ئایتەن دێرسیمە ئەندامەو ناوەنڎوو هەماهەنگی پاژکی و تێکۆشین ئۆزانە ئەنڎامەو ئەنجومەنوو پاژکی باسشا جە کەسایەتی ساکینە جانسزۍ یووە جە ئەرەمەرزنەرا پەکەکەی کەرڎ و ماچا، جەنگوو هەڤاڵ ساکینەی جەنگوو گرڎیمانە، پێویسا ئی جەنگیە گۊرەتەر کەرمێوە.
ئایتەن دێرسیمە ئەندامەو ناوەنڎوو هەماهەنگی پاژکی و تێکۆشین ئۆزانە ئەنڎامەو ئەنجومەنوو پاژکی مێمانۍ بەرنامېوە تەلەفزیۆنی مێدیا خەبەری بێنۍ و باسشا جە کەسایەتی ساکینە جانسزۍ یووە جە کادیرە سەرمەشق و ئەرەمەرزنەرەکا پەکەکەی کەرڎ.
جە سەرەتاو قسەکاشەنە ئایتەن دێرسیمە کۊکوشی ٩و کانوونوو دووەمیش شەرمەزار کەرڎ و بە ڕێز و ئیحترامۆ جە کەسایەتی ساکینە جانسزېنە یاڎوو گرڎوو گەشمەرڎا ئازاڎیش کەردۆ و واتش:"بۊنەو ئی ڕووەیۆ جارێوەتەر وەعد مڎەیمۍ ئەرک و ۋەرپرسیاری ۋېما بە شێوېوە شایستە ئەنجام بڎەیمۍ، هەڤاڵ سارا بناغەو وەڵینگەو کۊشیای ٥٠ ساڵەیمانە، خەتەو جمیەروو ئازاڎیی ژەنا کوردینە، ڕابەرایەتی پا جۊرە پێناسەش کەرڎە و ساحیبەو وەڵینگەو ئی جۆرە کۊشیاینە".
ئایتەن دێرسیمە ئاماژەش پانەیچ کەرڎ، ساکینە جانسزە بە هەڵوێسی شۆڕشگێڵنانەو ۋېش سەرمەشقایەتی گرڎوو گەلیش کەرڎەن و ویرش ئارڎۆ کە دماو گەشمەرڎەبیەیش، جە نیپاڵۆ تا میسر، جە ئەمریکای لاتین و فرێوە جە وڵاتا ئەوروپاینە، وێنەکېش جە ڕاپیمای، کۆنگرە و کۆنفرانسەکانە بەرزۍ کریێوە.
ئایتەن دێرسیمە ئاماژەش پانەی دا، عەشقوو ئاڎیشا پۍ ئازاڎیی، گلېرگەین و واتش:"واتە ژەن بیەی ئێمە و جە کەسایەتیی هەڤاڵ سارێچەنە شەخسی نییا. جە مەراسیموو ویرئارڎەیۊکەینە جە ئەوروپا، بە هەزاران کەسۍ ڕاپیمایشا کەرڎ. گەشمەرڎەبیەو هەڤاڵ سارۍ جارێوەتەر دێرسیمش لەرناوە، هەڤاڵ سارا جە ڕاو کۊشیایشۆ کەسایەتی ۋېش بنیاڎ نیا، بە دڵنیاییوە متاوو واچوو؛ مشۊم ئی ئەرک و ۋەرپرسیارێتییەما هۊش نەشۆ، گەلەکەما، ژەنا خۊتانکەردەیش ۋنە کەرا، بەتایبەتی دێرسیم. چونکی کۊکوشی دمایش نامان. ڕاسا ئاڎۍ چی کۊکوشیەنە سەرکۊتۍ نەبیۍ، نەتاواشا پیلانەکاشا سەر وزا و مەتاوا. بەتایبەت ئازاڎیی ئا ژەنا کە سەرمەشقایەتی کۊشیای گەلی وەڕاوەبەرا، بەردەوام دژوو کولتووروو کۊکوشی کۊشیەیدۍ، کۊکوشی دێرسیمی سەرکۊتە نەبۍ، ڕاسا خەڵکشا کۊکوش کەرڎ، بەڵام نەتاواشا سەرکۊتۍ با ، گەلوو دێرسیمی ئەرکێوە پا جۊرەشا هەن، بە سەڎان شۆڕشگێڵنۍ چاوە سەرشا هۊردان، ئانەی شۆڕشگێڵنا دێرسیمیش عالتەر وستۍ ۋەروو چەما هەڤاڵ سارانە، ساحیبەو کەلتوروو شۆڕشگێڵنانەو ۋېشەنە، ساحیب کولتوروو مدرامانیەنە. پێویسا پا جۆرە بشناسیۆ. دێرسیم کولتوورێوە شۆڕشگێڵنی و سەرهۊردایش هەن، بەڵام ئەگەر نەفاڕیۆ پۍ ڕێکوستەیۍ بەقوەتی، مەتاوۆ سەروو دوژمنیەرە سەر گنۆ. هەر وەروو ئینەینە سەرۆکایەتی ماچۆ 'جەکوردسانەنە بەبێ ڕێکوستەی تەنانەڎ گەڵێوەیچ مەجمۆ'. ئی ڕاسیە جە کۊشیای ٥٠ ساڵەو ئێمەنە سەلەمیان. ئێمەیچ شۊنیرە لووای پۍ ئی قۆناغەیە کەرمۍ. بەڕاسی گەرەکشانە دێرسیمی و کوردسانی جە کوردا چوڵکەرا و شارەکێما بەبێ ڕێکوستەی با. ئینیشا ویروو کێ مارمېوە؟ پۍ جیلوو گەنجا. جیلوو گەنجا سەرمەشقۍ گەلینۍ، پۍ گرڎوو جمیەرەکەیما. ئیسە جە گرڎ یاگێنە گەنجا بە مەڵامەتوو فشاری قورسیۊ وڵات، دەگا، شارەکەیشا جیامازا. وازئارڎەی واتە بەقوەتکەردەی دوژمنی. ئێمە ئینەی مزانمۍ. وازئارڎەی واتە ڕادای بە فشارەکا دوژمنی. چونکی حیچ گەلێوە، گەنجێوە، ژەنێوە بەبێ بیەو خاکوو ۋېش ئازاڎ مەبۆ، وڵات بەبێ گەلی ئازاڎ مەبۆ.
بەڵێ زەحمەتا، بەڵام کۊشیایۍ هەن کە ئێمە بە قووەتۆ چنەش نزیکۍ بیمېوە. جە کەسایەتی هەڤاڵ سارێنە، گەرەکم بۍ ئی ئەرکەیە بۆنەو ئی ڕووەیۆ بارووە وە یاڎ.
حەرپاسە تێکۆشین ئۆزانە ئەرەیاۋناش، کۊشیای ساکینە جانسزۍ پۍ ماوەو زیاتەر جە ٤٠ ساڵان جە تەرەفوو هەڤاڵاشۆ بەردەوامیش پنە مڎریۆ و واتش:"بێگومان سەرۍ گنمۍ. چونکووم میتۆدێوە ڕاس خوڵقیان و فاڕیان پۍ ڕاسی، ئێمە ساحێبۍ ئا ڕاسیەینمۍ. ئانۍ حۊڵوو پارازنای ۋېشا مەڎا، ناچارێنۍ چێروو هەیمەنەو دەسەڵاتوو کەسێوەتەرینە بژیۋا یان مرا، حیچ ڕێوەتەرە نییەنە، مشۊم ۋېت پارێزنی پۍ ئانەی مەنی، بەتایبەت ژەنا ئەگەر ژەنی وێش نەپارېزنۆ، وېپارېزنایشا بسپارا بە کەسا تەری، دماتەر مافوو قسەکەردەیشا ڕادەسوو کەسا تەری کەرا، ئانۍ متاوا وەرگیری جە وېشا کەرا متاوا قسۍ کەرا، مافوو هۊرچنیەیشا هەن، بە زانابیەی هەڵوێستێوە نیشانە بڎا، واتە وەرگیریکەردەی جە ۋێت بە ماناو بیەیتا، بەشداربیەو هەڤاڵ ساکینەی جە ڕیزەکاو پەکەکەینە بە کۊشیای زیاتەر جە ٤٠ ساڵەی، واتە پارېزنای ۋێش و گلېرگەکەیش".
تێکۆشین ئۆزانە سەرنجش وست سەروو قسەکاو ساکینە جانسزۍ "ژیۋایم هەمیشە جەنگ بۍ" و واتش "جەنگوو هەڤاڵ ساکینەی جەنگوو گردیمانە، مشۊم ئی جەنگیە وەڵۍ وزمۍ، مشۊم ئی شېوازە جە جەنگی وەڵۍ وزمۍ. بێگوومان بەین بەین قسۍ کریا، چالاکیۍ کریا، بەڵام ئینایمۍ دلۍ جەنگوو یەرەمی جەهانینە، جەنگېوە گۊرە و کۊکوشی ملۊڕاوە، ژەنا چی جەنگانە بانۍ بە ئامانج، جە ئەمریکای لاتین، غەززە، ئێران، ئەرمەنێستان، ئۆکرانیا، کوردسان حۊڵ مڎا پی جۊرە ژەنا دلېنەبەرا، پۊکەی ڕێکوستەی ژەنا، ڕێکوستەی پۍ ژیۋای پێویسا پېسە مەجبووریەتێوە وینیۆ، دلۍ پەکەکەینە تەجرووبێوە گۊرە هەن، پەشتیوانیکەردەی و بەشداربیەی دلۍ پەکەکەینە، بە شێوېوە ڕێکوستەی ڕاپیمایکەردەی، بەرزکەردەیۆ ئاستوو کۊشیای ژەنا دلۍ پەکەکەینە، تەنیا گەرەنتی ژیۋایۍ ئازاڎین پۍ ژەنا کوردی و گرڎوو ژەنا جەهانی. گۊرەکەردەیۆ ئی کۊشیایە جە دەوروو ڕابەرایەتیما، بیەیش و بەردەوامیدای پنەش، پێویسیێوەن. جەڕاسینە ئازاڎیی ڕابەرایەتی ئازاڎیی ئێمە و ئازاڎیی ژەنان. پۊکەی پێویسا زیاتەر خۊتانکەرڎەی جە ڕابەر ئاپۆی کریۆ، مشۊم سیستموو گۆشەگیری ئیمرالی مەڕیۊنە و ڕابەر ئاپۆ ئازاڎ کریۆ. جە یاڎوو هەڤاڵاما ساکینەی و فیدان دۆغانۍ و لەیلا شایلەمەزێنە، با کۊشیەیمۍ، پارېزنای ۋېما بەقووەت کەرمۍ، ناوەندوو ڕێکوستەی وەش کەرمۍ و پی جۊرە سەرۍ گنمۍ.
ئینە داواو ئێمەنە پۍ گرڎوو ژەنا. جە ئاینڎەنە چالاکییەکۍ جە کوردسان، جە بەروو وڵاتی، جە ئەوروپا، جە فرەو یاگا جەهانینە ئەنجام مڎریا. داواو بەشداریێوە بەقوەتی چی چالاکییانە کەرمۍ. داوا جە گرتڎوو ژەنا کەرمۍ کۊشیایۍ بەردەوام و شۆڕشگێڵنانەی بەقوەت ئەنجام بڎا. سەروو ڕێبازوو هەڤاڵ سەکینەی، بەشدارۍ ڕیزەکاو پەکەکەی با. چی کۊشیاینە گرڎ کەسۍ متاوۆ دەوروو ۋېش بوینۆ. بەڕاسی متاویۆ دەسکۊتەکۍ گۊرۍ و بەردەوامۍ با. سەروو ئی بنەمایۍ گەرەکما جارێوەتەر دڵسۆزی ۋېم پۍ یاڎوو هەڤاڵام واوەی کەرووە. نەک تەنیا سیاسەتە قڕکارییەکاو دوژمنی شەرمەزار کەرمۍ، ماچمۍ فاشیزم و ئایدۆلۆژیاو کوشتەی ژەنۍ و گەلا دلېنەبەرمۍ. جە کەسایەتی هەڤاڵاما ساکینە جانسزۍ، فیدان دۆغانۍ و لەیلا شایلەمەزێنە، بە ڕێزو حورمەت و منەتبارییوە جە ۋەران ۋەروو ژەنا ئازاڎینە سەرەو ڕێزی منامنوورە".
