ڕۊو یەکشەممەی دەوڵەتوو تورکی ئەرەگیری، بۆردومانوو کەرتە خزمەتگوزاریەکاش کەرد و بە ملۋېنان کەسېش چا خزمەتگوزاریا بێبەش کەردۍ. بە مەڵامەتوو ئا هجومە قڕکەریاوە کانتۆنەکۍ کۆبانێ و جزیرەی تاریکۍ بیۍ. جەهان جە ڕاگریکەردەی چی هجوما بێدەنگا.
دەوڵەتوو تورکی ئەرەگیری دماو شکسەکەیش جە هەرێمەکا پارێزنای مەدیاینە، جە سەعاتەکا سەرەتاو ڕۊو یەکشەممەی، هجومش کەرد سەروو سەرنیشت و ۋەرکەوتوو سوریای. ڕۊو یەکشەممەی بۆردومانوو وێستگەو کارەبۍ و شۊنما خزمەتگوزارییەکاش کەرد و ملۋێنان کەسۍ بێ خزمەتگوزاریۍ بیۍ. حەرپاسە دەوڵەتوو تورکی ئەرەگیری بۆردومانوو نوقتېوە وشکنای هێزەکا ئاسایشوو دلێینەیش کەرد جە عەین عیسا.
جە ئاکاموو ئی هجومانە عەین عیسا و نزیکەو ٣٠٠ دەگایا دەوروبەروو کۆبانێ بێ کارەبۍ بیۍ. دەوڵەتوو تورکی ئەرەگیری بۆردومانوو کۆگێوە گەنمایچش کەرد جە کۆبانێ.
حەرپاسە جە عامودێ دەوڵەتوو ئەرەگیری بۆردومانوو وێستگەو کارەبێش کەرد کە گنۊ دەگاو کۆسەی.
هاموەخت دەوڵەتوو تورکی بۆردومانوو وێستگەو کارەباو جزیرە و ترپەسپیچش کەرد. حەرپاسە بە فڕۆکەی بێفڕۆکەوان بۆردومانوو نوقتێوە وشکنای هێزەکاو حکومەتوو دیمەشقیش کەرد، ئەرەیاۋییا کە چی هجومەنە ٥ سەروازۍ سوریای گیانشا جە دەسدان.
هجومکەردەی سەروو ڕۆنامەنویسا
جە وەختوو ڕوماڵکەردەی ڕووەدایەکا هجوموو سەروو کۆگاو دانەوێڵەینە، کە جە لایەنوو دەوڵەتوو تورکی ئەرەگیریوە بۆردومان کریابۍ، بە فڕۆکەی بێ فڕۆکەوان جە دەوربەروو سەعات ١٦:٣٠ دەیەقېنە هجوموو کریا سەروو رۆنامەوانا و جە ئاکامەنە ڕۆنامەوانێوە زامڎار بی.
جە کانتۆنوو جزیرەی کارەبا بە تەمامی بڕیا
نوسینگەو ئەرەیاۋنای و وزەو کانتۆنوو جزیرەی سەروو ماڵپەڕوو ۋېشۆ وەڵاش کەردۆ، جە ۋەران ۋەروو بۆردومانەکا سەرو وێستگەو کارەبۍ و غازینە، بەرهەمئاردەی کارەبۍ جە فرەو وێستگەکانە مردان.
وێستگەکۍ نەوتۍ و غازی چنڎین جارۍ بۆردومان کریۍ
فرۆکەی بێفڕۆکەوانوو دەوڵەتوو تورکی ئەرەگیری نزیکەو ١٠جارا وێستگەکۍ نەوتۍ و غازیش جە هەرێموو کۆچەراتی دێریکی بۆردومان کەردۍ.
جەهان ۋەران ۋەر پی هجوما بێدەنگا
جە ۋەران ۋەروو ئی تاوانە جەنگیاو دەوڵەتوو تورکینە جە ۋەرنیشت، ڕێکوزیا میان نەتەوەییەکۍ بێدەنگێنۍ و تا ئی وەختە حیچ ناڕەزایەتیێوەشا بەرنەبڕیەن.
قەسەدە: ئی هجومۍ بەبێ جواب مەمەناوە
فەرماندەیی گرڎی هێزەکاو سوریایی دیموکراتی (قەسەدە) ناڕەزایی ۋێش ۋەران ۋەر پی هجوما بەربڕی و ئەرەیاۋناش "ئی هجومۍ بەبێ جواب مەمەناوە".
ئەرەیاۋناکەی پی جۊرەنە:
"وەزارەتوو وەرگیری دەوڵەتوو تورکی ئەرەگیری، جە چوارچێوەی بانگەشە و درووەکا وێشەنە ، واوەی بانگەشەو ئانەیشکەردەن جە هجومەکاشەنە پۍ سەروو ۋەرنیشتی بڕۍ جەنگەوانۍ گەشمەرڎۍ بیېنۍ. پۊکاتی ماچمۍ ئینە یۊتەرا جە درووەکاش. ئی بانگەشۍ پېویسیێوە ئەرەگیران و حۊڵ مڎۆ چی ڕێوە تاوانەکا ۋېش ۋەرا ۋەر بە ناوەندەکا خزمەتگوزاری و چێرخان و مەنتیقەکا ئەرەنیشتەبیەی بشارۊوە. بەڵگە ڤیدۆییەکۍ ئانەی بەروزا کە ئینۍ تاوانێنۍ و جە تەماموو بانگەشەکاو دەوڵەتوو تورکی ڕۊشنتەرێنۍ.
دەوڵەتوو تورکی ئەرەگیری بۆردومانوو چېرخانی ئابوری، وێستگەو کارەبۍ، بنکەو ئاێرکوشنایۆ، یانەو خەڵکی مەڎەنی و باخ و ڕاوبان و هاموڵاتیا کەرۆ، ئینەیچ ئانەی بەروزۆ کە ئینۍ تاوانۍ جەنگینۍ.
چانەی دڵنیێنۍ کە جوابدایۆ ئی هجوما مافێوە ڕەوان. گرڎ وەختۍ، عالتەر گەلوو ۋېما و مەنتیقەکاما پارێزنمۍ. جەنگەوانەکېما ۋەران ۋەر پی هجوما بۍ جوابۍ مەبا، وەعدما بە مدرامان پەی گەلوو ۋێما تازەکەرمېوە".
