رێکوزیا کورڎیەکۍ یەریڤانو پایتەختو ئەرمینیای جە یاڎو ١٠٠ ساڵەو پەیماننامەو لۆزانینە کۆبیېۋەو کۆنفڕانسێۋە ڕۊنامەوانیشا سازکەرڎ.

جە کۆنفڕانسە ڕۊنامەوانییەکەنە پەرلەمانتار کنیاس حەسەنۆڤ و نۋیسەر مرازۍ جەمال قسېشا کەرڎۍ.

پەرلەمانتار کنیاس حەسەنۆڤ ۋاتش، " پەیماننامەو لۆزانی کورڎسانش کەرڎ بە چوارپارچۍ و بەش بەشش کەرڎ. ۋڵاتەکەماشا ئەرەگیر کەرڎ. بەڵام حەرچنڎە پارچە پارچەیچشا کەرڎەبۊ، گەلوو کورڎی حەجگیز ۋەران ۋەر پا ستەمیە بێدەنگۍ نەبیېنۍ. جە قازی محەمەڎۊ تا ڕابەرو گەلوو کورڎی عەبدوڵا ئۆجالانی مدرامان و سەرهۊردای گەلوو کورڎی ۋەردەوام درێژەش بیەن".

حەسەنۆڤ داوېۋەش ئاراسەو ڕاۋەبەری پانیشتوو کورڎسانی کەرڎ و ۋاتش، "ئێمە مزانمۍ دەسکۊتەکۍ پانیشتوو کورڎسانی سەربەخۋۍ نییەنۍ. حەرپۊکەی مشۊم ڕاۋەبەری پانیشتوو کورڎسانی پەی سەربەخۆبیەی گەلوو کورڎی کۊشیۊنە، پۍ ئانەی بە لۆزانی دۋەمەرە نە ۋیەرمۍ. ئێمە داوا جە هێزە میان نەتەوەییەکایچ کەرمۍ کە جارێۋەتەر ستەم جە گەلوو کورڎی نەکەرا.

نۋیسەر مرازۍ جەمالیچ ۋاتش، "پەیمان و لۆزانی پۍ گەلوو کورڎی ڕۋۍ سیاۋا. بە مەڵامەتو پەیماننامەو لۆزانیوە هەزاران کۊکوشیۍ سەرو گەلوو کورڎیرە ئامېنۍ. جە دێرسیم، چاڵایی زیلانی حەتا شەنگال گەلوو کورڎی بە کۊکوشیرە ۋیەرڎەن. ئێمە داوا جە رای گرڎی کەرمۍ کە جارێۋەتەر کۊکوشیما سەرەرە ناراۋە. ۋەرو ئانەی ئا پەیماننامە پەیماننامەو کۊکوشکەرڎەی گەلوو کورڎیا و گەلوو کورڎی حەجگیز ئا ستەم و بێدادییە قبوڵ مەکەرۊ".

هـ . ش