جەنازەو ڕۊنامەوان سالازی بە مەراسیمێوە بەرەو وان ڕوانە کریا
جەنازەو ڕۊنامەوان، نویسەر و خەباتکاروو ئەرەیاۋنای ئازاڎیی نەجمەدین سالاز جە سلێمانیۊ بە مەراسیمێوە بەرەو سەرنیشتوو کوردسانی ڕوانەکریا.
مەراسیمەکە جە هۆڵ و سینەما سالمی جە شاروو سلێمانینە لوواڕاوە. ژمارېوە فرە جە ڕۊنامەوانا، نویسەرا، هونەرمەنڎا، خانەواڎە و دۆسا ڕۊنامەوانی نەجمەدین سالازی ئاماڎۍ مەراسیمەکەی بېنۍ.
جە سەرەتانە، بە درووشمەکا نەجمەدین مەمرۊ، گەشمەرڎە مەمرۊ، جەنازەو گەشمەرڎە نەجمەدینیشا ئاورڎ دلۍ هۊڵ و مەراسیمەكەی، دماتەر پۍ ڕېزگېرتەی جە ڕۆحوو گەشمەرڎەی ئاماڎەبیۍ دەیەقېوە سەروو پەیاوە مردۍ و كوڵە ڤیدیۆیۍ سەروو ژیۋاینامەو گەشمەرڎەی پێشكەش كریا.
دماتەر، ۋاتەو كۆمپانیاو چەتری پۍ هەرمان و کاری میدیایی جە لایەن و ئاراس ئیبراهیم-یۊ پێشكەشكریا و چنەشەنە ئامابۍ: "گەشمەرڎە نەجمەدین سەروو ڕاو ڕاسی و حەقیقەتی عمرېوە پەڕ جە خەبات و کۊشیایش ڕایی کەرڎ، پەی یاۋنای ناڵە و ئېش و گەلەكەیش، جە لایەن و دەسەڵاتی فاشیستیوە زینڎانی كریا و ناچار بە كۆچكەرڎەی ڕووەو پانیشت كریا، پۊکەی وەعد واوەی کەرمېوە سەروو ڕا و ڕێبازوو گەشمەرڎە نەجمەدینی بەردەوامېبیمۍ".
دماتەر، ۋاتەو دەزگاو میدیای كوردساتی جە لایەن و ڕاسان موختاریوە ۋنیاوە و ۋاتش: "هەڵوێسی جوامێرانەو گەشمەرڎەی و سازش نەکەرڎەی جە مافەكا گەلەكەیش چنڎین جارۍ سەرش زینڎانی کریا، دماو ماۋېوە کەمی جە ئامایش پۍ پانیشتوو كوردسانی، بی بە كەسێوە وەشەسیا جە لاو فرەو کەساوە، چونكی فرە عال جە خەموو حەرچوار پارچەو كوردسانی یاۋېنە و ڕووەدایە سیاسییەكا شی کەرېوە".
دما بە دماو ئانەی، محەمەڎ ئەمین پێنجوێنی، هامڕاو گەشمەرڎەی قسېش کەرڎۍ و ۋاتش: "هەسارېوە بۍ جە سەرنیشتۊ ۋېش یاۋنا بە پانیشتوو کورڎسانی، ئەوەڵجار كە دیم جە لاو مام جەلالینە باسم کەرڎ، ئاڎیچ پەیامێوەش پۍ گرڎوو دەزگاكا ۋېشا کیاست كە هامكاریش کەرا و هەماهەنگۍ با، فرە زیڕەك و بە توانا بۍ، كەسایەتیېوە بەرز و وڵاتپارێزش بۍ".
حەر جە درێژەو مەڕاسیمەكەینە، دڵزار عارف، هامڕېوەتەروو گەشمەرڎەی قسېش کەرڎۍ و ۋاتش: "كەم كەس هەن بتاوۊ پېسە مامۆسا نەجمەدین سالازی دووۍ كایۍ شۆڕشگێڵنی و ژیاندۆسی پېوەرە لکە بڎۊ، یۊبۍ چا کەسایەتیا كە مشۊم دەرزش چنە هۊرگېرمۍ، جە نیگاكەرڎەیشەنە هومېڎ و مرۆڤدۆسیی و ژیاندۆسی بەدی کریۍ، یۊن چا یاڎەوارەییا كە حەجگیز جە یاڎ مەکریۊ".
جە مەڕاسیمەكەنە، برووسكەو خەمباری حەریۊ جە كەجەكە، بافڵ تاڵەبانی، شاناز ابراهیمە و كەنەكەی پێشكەشكریا و پەرسە و سەرەوەشی ۋېشا ئاراسەو خانەواڎەی و هامڕاکاش کەرڎ.
جە دمادماینە، ۋاتەو خانەواڎەو گەشمەرڎەی نەجمەدینی، جە لایەن و جەمیل دەمیریۊ پێشكەشكریا و ۋاتش: "مامۆسا نەجمەدین دڵسۆزوو گەل و نیشتیمانی بۍ، بە حیچ جۊرۍ گەرەکش نەبۍ ڕادەسوە دەوڵەتوو ئەرەگیری توركی بۊ، پۊکەی ناچار ڕووەش جە پانیشتوو كوردسانی کەرڎ، وەختۍ کە نەوەش كۊت ۋاتما بەرمېت پۍ وڵاتا بەری پۍ چارەسەری، پنەش واتیمۍ حەر جە پانیشت مەنووە، چونكی پانیشتوو كوردسانیش فرە وەش سیۍ".
دماتەر جەنازەو گەشمەرڎەی، بەڕێز و شكۆوە ڕوانەو مەنتیقەو ۋېش کریا جە سەرنیشتوو كوردسانی و چا بە خاکیش مسپارا.
