سەرۆکوو گرڎی جەمەو ئیسلامی کوردسانی (جیک) حافز ئەحمەد تورهالی، هجومەکۍ دەوڵەتوو تورکیش پۍ سەروو ۋەرنیشتی شەرمەزار کەردۍ و داواش کەردە خۊتانکەردەی جە ۋەرنیشتی کریۆ و گرد لایۍ دژوو هجومەکا دەوڵەتوو تورکی مرداوە.
حافز ئەحمەد تورهالی جە پەیامێوە ڤیدیۆیینە هجومەکۍ دەوڵەتوو تورکیش پۍ سەروو ۋەرنیشتی شەرمەزار کەردۍ.
تورهالی واتش:"جە لېوە حکومەتوو تورکی هجومەکاو ئیسرائیلی پۍ سەروو غەززەی کەرۆ بە ڕۆژەڤ، جە لېوەتەریچۆ بە تنی بۆردومانوو گەلوو کوردی و هەرێمەکاو ۋەرنیشتی کەرۆ، خەڵکی مەدەنی کوشۆ، ئەرەمەرزیا مەدەنییەکا و خەسەخانە و چېر خانەکا کاول کەرۆ و تاوانەو جەنگی ئەنجام مڎۆ."
حەرپاسە تورهالی داواش جە گەلوو کوردی کەرڎ، "حەرچی ئینا تواناتانە پێویسا بەکارش باردۍ، مشۊم ئی زڵمەیە مردندۍ، چکۆ دڕندەیی بۆ، ئیسلام و مرۆڤایەتی نیا چا، ئەگەر ئارۆ دژوو هجومەکا سەروو ۋەرنیشتی نەمردمېوە، گرڎما ۋەرپرسیارۍ بیمۍ جە هجومەکا، پۊکەی مشۊم ۋەران ۋەروو ئی زوڵم و ستەمەیە مردمېوە. مشۊم ئانەی ئینا توانامانە کەرمېش. دەوڵەتوو تورکی دیسان بۆمبۍ سەروو ۋەرنیشتیرە وارنۆ. سەبەب چېشا؟ دیارا ئاڎۍ ۋەران ۋەروو جەنگەوانا ئازاڎیینە جە پانیشتوو کوردسانی شکسشا ئاردەن پۊکەی حەقەو ئینەی کەراوە، خەڵکی مەدەنی کوشا، شۊنماو ژیۋای گەلی کاول کەرا، هجوم کەرا سەروو خەسەخانەی و سایلۆو گەنما و ئەرەمەرزیا خزمەتگوزارییەکا، ئینە تاوانەنە دژوو مرۆڤایەتی، پێویسا گردما ۋەران ۋەر پی زوڵم و ستەمکارییا دەنگما هۊربڕمۍ و ڕاشا ۋنە گېرمۍ."
