جمیەروو ژەنا بەلوچستانی ئەڕفای وریشە موراڎیۍ ئەنڎامەو کژاری جە لایەن و هێزە ئەمنییەکا دەوڵەتوو ئێرانیوە شەرمەزار کەرۊ و داواو ئازاڎیی و داڎپەروەری پۍ ئا چالاکۍ و تەمام و ژەنە چالاکەکا کەرۊ.
جمیەروو ژەنا بەلوچستانی جە ئەرەیاۋنېوەنە ئاماژەش پانەی کەرڎەن، کە پېسە بەشێوە جە جمیەری ئازاڎیوازی گەلوو بەلوچی ئەرکوو ئاڎیشا کۊشیای و ۋەرەنگاربیەیۊ ستەمین جە هەمان وەختەنە هامسۆز و پەشتیوانوو واڵە کوردەکاشا و چالاکا مافەکا ژەنا و تەماموو ئا کەسانۍ، کە پەی داڎپەروەری، ئازاڎیی و یەکسانی کۊشیا.
تەئکیدیچش کەرڎەنۊ، "گېرتەی و بڕفانای و بێسەروشۊنکەرڎەی وریشە موراڎیۍ، چالاکەو مافەکا ژەنا جە کوردسان و ئەنڎامەو گلېرگەو ژەنا ئازاڎیی ۋەرکەوتوو کوردسانی، جە لایەن و جمهوری ئیسلامییوە شەرمەزار کەرا.
جمیەرەکە ئانەیچش وستەن ڕووە، ئا زانیاریۍ جە بارەو ئەشکەنجەی قورس و هەڵسوکەوتی خراپی ۋەران ۋەر بە وریشە موراڎیۍ جە وەختوو گېرتەیشەنە بە دەسشا یاوان، تەمام یاگۍ نیگەرانیین. حەر چا بارۊ داواو دەموودەس ئازاڎکەرڎەی ئا چالاکە کورڎېشا کەرڎەن.
سەرەڕاو واوەی شەرمەزارکەرڎەی بڕفانای و بێسەروشۊنکەرڎەی وریشە موراڎیۍ، ژەنا بەلوچستانی داواشا جە گلېرگەی میان نەتەوەیی کەرڎەن کە دەمودەس دەسوەردای چا مژارەنە کەرۊ و حۊڵەکاش پۍ ئازاڎکەرڎەو ئا ئەنڎامۍ کژاری وزۊنە گەر.
بەپاو ئەرەیاۋنېوە ۋەڵتەروو کژاری ڕۊو ١٠و گەلاوێژوو ٢٧٢٣، یۊ جە ئەنڎاما ڕێکوزیاکەیشا “گلېرگەو ژەنا ئازاڎیی ۋەرکەوتوو کوردسانی – کژاری”، بە نامۍ “وریشە موراڎیۍ” ئشناسیۍ بە “جوانا سنە”یۍ، کە سەرحاڵەو ڕاوەبەرڎەی جەمۍ جە کاروباری سیاسی و ڕێکوستەی پەیوەنڎیدار بە ژەنا جە ۋەرکەوتوو کوردسانی بیېنە، نزیک بە شاروو سنەی جە لایەنوو هێزە ئەمنیەکا جمهوری ئېرانیۊ بڕفانیېنەو پۍ یاگېوە نادیاری بریېنە.
ئەرەیاۋنابېچش: " چی ماوەنە سەرەڕاو شۊنیرە لوای بەردەواموو خانەواڎەو هامڕېما وریشە موراڎیۍ پۍ دامودەزگا ئەمنییەکا، حیچ زانیاریېوە سەروو چارەنویسوو نامەبریۍ دەس نەکەوتەن. ئی مژارە نیگەرانی ڕێکوزیاکەو ئێمە “گلېرگەو ژەنا ئازاڎیی ۋەرکەوتوو کوردسانی – کژاری” و حەرپاسە خانەواڎەکەیش، سەبارەت بە ئاژەو نادیاروو نامەبریۍ زیاتەر کەرڎەن.."
