کەجەکە جە ئەرەیاۋنېوەنە کە ئاراسەو فەرمانڎەیی قەرارگەو ناوەنڎی پارېزناو گەلی و شەڕڤانا و فەرمانڎەکا هەپەگەی و یەژاستاریش کەرڎەن، بە مەڵامەت و چالاکییەکاشا جە دژۇ سوپاو تورکی ئەرەگیری جە زاپ، مەتینا و ئاڤاشین مبارەکبایش جە گرڎۇ فەرمانڎە و گەریلاکا کەرڎەن.

جە ئەرەیاوناکەو کەجەکەینە ئامان:

"جە ١٩ تەمووزو ٢٠٢٣ېوە گەریلاکۍ ئازاڎیی کورڎسانی بە چالاکی بەقوەت گورزۍ قورسېشا ئەو سوپاو تورکی ئەرەگیری ئەشېنۍ. بە تایبەتی چالاکیەکۍ جە زاپ، مەتینا و ئاڤاشین گورزێۋە گۊرېبېنۍ کە ۋەرو سوپاو تورکی ئەرەگیری کۊتۍ. بەمەڵامەت و ئا چالاکیاوە جە دڵ و گیانۊ مبارەکبایی کەرمۍ جە گەریلای و فەرمانڎەکا هەپەگەی و یەژاستاری، بەتایبەتی فەرمانڎە و شەڕڤانەکاما جە زاپ، مەتینا و ئاڤاشین، بەمەڵامەت و ئا چالاکییە گۊراوە سڵامشا ۋنەکەرمۍ. حەرپاسە مبارەکبایی چا هامڕایایچما کەرمۍ کە یاردیدەر و بەشڎارۍ بېنۍ جە چالاکییەکا ١٩، ٢٠ و ٢١ی تەمووزی. پی بۊنۊ ئێمە هەڵمەتە شۆڕشگێڵییەکا جەنگی خابور، گەشمەرڎە ساڤاش مەرەشی و هەڵۆکا زاگرۆسی و ئا چالاکیۍ جە چوارچێوەو ئا هەڵمەتانە ئەنجامدریېنۍ، سڵامشا ۋنەکەرمۍ و هیواو سەرکۊتەیشا پۍ وازمۍ.

پەیامو مبارەکبایی پۍ فەرمانڎەیی ناوەنڎیی نەپەگەی

فەرمانڎەی قەرارگەو ناوەنڎی پارېزناو گەلی (نەپەگە)ی جە ڕاو گورزئەشای و هەڵۋێسو گەریلای و قووڵی تاکتیکی و ستراتیجی گەریلایۊ، هێزەکۍ دوژمنی فاشیستی و ئەرەگیریشا پەرێشانۍ و بێچارۍ کەرڎۍ، بەرنامەو ئایشاشا پوچ کەرڎۊ. جە ڕاو ئا چالاکیاوە هەم گورز جە دوژمنی شنیان، هەمیچ بیەن بە سەرچەمەو هێزی و ورەی فرەی پۍ گەلۇ ۋڵاڎپارێزو کورڎسانی. چی روۊ، ئی چالاکیۍ هەم جە روو وەختی و هەم جە روو چوارچێوەیۊ فرە ماناڎارۍ بېنۍ. مبارەکبایی جە فەرمانڎەیی قەرارگەو ناوەنڎی پارېزناو گەلیما کەرمۍ، سڵام  و رێزو ۋېماشا ئاراسە کەرمۍ.

گەریلا جە گرڎ یاگېنە کورڎسانی پارېزنۊ

دەوڵەتو تورکی ئەرەگیری و قڕکەری جە ١٢و تەمووزینە جە دژۇ پانیشتو کورڎسانی پلانێۋە تازۍ ئەرەگیریش وستەگەڕ و بە تایبەتی جە هەرێمەکا زاپی و مەتینای دەسش بە هجومی ۋەرفروانی کەرڎ. ئا پلان و حۊلە تازۍ هجومی، جارێۋەتەر ئاشکراش کەرڎ کە دەوڵەتو تورکی کۆلۆنیالیستی و قڕکەری گەرەکشا تەمامو پانیشتوو کورڎسانی ئەرەگیرکەرۊ. گەریلا دژ بە حۊڵەکا ئی دماین ئۆپراسیۆنەو دەوڵەتو تورکی قڕکەری پۍ سەرو هەرێمەکا زاپی و مەتینای ئا چالاکیېشە ئەنجامدۍ. ۋەرو ئانەیچ ئی چالاکیۍ دلۍ مدرامانو گەریلاینە بە ماناو پارېزناو پانیشتوو کورڎسانیا جە دژۇ ئەرەگیری. مشۊم ئا راسیە بە دروسی ۋینیۊ و درکش پنەکریۊ. گەریلا جە گرڎ یاگېنە دەسکۊتەکا گەلۇ کورڎی و کورڎسانی پارېزنۊ، بۊنەو ئانەیۊ گژیۊ و ۋېڕاگری مکەرۊ. مشۊم نیشتمانپەروەر و ۋڵاڎپارێزۍ خۊتانکەرڎەی چی مدرامانەو گەریلای کەرا و دژ بە خەتەو خیانەتی و داردەسی کە ئینا چنی دوژمنی و خزمەت بە کۊکوشکەرڎەی کورڎا کەرۊ، هەڵوێسی بەقوەت نیشانە بڎا. ئینە شەرتېۋە ۋڵاڎپارێزییا. پارېزناو کورڎسانی، ئازاڎیی ئاڎی و یۊبیەی نەتەوەیی کورڎسانی پی هەڵۋێسە ۋڵاڎپارێزییە بۊ.

وەعدو ۋېما پۍ سەرکۊتەی واوەی کەرمېۋە

گەریلا بە ستراتیج و تاکتیک و ئاستی گیانبازی ئاپۆیی ۋېشا پنەیاۋنان، ئانەش سەلمنان کە مەبەزیۊ و شکس نمارۊ و پا چالاکیە گۊرا جارێۋەتەر ئانەش وستەن ڕۋە کە جە گرڎ ئاژېۋەنە کورڎسانی پارېزنۊ و ماناڎارتەرین پراکتیکی وەفاڎاری پۍ گەشمەرڎا نیشانە مڎۊ. ئینە هەڵۋێسێۋە شکۆمەنڎانەن، ماناڎارو لایەق بە وەسفو سەنایا.

ئێمە جارێۋەتەر ئا هەڵوێسیە بەرزنرخنمۍ، بۆنەو ئا چالاکییە سەرکەوتاوە مبارەکبایی جە گرڎو فەرمانڎە و شەڕڤانا هەپەگەی و یەژاستاری کەرمۍ و سڵام و رێزشا پۍ کیانمۍ. جە کەسایەتی گەشمەرڎا زاپی، مەتینای و خواکورکینە گرڎو گەشمەرڎا ئاخېزی و دیموکراسی بە رێز و پنەزانایۊ ۋیرمارمېۋە، ئا وەعدەی واوەی کەرمېۋە کە بە گەشمەرڎاما دان".

هـ . ش