جە شارو جە شارو بریدش گلادباخ-و ئەڵمانیا-ی، ١٩مین ساڵیادو ئەرەمەرزنای پژاک-ی و ٧٤مین سایادو جەئەڎابییەی رێبەر ئۆجالان-ی بە مەراسیم و شەۋە ئاهەنگ پیرۆزۍ کریۍ.
جە مەرسیم و شەۋە ئاهەنگەکەنە، سەرەڕاو پارتو ژیواو ئازادو کوردستانی-پژاک، کۆمەڵگاو ژەنانو وەراسانو کوردستانی- کەژار، چنڎین پارتۍ و لایەنۍ، ژمارێو هونەرمەندۍ و جەماوەرێۋی فرە، ئامادۍ و  بەشدارۍ بیۍ.
مەراسیم و شەۋە ئاهەنگەکە بە ڕێزگێرتەی جە شەهیدانو ڕاو ئازادی و سرودو نەتەوەیی ئەی ڕەقیب-ی دەستش پنەکەرد. شۆنیشارە، ئەهوەن چیاکو ئەندام جە مەجلیسو پژاک-ی پەیامو پارتەکەیش پێشکەرد کەرد. دماتەر مەریەم فەتحی-یە، ئەندامە جە ڕاۋەبەری کەژار-ی قسێش کەردۍ. هەرپاسە ئیبراهیم عەلی پوور، بەنامۍ کۆنگرەو نەتەوەیی کوردستانی-کەنەکە، کۆمەڵە (سازمانو کوردستانو حزبو کۆمۆنیستو ئێرانی)، جمیەرو ژەنۍ ئازادۍ، پەیەده، یاری کورد، یەکیەتیی شۆڕشگێڕانو کوردستانی پەیامێشان وانێوە. چنڎین پارتۍ و لایەنۍ کە میانشان یەکێتیی نیشتمانیی کوردستانی- یەنەکە و حزبو دیمۆکراتو کوردستانی- حدکا بەکیاسەتی پەیامی بۆنەکەشان پیرۆز کەرد.
دیسان ئەڎا پەخشانە و سروش سابیر-ە، ئەڎا و واڵۍ یەرۍ شەهیدا، عەبدوڕەحمان حاجی، ئەحمەدی، هامسەرۆکو وەڵینو پژاک-یچ، پەیامێشان دێ. جە سەرجەم پەیامەکانە سەرەڕاو پیرۆزبایی و پاگێرتەرەی و سوربیەی سەرو گۆڕدای بە خەبات و کۆشای ئازادی، یەکێتیی و یۆگێرتەیی کوردی و لایەنەکاش و پێوەرە کۆشای و کارکەردەی بە وەرئاهەنگی ژەنا و جەوانا، بە پنەوازی سەرەکی و بنەڕەتیی ئی قۆناخەیە و ڕەمزو یاوای بەسەرکەوتەی بەنامۍ کریا.

مەراسیم و شەوە ئاهەنگەکە بە سینەفزیۆن سەبارەت بە کۆشای رابەر ئاپۆی و پژاکی و شۆڕشو ژەنی ژیوای ئازادی درێژەش پنە دریا. دماتەر هەردوو شاعیرۍ لامۍ (گەنجۍ)، خەبات مەحمودی و چالاک چنڎ پارچە شعرێشان وانێوە.

شۆنیەرە هونەرمەندۍ و گوڕانیواچۍ چوون: تالیب ڕەسوڵ، حەمید ئورمییە، یادۆ، هۆزان سوسەن-ـە،  جەلال داڵەهۆ بە یاۋەری چنڎین موزیسەنۍ، گۆرانیۍ و سرودۍ شۆڕشگەریێشان چڕیۍ و ئامادەبییەکێچ بە جۆش و خرۆخشەوە کۆڕو هۆرپڕای و ڕەشبەڵەکی کوردەواریشان بەست و تا دێر وەخت بەوەشی و شادی بەردشان سەر.
یاگۍ باسیەن کە جەمال حاجی و ئارین گۆدەرزی، مەراسیم و شەۋە ئاهەنگەکەشان بەردڕاوە.