموو کۊنگرەی نەتەوەیی کورڎسانی پەی ئاژانسوو هەواڵوو فوراتی واتش: "فرە گرنگا کە پارت، لایەن، ڕێکوزیێکۍ و تەماموو چینەکاو سەرتاسەروو کورڎسانی گەورەینە یەکڕیزۍ و یۊگێرتۍ با، چونکوم یەکڕیزیی گەلوو کوردی بابەتێوە نشتیمانی و نەتەوەیین و سنووروو حزبایەتی و ئایدلۊژیای ویەرنۊ".

سەڎ ساڵۍ چیوەڵتەر نەتاواما نوێنەرۍ و قسەکەرۍ کوردی بیمۍ لۊزاننە

هەرپاسە کاروان سەعیڎ، سەبارەت بە پەراوێزوستەی کوردی سەڎ ساڵۍ چیوەڵتەر جە کۊنگرەو لۊزانینە، ئەرەیاوناش: "ئێمەی کورد سەڎ ساڵۍ وەڵتەر یۊگێرتۍ نەبێنمۍ و نەتاوما داکۊکیکەرۍ و قسەکەرۍ بیمۍ پەی داکۊکی جە مافوو گەلی و خاکەکەیما جە کۊنگرێوە گرنگی پێسە لۊزانینە کە چارەنویسوو نەتەوەکەیماش دیاری کەرد، وەلۍ ئیساتۍ ئێمەی کورد متاومۍ ئا هەرمانۍ کەرمۍ. ئیساتۍ هۊشیاریی نەتەوایەتی بە بەراورد بە سەڎ ساڵی وەڵتەری فرە فاڕیان".

مەبۊ جارێوە تەر ئێمەی کورد نەخشەی تازەنە پەراوێزۍ وزیەیمێوە 

هەر جە درێژەو قسەکاشنە ئا ئەندامەو کەنەکەیە واتیچش: "بەداخۊ حزبەکاو کورڎسانی نەتاوانشا بەیا لاو یۊترینی، وەلۍ فرە گرنگا ئێمە هەوڵۍ ئانەیە دەیمۍ، کە گردما کوۍ بیمێوە دەوروو بەرنامێوەنە پەی ئانەی، کە داوا و واستە نەتەوەییەکەما بەدەس بارمۍ، چونکوم بە پاو دیایما جارێوە تەر نەخشەی تازە پەی مەنتیقەو وەرکەوتوو دلێڕاسەی مجیۊراوە، مەبۊ ئێمەی کورد جارێوە تەر چی نەخشەنە پەراوێزۍ وزیەیمێوە، مشۊم وێما جە پەیماننامەکانە بیمۍ بە نوێنەر و قسەکەروو گەلەکەیما".

گردوو حیزبەکا مشۊم بە هەرمانەی نەتەوەییەو وێشا وربێزا

جە ئاخرۊ کاروان سەعیڎ ئەنداموو کۊنگرەی نەتەوەیی کورڎسان(کەنەکە)ی، سەبارەت بە فشاروستەیسەروو سەرجەموو حزبەکاو کورڎسانی پەی یەکڕیزی و بەیاگەیاونای ئەرکی نەتەوەیی، واتش: "پەنەوازا دلۍ خەڵکینە سەبارەت پی بابەتەیە هۊشیاری وەڵا کریۊوە، ئێمەیچ پێسە چینی سیاسی و ڕۊشنویروو کوردی و حزبەکا هەڵوێست و داواما بۊ سەروو گردوو حزبەکا وەروو ئانەی بە هەرمانۍ نەتەوەیۍ و نشتیمانیۍ وێشا وەراوەروو گەلەکەیشاوە وربێزا".

س.ز