یاگەداروو هامسەرۊکوو کانتۊنوو عەفرینی و شەهبای جەمال ڕەشیڎ واتش،ئا دەوڵەتۍ دەس وزا دلۍ هەرمانوکاروو سوریای، ڕا وەش کەرا پەی هجوومەکاو دەوڵەتوو تورکی پەی سەروو یاگەکاو سەرنیشت و وەرکەوتوو سوریای.
دەوڵەتوو تورکی ئەرەگیری مانگەو تشرینوو یوەمیوە چێرخانوو سەرنیشت و وەرکەوتوو سوریای بۊردومان کەرۊ و خەڵکی مەدەنی کوشۊ. سەبارەت بە هجوومەکاو دەوڵەتوو تورکی ئەرەگیری یاگەداروو هامسەرۊکوو کانتۊنوو عەفرینی و شەهبای، پەی ئاژانسوو ANF قسێش کەرڎێ.
جەمال ڕەشیڎ واتش، کە جیهان ئامادەکاری پەی ساڵۍ نەوۍ کەرۊ، دەوڵەتوو تورکی ئەرەگیریچ هجوومۍ کەرۊ سەروو خەڵکوو سەرنیشت و وەرکەوتوو سوریای و واتش: "جیهان چەمەڕوانوو ئامای ساڵۍ تازێن و خواحافیزی وەنەو ساڵەو ٢٠٢٣ کەرۊ. ساڵەی تازێنە هومێدوو چارەسەروو قەیرانەکاو سوریای هەن. بەداخۊ کە موینمۍ ماوەو ٣ ڕوان دەوڵەتوو تورکی ئەرەگیری و چەتەکێش دڕندانە هجووم کەرانۍ سەروو سەرنیشت و وەرکەوتوو سوریای".
خەسەخانۍ بۊردومان کەرۊ
جەمال ڕەشیڎ واتش، کە دەوڵەتوو تورکی ئەرەگیری چێرخانوو مەنتێقەکەی کەرۊ ئامانج و پێسە درێژەش بە قسەکاش دا و واتش: "ئا دەوڵەتۍ دەس وزا هەرمانووکاروو سوریای ڕا بە دەوڵەتوو تورکی ئەرەگیری مدا، کە هجووم کەرۊ سەروو یاگەکاو سەرنیشت و وەرکەوتوو سوریای. دەوڵەتوو تورکی ناوەندە گردینییەکا، خەسەخانە، تەنانەت ناوەندو دیالیزی و تاکە سەنتەروو ئۊکسجینوو سەرنیشت و وەرکەوتوو سوریای بۊردومان کەرۊ. فرەو ناوەندەکاش بۊردومانۍ کەرڎێنێ، تەنانەت خەسەخانەکێچ بۊردومانۍ کریێنۍ و گردوو کەرەسەکە پزیشکییەکا چێروو بینا وڕیایەکانە مەنێنێ. بنکە ئەمنییەکا و یاگە نزیکەکاو ئا کەمپا کە بە هەزاران داعشێش چەنەنۍ بۊردومان کەرۊ، حەوڵۍ واوەی زیندەکەرڎەیوە چەتەکاو داعشی مدۊ".
مەکتەبەکۍ بۊنەو هجوومەکاوە وزیێرە
درێژەو قسەکاشنە جەمال ڕەشیڎ واتش، کە مەنتێقەکاو کانتۊنوو شەهبای بەهەسی بۊردومانۍ کریا: "یەکسەر ئا دەگۍ کریا ئامانج کە خەڵکی مەدەنییشا چەنەن و دەوروبەروو پەنج کەمپەکەو کانتۊنوو عەفرینی و شەهبا. تەرسێوە گەورۍ هەنە جە ڕووەدای کۊکوشی و کارەساتی مرۊیی. مەکتەبەکێما وستێرە تا بتاومۍ زارۊڵا و ناوەندەکایچ بپارێزنمێ. بەتایبەتی شەهبا ڕووبەڕوو گەمارۊیۍ سەختی بیەنۊ".
شەهبا و عەفرین ئینۍ وەرڎەموو کارەساتێوە ئینسانیینە
ڕەشیڎ واتش کە گەلوو شەهبای و عەفرینی ئینۍ وەرڎەموو کارەساتێوە ئینسانیینە و : "کانتۊنوو عەفرینی و شەهباینە کەمینێوە کەرەسەی خاو هەن. بەداخۊ گردوو ئی پاشێلکارییا وەرەچەماو هێزە میاننەتەوەییەکا، ڕووسیای و ڕژێموو شامیوە کریا. سیاسەتوو بەرژەوەندیی میاننەتەوەیی بییەن بە سیاسەتێوە کە ئامادەن پەی بەرژەوەندییەکاش بارودۊخی ئینسانی تێک بدۊ. ئامانج چی گردوو هجووما کۊچبەرکەرڎەی تەماموو گەلوو سەرنیشت و وەرکەوتوو سوریاین".
