بە سەڎان کەسۍ جە ئەرەنیشتا کانتۆنوو فوراتی پۍ شەرمەزارکەردەی کۊکوشی ٩و کانوونوو دووەموو ٢٠١٣ ی کە جە ئاکامشەنە یووە جە ئەرەمەرزنەرا پەکەکەی سەکینە جانسزە، نوێنەرەو کۆنگرەو نەتەوەیی کوردسانی (کەنەکە)ی جە پاریس فیدان دۆغانە ئەندامەو جمیەرەو گەنجا کوردی لەیلا شایلەمەزە گەشمەرڎۍ بیۍ، مجیېرە جاڎەو مېڎانەکا.

جە ڕاپیماکەینە کە بە سەرمەشقایەتی رێکوزیا و دامودەزگاکا ۋېڕاوەبەری دیموکراتیکی کانتۆنوو فوراتی ئەنجامدریا، بنەیانەو گەشمەرڎا و بە سەڎان کەسۍ جە ئەرەنیشتا هەرێمەکەی بەشدارییشا کەرڎ. ڕاپیماکەی جە مېڎانوو ژەنۍ ئازاڎێنە بە واتەیۆ "گەشمەرڎۍ مەمرا"، "بژیۋۆ سەرۆک ئاپۆ" و "ژەنی، ژیۋای، ئازاڎیی" دەسشپنەکەرڎ و تا وەننگەو گەشمەرڎە سەیدۆی بەردەوام بۍ.

دماتەر ۋەروودەموو وەننگەو گەشمەرڎە سەیدۆینە بە دەیەقېوە بێدەنگی رێز جە هەر یەرە گەشمەرڎەکا ئا کۊکوشیەیە و گرڎوو گیانبەخشایا جمیەروو ئازاڎیی گیریا. چا ئەندامەو ئەنجومەنوو پارتوو یۊبیەی دیموکراتیکی (پەیەدە)ی مهاباد کۆچەرە قسېش کەردۍ و ئەرەیاۋناش، کە سەکینە جانسزە بە مدرامانوو ۋېش بیە بە نمونە پۍ تەماموو ژەنا جەهانی.

کۆچەرە ئانەش وست ڕووە کە ئامانجوو کۊکوشی و پیلانگێڵنی دلېنەبەردەو جمیەروو ئازاڎیی کوردی بۍ و پی جۊرە درێژەش بە قسەکاشدا: " بەدرێژایی تاریخی چنڎین سەرهۊردۍ گەلی جە تەرەفوو دەسەڵاڎدارەکاوە سەرکوتۍ کریېنۍ. حۊڵشا دا پا هجووما دمایی بە جمیەروو ئازاڎیی کوردی بارا. جە کەسایەتی سەکینە جانسزېنە گەرەکشابۍ ئانەی جابەجێ کەرا. هامڕا سەکینە بە هەڵوێس، مدرامانوو کۊشیای ۋېش بیە بە نمونەو ژەنۍ ئازاڎۍ".

دماو قسەکا ڕاپیماکەی بە دروشمەو "گەشمەرڎۍ مەمرا" دمایش پنە ئاما.