بەپاو هەواڵێوە تۆڕەو مافەکا مرۆڤوو کوردسانی ڕۊو چوارشەممەی هێزەکاو پاسەوانوو سنووروو دەوڵەتوو ئێرانی جە مەنتیقەو سنووری زەلێی بانەی جە نزیکۆ راسەوخۆ تەقەشا جە جەمۍ جە کۆڵبەرا کەردەن و پا مەڵامەتۆ کۆڵبەرێوە بە نامۍ میرزا ئەحمەڎیی کوشییان.

میرزا ئەحمەڎیی تەمەن ٤٣ ساڵ، خەڵکوو دەگاو هەنجێنەی بانەین و خێزاندارا و تاتەو دووۍ زارۆڵا بۍ.

ئا کۆڵبەرە کە خۊتان پەنەوازی تایبەت بۍ، پۍ حاسڵکەردەی بژێوی ۋېش و بنەیانەکەیش ناچاربۍ، رووە جە هەرمانەو کۆڵبەری کەرۆ.

ڕۊو یەرەشەمەی کۆڵبەرێوەتەر بە نامۍ شۆڕش خەرگوشی خەڵکوو شاروو سەڵماسی سەر بە پاڕێزگاو ورمێ، جە وەختوو کۆڵبەرینە جە سنووروو بانەینە بە تەقەو هێزەکا دەوڵەتوو ئێرانی کوشییا.

جە سەرەتاو ئێساڵیوە، لاوکەمیۆ دووۍ حاڵەتۍ کوشییای و ١٠ حاڵەتۍ زامڎاربیەی کۆڵبەرا جە مەنتیقە سنوورییەکا ۋەرکەوتوو کوردسانینە تۆمار کریېنۍ.

بەپاو ئامارەکا رێکوزییاکا داکۆکیکار جە مافەکا مرۆڤی ساڵەی ویەردێچ زیاتەر جە ٣٠ کۆڵبەرا کوشیۍ بێنۍ و نزیکەو ٢٧٠ کۆڵبەرا تەریچ زامڎارۍ بیېبێنۍ، کە فرەیشا جە دووۍ مەنتیقانە بیێنۍ سنووروو بانەی سەر بە پارێزگاو سنەی و سنووروو نەوسوڎۍ سەر بە کرماشانینە کریېبێنۍ ئامانج.