جە بانگەوازێۋەنە گلېرگەی دیموکراتیک و ئازاڎیی ۋەرکەوتوو کورڎسانی (کۆدار) هجومەکۍ ئی دماییەو دەوڵەتو تورکی پۍ سەرو هەرێمەکا پارېزنای مەدیای، بە تایبەتی زاپ و بەکارئارڎەی چەکی ئەتۆمی تاکتیکی بە تنی شەرمەسار کەرڎەن و ئەرەیاۋنانش، "ئەنجامدای ئا هجوما دماو کۊبیەیۊی ناتۆی بەرش وزۊ پیلانە و سیناریوۋۍ تازۍ دوژمنا گەلوو کورڎیا جە چوارچێوەو لۆزانێۋە تازەینە".

کۆدار ئاماژەش پانەی کەرڎەن کە هامکاری و بەشڎاری پەدەکەی چنی دەوڵەتوو تورکی ئاسانکاریش پۍ ئا رژێمە فاشیستەیە کەرڎەن کە پلانەکاش پۍ کۆکوشکەرڎەی ۋەڵۍ وزۊ.

جە بانگەوازەکەشەنە کۆدار داواش جە گەلوو کورڎی جە حەر چوارپارچەو کورڎسانی و بەرو ۋڵاتی کەرڎەن جە دژوو ئا پیلانگێڵیە تازەیە هەڵۋێسۍ بەقوەت نیشانە بڎا و چا روۊ ئەرەیاۋنانش: "بە دڵنیاییوە  هجومە تازەکۍ دەوڵەتو تورکی بە هەڵۋێس ورگېرتەی گیانبازانەو گەلەکەیما پوچۍ کریاۋە".

دەقو بانگەوازەکەو کۆداری پی جۊرەنە

"پۍ رای گرڎی''

گلېرگەی دیموکراتیک و ئازاڎیی ۋەرکەوتوو کورڎسانی (کۆدار) لەشکرکێشی ۋەرفراوانو ئی دماییەو دەوڵەتو تورکی پۍ سەرو هەرێمەکا پارېزنای مەدیای و بەتایبەتی زاپ و بەکارئارڎەو بۆمبی ئەتۆمی تاکتیکی دژ بە سەنگەرەکا گەریلای بە تنی شەرمەسار کەرۊ. ئەنجامدای ئی هجومە ئەرەگیریا دما بە دماو کۊبیەیۊ ناتۆی بەر وزوو سیناریۆیۍ تازەو دوژمنا گەلوو کورڎیا جە چوارچێوەو لۆزانێۋە تازەینە و هامکاری چنی دەوڵەتو فاشیستی تورکی و دەوڵەتە ئەرەگیرەکا چوارپارچەو کورڎسانین.

رەوانەکەرڎەی هێزەکا سوپاو ئەرەگیری تورکی پۍ هەرێمەکا پارېزناو مەدیای و بەتایبەتی زاپ و دما بەدماو بەکارئارڎەو بۆمبی ئەتۆمی تاکتیکی کە ۋەرهەمو ناتۆیا دژ بە سەنگەرەکا گەریلای جە ما بەینو ١١ پۍ ١٣و تەمووزی، حەرپاسە هجومەکۍ بە فرۆکەی بێفرۆکەوان پۍ سەرو ۋەرنیشتو و پانیشتوو کورڎسانی سەلەمنۊش کە جە کۊبیەیۊ سەرکردەکا ناتۆینە جە لیتڤانیا سیناریۆو لۆزانېۋە تازەی  مجیانەرە. دەوڵەتو تورکی جە ڕاو ئی هجومە ۋرفراوان و وەحشیاوە ئینا حۊڵو ئانەینە هەژموونی جەهانی و ئەنڎاما ناتۆی قایل کەرۊ کە جە کۊکوشی دژ بە کورڎینە هامبەشیش چنی کەرا. دەوڵەتو تورکی پېسە دەوڵەتێۋە بەکرێگرتەو هەژموونی جەهانی جە مەنتیقەکەنە ستراتیجو کۊکوشکەرڎەی کورڎیش زیاتەر جە گرڎ وەختۍ ۋەرفراوانتەر کەرڎەن و بە چنڎین سازشۍ سەرو پەرسە ئابووری و داراییەکا و جە ڕاو سات و سەوداو دیبلۊماسیۊ مافەکا گەلوو کورڎی کەرۊ بە مژارو مامەڵەی بازرگانی. هامکاری (پەدەکە)ی و پاڵپەشتی بارزانییەکا پۍ دەوڵەتو تورکی پرۆسەو جەنگی و کۊکوشیش پۍ فاشیزمی ئاسانتەر کەرڎەن و گەلوو کورڎیش کەرڎەن بە ئامانجو هجومە وەحشیانەکاش. حساپ پۍ نەکەرڎەی و ۋنەنەپەرسایۊ جە دوژمنی کارەساتو هجومۍ زیاتەرۍ شۊنی ۋېشەرە مارۊ.

گەلوو قارەمانو کورڎی پەنەوازەن ئانەی بزانۊ کە قۆناغی تازەو هجومەکا سوپاو تورکی و بەکارئارڎەی چەکی قەدەغەی و بێدەنگی گلېرگەو جەهانی، بیەو گەلەکەیما و گرڎو گەلە چەوەسیاکا ۋەرکەوتوو میامینی زیاتەر وزۊنە ۋەرو مەترسیۊ. بە تایبەتی بەکارئارڎەو گرڎ جۆرە چەکێۋە ئەتۆمی تاکتیکی، کیمیایی، فسفۆڕی  ... کە جە لایەن و هەژموونی جەهانییوە ئیجازەو بەکارئارڎەیش بە دەوڵەتو تورکی دریان، نەک حەر گلېرگەی مرۆیی، بەڵکم ژیۋگەیچش یاۋنان بە لێوارو دلېنەبەرڎەی و مەنتیقەکەی پاسەپنەکەرۊ کە ئیتر دەردەو ژیای و ژیۋای نەوەرۊ. ئاساییکەرڎەیۊ بەکارئارڎەو چەکی قەڎەغە کریای تاوانێۋەنە کە هاموەخت هەم ژیۋگەی و هەم ژیای ئینسانەکا دلېنە بەرۊ. حەرپۊکەی ئاماڎەبیەی گرڎو چینو تۋېژەکا گەلی جە مېڎانەکا کۊشیاینە جە حەر چواربەشو کورڎسانی و ئەوروپای دژ بە فاشیزمو تورکی و ئەرەگیرا کورڎسانی جە ئاخرو سەڎ شاڵەو لۊزانینە، فرە گرنگا.

 (کۆدار) سەرەڕاو شەرمەسارکەرڎەی هجومە ئەرەگیریەکا دەوڵەتو تورکی پۍ سەرو مېڎانەکا گەریلای و بەکارئارڎەو چەکی ئەتۆمی تاکتیکی و گرڎ جۆرە چەکێۋە قەڎەغەکریای و حەرپاسە سەرکۆنەکەرڎەی لەشکرکێشی تازەی پۍ سەرو هەرێمو زاپی، ئانەی پېسە مەترسی زیاتەرو تەشەنەئەسای جەنگی جە کۆنسێپتێۋە تەری جە دژوو گەلوو کورڎی و گەلا تەرو مەنتیقەکەی منیۊرە. ئی هجومۍ نەک حەر یەک پارچەی کورڎسانی بەڵکم چوارپارچەکەی و نەک حەر تەنیا گەلوو کورڎی بەڵکم گرڎو گەلا مەنتیقەکەی رووۋەڕوو تەرسۍ گۊرەی کەرۊۋە. ئاژاوەگېڵیەکۍ دەوڵەتو تورکی ئارۊنە کە بڕۍ مەنتیقېش کەرڎېنۍ ئامانج، ئەگەر ڕاش ۋنە نەگیریۊ، سەوای ڕۊ مەنتیقەکا تەری و بەشەکا تەرو کورڎسانیچ کەرۊنە ئامانجو هجومە وەحشیانەکا ۋېش. حەر پۊکەی، وشیاری گەلەکەیما  جە ۋەران ۋەر بە سیناریۆکا و هجومە کۆکوژکارییەکا پېسە ۋەڵتەری پەی ۋەرەن ڕوو بیەیۊ دوژمنی، ئەرکێوە جەماوەری و گرڎینەن. یۊگېرتەیی گەلەکەیما جە گرڎ یاگۍ ۋڵاتی و بەرو ۋڵاتیۊ متاۋۊ پلانە چەپەڵەکا دوژمنی پوچ کەرۊۋە. دەوڵەتو تورکی پېسە بەکرێگرتېۋە میان دەوڵەتی سەرکێشیی فاشیزمی دژ بە کورڎیش مەنتیقەکەنە گرتەن ئەستۊ و چی ڕۋا دمایەینە جە ڕاو ۋەڵېوستەی دیپلۆماسی هەرێمی و میان نەتەوەیی و ئەنجامدای هجومی تازەو سوپا ئەرەگیرەکەیش، کۆنسێپت و قۆناغێوە تازەش جە پرۆسەو کۊکوشی دەسپنەکەرڎەن. هێزو گۊرەو گەلەکەیما بە ئاماڎەبیەی جە مېڎانەکا کۊشیاینە متاۋۊ بە بەربڕیەی پەشتیوانی جە جمیەری ئازاڎیوازیی کورڎسانی گرڎو بەدەسئامایەکا گەلەکەیما جە مەترسی دلېنەشیەی پارېزنۊ و پېسە ۋەڵتەری پۍ چنڎەمین جاری متاۋۊ ۋەران ۋەر بە دوژمنی فاشیستی سەرکۊتەی مسۆگەر کەرۊ. گەلەکەما ئا قوەتشە هەن و حەر جە گەنجاوە گېرەش تا ژەنا و رۆشنۋیرا، رێکوزیاکا، پارتەکا و گرڎو کۆمەڵا خەڵکی متاۋا هەڵمەتەو دیموکراتیکی و کەمپینی ۋەرفراوان دەسپنەکەرا و دژ بە فاشیزمی جە حەر چوارپارچەو کورڎسانی ۋېراگری کەرا. بە تەئکید  هجومە تازەکۍ دەوڵەتو تورکی بە هەڵۋێس هۊرگېرتەی گیانبازانەو گەلەکەیما پوچۍ کریاۋە.

گلېرگەی دیموکراتیک و ئازاڎیی ۋەرکەوتوو کورڎسانی (کۆدار(

١٦-٧-٢٠٢٣

هـ . ش