کەجەدەکە_ئە دژو پیلانگێڵنیی مېیاننەتەوەیی ئەرەیاۋنێوەش وەڵا کەردۆ و ماچۆ: "ئازادیی جەسەیی ڕابەر ئاپۆی، گرنگیێوە ژیۋایش هەن. داوا جە گەلوو کوردی و دۆسەکاشا مکەرمۍ خاوەنداریێوە قەوەتتەر جە ڕابەر ئاپۆی بکەرا".
کۆنگرەو گلېرگەو دیموکراتیکی کورڎەسانیا ئەوروپای (کەجەدەکە_ئە) بۆنەو ساڵیاڎو پیلانگێڵنیی مېیاننەتەوەیی ٩ و تشرینو یووەمی ئەرەیاۋنێوەش وەڵاکەردۆ.
جە ئەرەیاۋناکەینە ئاماژە پانەی مکەرۆ کە چنی ئی ساڵیادەینە هەرێمەکە بە قۆناغێوە چارەنوویسسازەرە موییەرۆ، هەرپاسە دۆڵەتو تورکی بەردەواما جە ئەرەگیری و قڕکەردەی و جە ئیمراڵینە هیچ یاسێوە ڕەچاو نمەکریۆ و گۆشەگیریێوە قورس بەردەواما.
"٢٦ ساڵێن ئیمراڵینە ئەشکەنجە هەن"
جە ئەرەیاۋناکەینە ئاماژە پانەی مکەرۆ کە ڕابەر عەبدوڵا ئۆجالان پەی بەدیئاردەی ئازادی و یەکسانی پەی کوردی و چارەسەری پەرسو کوردی جە ڕاو گفتوگۆیۆ ٢٦ ساڵۍ چێوەڵی ئاما ئۆروپا، بەڵام وڵاتا ئۆروپای بەها مرۆڤایەتییەکێشا کەردۍ قوربانەو مەسڵەحەتە سیاسییەکاشا.
ماچۆ: "٢٦ ساڵێن ڕابەرایەتیما دوورگەو ئیمراڵینە جە کونجۍ تاکەکەسینە گۆشەگیریۍ سەختش سەرەرە سەپیان.
جە قسەکا سەرۆکوەزیرانی وەڵینو ئیتاڵیاینە، ماسیمۆ دی ئالێما، فرە ئاشکران کە سەرپەرشتیارو پیلانگێلنی مېیاننەتەوەیی ئەمریکان. جە ٧و تشرینی یووەم و ٢٠٢٤، دی ئالێما پەی میدیاکا ئاشکراش کەرد کە بیل کلینتۆن سەرۆکو ئەمریکای سەردایش کەردەن و پنەش واتەن "ئۆجالانی ڕادەسو تورکیای بکەرە". ئەمریکا پەشتیوانی جە گرڎو هرووژمەکا سەرو ڕابەر ئاپۆی و گەلوو کوردی مکەرۆ".
جە ئەرەیاۋناکەینە جەخت کریانۆ کە ۋەرپەرسی سەرەکی گۆشەگیری نایاسایی سەرو ڕابەرو گەلوو کوردی عەبدوڵا ئۆجالانی ئەمریکا و کۆنسەو ئەوروپای و سی پی تییا. هامپەیمانی فاشیستی ئاکەپە_مەهەپەی جە بێدەنگی هێز و ڕێکوزیا مېیاننەتەوەییەکا غیرەت هۆرگێرۆ و گۆشەگیریش سەرو تەمامو زیڼانەکا و گلېرگەیرە سەپنان.
"فیکرو ڕابەر ئاپۆی گەردوونی بیەنۆ"
کەجەدەکە_ئە ماچۆ: " مڎرامانو ڕابەر ئاپۆی ئیمراڵینە، ئا پارادایمەی کە پەرەش پنەدان و ئایدۆلۆجیاو ئازادیوازی ژەنا، بە گرڎو دنیێرە وەڵا بیەنۆ و بیەن بە گەردوونی. ئارۆ گرڎو دنیێنە ژەنا و گەل بە دروشمۊو "ژەنی، ژیۋای، ئازادی" دەسشا کەردەن بە گێڵای شۆنەو مافەکاشارە. ڕابەر ئاپۆ ئەرەکۊشای ئازادیی کورڎەسانیش جە ئاستو مېیاننەتەوەیینە ئشناسا".
هەرپاسە کەجەدەکە_ئە ئاماژە پانەی مکەرۆ کە دماو دەسپنەکەردەو هەڵمەتەو ئازادی جە ساڵەی ۋییەردێنە، داواو ئازادی جەسەیی ڕابەرو گەلوو کوردی عەبدوڵا ئۆجالانی، بیەن بە داوێوە گەردوونیە.
"ئازادی ڕابەر ئاپۆی گرنگیێوە ژیۋایش هەن پەی گەلوو کوردی"
کەجەدەکە_ئە ماچۆ: "چێرو ڕۆشنایی ئی حەقەتینە تاریخیەینە، تا گەلوو کوردی مەنەیۆ ۋێش پارێزنۆ و ئازاد بۆ، ئازادی جەسەیی ڕابەر ئاپۆی گرنگیێوە ژیۋایش هەن.
بە ملیۆنان کوردۍ ڕابەر ئاپۆی پېسە ڕابەرو ۋێشا قبوڵ مکەرا. پېسە چنی ماندێلا بی بە کرێڵو چارەسەری شکۆمەندانە و گفتووگۆو کێشەو ئەفریقای پانیشتی، عەبدوڵا ئۆجالان کرێڵو چارەسەری ئاشتیانە و دیموکراسیانەو پەرسو کوردین جە تورکیانە. ڕابەر ئاپۆ نوێنەرو ئەرەکۊشای دیموکراسی و ئازادیی گەلوو کوردین.
جە ٢٦ ەمین ساڵیادو پیلانگێڵنیی مېیاننەتەوەیینە، بانگەواز جە گەلەکەیما و دۆسەکاما و مرۆڤایەتی مکەرمۍ، خاوەنداریۍ قەوەتتەر جە ڕابەر ئاپۆی بکەرا و هەڵمەتەو مېیاننەتەوەیی کە ١٠ و تشرینو یووەمی کە پایۍ وزۆ ساڵەو دووەمیوە، بە گرڎو دنیێرە وەڵابکەراوە".
