کۆنگرەو جڤاکی دیموکراتیکو کوردستانییا ئەوروپانە (کەجەدەکە-ئە) واتش دەوڵەتو تورکی ئەوروپانە پرۆڤۆکاسیۆن دژو کوردا مکەرۆ و داواش وەنەو ڕێکوزیا کوردییەکا کەردە "بێجگە جە ناڕەزایەتیی دیموکراتیکی، حیچ ڕا و ڕێبازێوە تەر نەگێرانە وەر".
کەجەدەکە-ئە ئەرەیاونایەکەینە ماچۆ: "ئا هجوومە فاشیستیێ بەلژیکانە دەسشا پەنە کەرد و چند شارێوە ئەوروپاینە فراوانتەر بی، تا مێ دژوارتەر بۆ".
ئەرەیاونایەکەنە ئامان: "بۆنەو دوای ئەردۆگانی دیکتاتۆری و پڕوپاگەندە پرڤۆکاتیفەکاو هاکان فیدانیوە ئەوروپانە، گرووپە چەتە فاشیستەکێ ڕاو تۆڕەو هەواڵگێری و کونسوڵخانەی و مزگییەکاو دەوڵەتو تورکیوە ڕێکێ وزیا، مجیارە مەیدانەکا و ڕووبەڕووێ گەنجاو کوردی باوە. ئینێ هەوڵێوەنێ پەی بەتاڵکەردەیۆ ئا دەسکەوتا ڕاوکۆشیای ئازادییوە بەدەس ئامێنێ.
کاریگەریی هەڵمەتە جیهانییەکێ، ڕاپیمای سەدان هەزار کەسا ١٧ شوباتی کۆڵننە و مدرامانو سەدان هەزارا ناوەندەکاو ئەوروپاینە و قەرەباڵخیی ئاهەنگەکاو نەورۆزی، دەوڵەتو تورکیش هەراسانێ کەردێنێ".
کەجەدەکە-ئە ئەوەخوایش مکەرۆوە ئی هەوڵێ پەی تاقیکەردەیۆ سەبر و ئارامگێرتەی گەلو کوردی و گەنجاو کوردی، ڕا پای ماڵاییۆیرەی وەش مکەرۆ، هەرپاسە ئەرەیاونۆش پەی پاریزنای دەسکەوتەکاما نمەبۆ ڕا پەی هەوڵێ پرۆڤۆکاسیۆنی و داوایەکاو دەوڵەتو تورکی وەش بکەرمێ، ماچۆ: "با هیچ کەس نەبۆ بایسو تاوانبارکەردەی کۆشیا ڕەواکەیمانە. بانگەواز وەنەو گەل و ڕێکوزیا و مەجلیسەکاما مکەرمێ، وەراوەرو ڕووەدایەکا هەڵوێست نیشانە بدانێ و بێجگە جە ناڕەزایەتیی دیموکراتیکی پەنا نەبەرا وەرو هیچ ڕا و ڕێبازێوە تەری نییا.
هیچ هجوومێوە فاشیستی و نەژادپەرسی نمەتاوۆ ڕاگێر بۆ جە کۆشیای ڕەوا و ئازادیی گەلو کوردی، کۆشیای ڕەواما سەرگنۆ".
