جە قۆڵو مڎرامانوو بەنداوو تشرینینە جەنگەوانەو یەپەژەی بێریتان ڕۆستەمە ماچۆ: ''تا دما هەناسەو ژیۋایما بە باوەڕو گەلی و ڕابەرایەتیما ئەوەکۊشای مکەرمۍ و حیچ کاتێ ملکەچۍ مەرامەکا دژمنی نمەبیمۍ''.
دۊڵەتوو تورکی ئەرەگیری و چەتەکێش جە ٨و کانوونو یووەمو ٢٠٢٤یوە هرووژمێوە ۋەرفراوانی ئاسمانی و زەمینیش جە دژو بەندوو ترشینی و سردەو قەرەقۆزاقی دەسپنەکەرڎەن. سەرەڕاو ۋەرفراوانی هرووژمەکا، بەڵام ئاستو ئیرادە و مڎرامانوو جەنگەوانانە گرڎ بە شکس سەرشەرە مەڕیاوە.
جەنگەوانەو یەپەژەی بێریتان ڕۆستەمە یووەنە جە جەنگەوانا مڎرامانوو سەنگەرو بەنداوو تشرینی، بێریتانە بەنداوو تشرینی پېسە قەڵاو مڎرامانی پێناسە مکەرۆ و پی جۊرە باسش جە ئیرادە و مڎرامانوو جەنگەوانا کەرڎ: "نزیکەو دووۍ مانگان ئینایمۍ چۍ و بە گرڎو ئیرادەیماوە درێژە بە مڎرامانیما مڎەیمۍ. سەرەڕاو گرڎو هرووژمە سەختەکا دژمنی، حیچ کاتێ ملکەچۍ ویست و مەرامەکا دژمنی نەبیەیمې. ئەوەکۊشایما وابەسەو دڵسۆزیمانە بە ئازادی گەلاماوە. ئینە هېزما پنە بەخشۆ. بە تایبەت هێز جە ڕابەرایەتیما و هەمڕا گەشمەرڎەکاماوە هۊر گێرمۍ. ویر و باوەڕیی ئی قۆناغەیما سات بە سات بەهێزتەر بۆ. گرڎو مەرامیما سەرکۊتەیا."
گەل خاوەنو قەرارداری ئازدییا
بێریتان ڕۆستەمە دەربارەو قەرارو گەلا سەرنیشت و ۋەرکۊتوو سووریای کە بە ئێشکگیریشا پاڵپەشتی هێزو جەنگەوانانۍ ئاماژەش پانەی دا هەڵوێسو جەنگو گەلی شۆڕشگێڵنی گەلی بیەن بە سەرچەمەو هێزی کاریگەریشا و واتش: "ئی هەڵوێسەو گەلی هېزما پنە بەخشۆ جە ماڕای هرووژمە ئەرەگیریەکا. هەڵوێسو گەلی جە بەنداوو تشرینینە نیشاندەرو قەرارداری ئازادییا. پېسە جەنگەوانا هامکۊششکارۍ گەلەکەیمانمۍ و تا دما دڵۆپو ونێما چنی ئەوەکۊشای ئازادی گەلەکەیمانمۍ. ئەوەکۊشای شایستەو گەلی و ڕابەرایەتییما ڕاوەبەر مکەرمۍ. حیچ کاتێ ملکەچۍ مەرامەکا دژمنی نمەبیمۍ."
