کۊنسەی گردینوو تەڤگەروو شۊڕشی یۊگێرتەو ژەنا (کەبەدەهە) پێوەس بە کۊشیای ساڵەو ٢٠٢٣ و پاگێرتەیرەیشا پەی ساڵەو ٢٠٢٤ ئەرەیاوناێوەش وەڵا کەرڎۊ.  

جە ئەرەیاونایەکەینە ماچۊ: "دماو ئا کارەساتە سرووشتییا کە بە سیاسەتەکاو کرێوەریی دەوڵەتیوە گرانتەرۍ بێنێ، ساڵێوە تەرما جە هجوموو ئەرەگیرکاری و تندوتیژیی دژوو ژەنا و کۊکوشییەکا بەرڎە و زەخمەکێما پێتێ. ساڵەی نەوەیچنە بە پاگێرتەیرەوە خێرامای چا ئاڵۍ کەرمۍ کە نەمراماوە و ورماگێرتێنە".

هەرپاسە ئاماژە پانەیە کریان، هامشێوەو کۊشیای شناسنامەی ڕەگەزی بندەس و ژەناو فەڵەستینی، کە دژوو هجوومی قڕکەروو زایۊنیزمی مدرامان کەرا، ئادێچ دژوو پیاسالاری و ئەرەگیری  گرد مەیدانێوەنە درێژە بە کۊشیای ڕزگاری مدا.  

ئەرەیاونایەکە ئاماژە پانەیە کەرۊ ساڵەی وەڵینە هجوومەکاو دەوڵەتوو تورکی پەی سەروو ژەنا و شناسنامەو بندەسەکا بەرڎەوامۍ بێنۍ و ماچۊ: "سەرەڕاو گردوو فشار و سەرکوت و سیاسەتوو فریودای ژەنا و شناسنامە ڕەگەزییە بندەسەکا، دژوو گرد نۊعە هجوومەکا مدرامان کەرا".

هەرپاسە ئەرەیاونایەکەن ئامان: "بەتایبەت کوردستاننە و تورکیانە، کەشۊ و زینڎاننە و جادەکانە، ئی ئیرادە دژوو فاشیزمی و پیاسالاری بەرز کریاوە. پێسە تەڤگەروو شۊڕشوو یۊگێرتەو ژەنا سڵام چا ئیرادەیە کەرمۍ و بەپاگێرتەیرەوە ساڵەو ٢٠٢٤ پەی سیستموو پیاسالاری کەرمۍ ساڵەو زینڎانی.

ڕواو ئەوەڵوو ساڵەو ٢٠٢٤، ئا ئاڵۍ ڕۊزا لۊکسەمبۊرگ و مەراڵ یاکارنە و لالە چۊلاکنە و ساکینە جانسیزە و فیدان دۊگانە و لەیلا شایلەمەزە و سێڤۍ دەمیرە و پاکیزە نایرە و فاتمە ئویارە و هەزاران هامڕۍ نەمرێوە یاوا دەسما، بە درووشموو "ژەنی، ژیوای، ئازاڎی"ـیوە بەرز کەرمێوە. فەڵەستینۊ تا کوردستان هاوار کەرمێ: بیێنمۍ و هەنمۍ و بیمێ".