کەجەدەکە-ئۆرووپا ئەرەیاۋناش گلېرۊبیەی گۊرەو ستراسبۆرگی جارێوەتەر ڕاسی ڕاپیماو گەلوو کوردیش سەرو ڕێبازو ڕابەر ئاپۆی نیشانەدا و دەسوەشیش جە دەیان هەزارکەسا بەشدار جە گگلېرۊبیەکەی کەرڎ.
پەیامەکەو کەجەدەکە-ئۊرووپای پی جۊرەنە:
"جە چوارچێوەو هەڵمەتەو 'ئازادی پەی ڕابەر ئاپۆی، چارەسەری سیاسی پەی پرسو کورد'ینە جە ئوسترالیا، کەنەدا و فرەو یاگا و ناوچۍ ئۊروپاینە، دەیان هەزار کەسۍ بە چالاکی پیلانگێڵنی مېیاننەتەوەیی ١٥و شوباتیشا جە ستراسبۆرگو فەرەنساینە شەرمەزار کەرد."
گەلی کۊششکارما بە سەرمەشقایەتی ژەنا و جوانا مېڎانەکەشا پەڕکەردۆ و بە یەک هەڵوێسی دروشمۊو "ئازادی پەی ڕابەر ئاپۆی، چارەسەری پەی پرسو کورد" یشا بەرزکەردۆ و ساڵیاڎو پیلانگێڵنی مېیاننەتەوەیی ١٥و شوباتی دژو ڕابەر ئاپۆی و ئا هێزا کە ١٠٠ ساڵێن سیاسەتو نکۆڵی، دلېنەبەردەی و کۆمکوژی دژو گەلوو کوردی ڕاوەبەر مکەرا شەرمەزار کەرڎ.
ڕابەر ئاپۆ هەنگامێوە تاریخیەش نیێنە و بە سەرنجەکاس کە کۆمکوژی دژو گەلوو کوردی دمایی پنە مارۆ و گەلاو ۋەرکۊتوو مېیامینی و تورکیای جە جەنگ و قەیرانۆ بەرەو ئاشتی و چارەسەری دیموکراتیکی بەرۆنە، بی بە هیواو ڕۊشنایی پەی گرڎ لێوە. تەنانەت وەڵۍ ئانەینە کە پەیامە تاریخیەکەیش ئەرەیاۋنۆ، کەمامەو ئا کەس و لایەناشە ماڵارە کە دژو دیموکراسی، ئاشتی و چارەسەری مرداوە.
گلېرۊبیە گۊرەکەو ستراسبۆرگی جارێوەتەر نیشانەشدا گەلوو کوردی بە یۊگێرتەیی سەرو ڕێبازو ڕابەر ئاپۆی بەردەواما جە ئەوەکۊشای. دەیان هەزار کەسۍ جە ستراسبۆرگنە دروشمۆو 'ئازادی پەی ڕابەر ئاپۆی، چارەسەری پەی پرسو کورد' یشا بەرز کەرڎۆ.
هەرپاسە دۆسا گەلوو کوردیچ مجیێرە مېڎانەکا و پەشتیوانی ئینتەرناسیۆنالیستەکا سەرو ئاستو جەهانینە نیشانە دریا. جە گرڎ شۆنۍ و مېیانێوە، جە ڕاپیمای و چالاکییەکانە، گەلاو ئۊروپای پێشوازیێوە گەرمشا جە ڕاپیماو ئازادی گەلوو کوردی و ئەوەکۊشایشا پەی ئازادی ڕابەر ئاپۆی کەرڎ.
بە دەیان هەزار کەسۍ دڵسۆزی و خاوەنداری ۋێشا جە پڕۆسەی تازەو ئازادیی و دیموکراتیکی ڕابەر ئاپۆینە کە بە ئیرادێوە بەهێز پەی سەروستە پڕۆسەکەی دەسپنەکەرڎەن، نیشانە دا کە مشۊم بەهێزتەر پەی ئازادی بەڎەنی ڕابەر ئاپۆی هەرمانە و ئەوەکۊشای بکەرمۍ.
هەرپاسە دوور نییا کە جە ئایندێوە نزیکەنە پڕۆسەو پیلانگێڵنی ٢٦ ساڵەی پەی هەمیشەی هۊرشێویۆوە و ئەوەکۊشای پەی ئازادی و دیموکراسی سەرگنۆ. چونکی ئا بەها گۊرۍ بەدەس ئامێنۍ و فکرەکۍ ڕابەر ئاپۆی ڕاما نیشانە مڎا و هیواما پنە بەخشا.
جارێوەتەر سوپاس و دەسوەشی جە گەلەکەیما، ژەنا و جوانا، ئەنجوومەن و فیدراسیۆن، ڕێکوزیاکا و گرڎو ئا کەسا مکەرمۍ کە بە ۋەرپرسیاریۆ فیداکاریشا کەرڎ، هەرپاسە سوپاسو گرڎو کارمەندا و دامودەزگا پەیوەندیدارەکا بەتایبەت شارەوانی ستراسبۆرگی مکەرمۍ کە جە لوایڕاوەو ڕاپیماکەینە هامکارێما بێنۍ."
