ژەناو شارو قامیشلۆی پەی یاڎکەردەیۆ هەر یەرە ژەنە کۊششکارۍ و گەشمەرڎا سەکینە جانسزۍ، لەیلا شایلەمەزۍ و فیدان دۆغانۍ جە مېڎانوو عوسمان سەبرییوە دەسشا بە ڕاپیمای کەرد. ڕاپیمایەکە جە لایەنو کۆنگرە ستاریوە سازکریابۍ.

جە ڕاپیماکەینە دروشمەکاو "ژەنی، ژیۋای، ئازادی"، "مرۆنە فاشیزم"، "مرۆنە خیانەت" و "نا پەی خیانەتی" وچیاوە. هەرپاسە جە ڕاپیماکەیەنە ئاڵاکۍ کۆنگرە ستاری و وێنەو گەشمەرڎا سەکینە جانسزۍ، لەیلا شایلەمەزۍ و فیدان دۆغانۍ بەرزۍ کریێوە.

ڕاپیماکەی تا مېڎانوو گەشمەرڎە روباری بەردەوام بۍ چا فاڕیا پەی گلێرۆبیەی. دماتەر بە دەیەقێوە بێدەنگی رێز جە گیانبەخشایا شۆڕشی گیریا و دماتەریچ بە نوێنەرایەتی کۆنگرە ستاری شاها خەلیل قسێش کەردۍ.

شاخا خەلیل باسش چانەیە کەرڎ کە ئارۆ ڕۊو ئەوەکۊشایا، ۋەرو ئانەی رۆ رۆو گەشمەرڎەبیەو گەشمەرڎە سەکینە جانسزۍ، لەیلا شایلەمەزۍ و فیدان دۆغانێن و پی جۆرە بەردەوام بی: "گەشمەرڎۍ سەکینە جانسزە جە ئەرەمەرزنەرا پارتو کرێکارا کوردەسانی بۍ. دژمنیچ پەی ئانەی ئەوەکۊشای ماڕۆ هەڤاڵ سەکینە جانسزە و هەڤاڵاش جە ڕاو کۆمکوژییوە جە پاریس گەشمەرڎۍ کەردۍ. هەرپاسە ئا پرۆسەی کە ئیساتۍ دلێمانە ملۆڕاوە گۆرەتەرین جوابا پەی دژمنی. ئیرادەو ئێمە سەرگنۆ و تەکنەلۆجیاو قورسو دژمنی بە ئیرادەو ئێمە دلێنە بریۆ. بە جەنگو گەلی شۆڕشگێڵنی ئێمە حەقەو گەشمەرڎاما مکەرمۍ و دۆزو گەشمەرڎا مېیاۋنمۍ ئەنجام. جە دما دماینە ماچمۍ حەجگیز چارەسەری نمۍ ئاراوە، ئەر رابەر ئاپۆ بە شێوەی جەسەیی جە زینانەنە ئازاد نەکریۆ.

دماتەریچ جە کۆردیناسیۆنو کۆنگرە ستارینە جە شارو دێرکی شادیە ئەل یوسف-ە ئانەش وست ڕووە کە پەشتەو جەنگەوانا ۋێشا گێرانە کە جە ۋەرا ۋەرو گرڎ جۆرە پەلامارێوەنە مردێنێوە و ئەرەیاۋناش، "جە سەرەتانە ماچمۍ کە گەشمەرڎۍ سەکینە جانسزە، لەیلا شایلەمەزە و فیدان دۆغانە پەی ئێمە بانۍ بە تروسکایی ئازادی. هامکات هرووژمە ئەرەگیریەکۍ دۆڵەتو تورکی ئەرەگیری پەی سەرو هەرێمەکەیما و خەڵکی مەدەنی شەرمەزار مکەرمۍ. جە هەمان کاتەنە بەردەوامۍ بیمۍ جە ئەرەکۊشای و ژیۋایۍ بێ وڵاتی قەبوڵ نمەکەرمۍ".