هامسەرۆکایەتیی کۆنسەو ڕاوەبەریی کەجەکەی ئەرەیاوناێوەش وەڵا کەردۆ و سڵامش وەنەو "نەورۆزی حەرە بەشکۆو ساڵاو دمایی" کەرد و پەیامی فرە ڕۆشنو نەورۆزی، داوا پەی ئازادیی ڕابەرو گەلو کوردی عەبدوڵا ئۆجالانی بێ.

ئەرەیاونایەکەو کەجەکەی ئینەنە:  

"نەورۆزو ٢٠٢٤ بی بە یۆ جە نەورۆزە حەرە شکۆدارەکاو ئی سالاو دمایە، گەلو کوردی جە گرد لاێوە کوردستانیوە و بەرو وەڵاتیوە، حەریاگێونە، کە هەن بە ملوێنا کەسێ لوێ  مەیدانەکا و جەژنەو نەورۆزیشا  بە جۆشێوە فرەوە مەبارەکە کەردە؛ داواسا پەی ژیواێوە ئازادی و دیموکراتیکی و هەڵوێستی قەوەتوو وێشا چا بوارەنە نیشانە دا. جە سەرحەدۆ تا بۆتان، کەناراوەکاو دیجلە، فورات و زاپی؛ ئامەدۆ تا وەرنیشت، شەهبا، جزیرە و کۆبانێ، پانیشت تا  وەرکەوت سنە، مەریوان، ماکویە و چایچۆ تا بەرو  وەڵاتی، گرد یاگێوەنە نەورۆز بە بەشداریێوە گەورەو و بەشکۆوە مەبارەک مکریۆ. نەورۆزو ئامەدیچ یاوا ئاستی حەرە باڵا. سڵام جە هەڵوێستو ئازادی و مدرامانو ملوێنا ئینسانا مکەرمێ. سوپاسو گەلی مکەرمێ کە بە یەک دڵ و بە گۆرانییەکاو ئازادیی، بە زەماوندەکاشا مەیدانەکێشا گێرتێ و نەورۆزشا بە ماناو وێشۆ مەبارەک کەرد. باوڕما پاسەن ئاستو باڵاکەردەی نەورۆزی چا یاگانە نەورۆزشا دلێنە بەردەواما زیاتەر بەرزتەرێ با. پی بۆنەوە جارێوە تەر نەورۆز وەنەو گەلو کوردستانی وەڵاتپارێزنی مەبارەک مکەرمێ. بەتایبەت نەورۆز جە ژەنا مەبارەک مکەرمێ، کە بە دڵوازیی وێشاوە پەی ئازادیی ڕەنگەشا دا بە مەیدانەکا، بە بییەی و کۆشیایشا ژیوایشا ئازاد و مانادار کەردۆ. پی بۆنەوە نەورۆز بەتایبەت جە ئەدایاو کوردی مدرامانکەری مەبارەک مکەرمێ و سڵام و ڕێزو وێما پێشکەششا مکەرمێ.

پەیامەکاو گەلو کوردی نەورۆزنە، نیشانەشا دا مشۆم ئی ڕاسییە بزانییۆ، گرد کەسێوە  بەڕاسی جە وێش پەرسۆوە و پێسە نزیکو گەلو کوردی بۆوە. ئانێ وەنەپەرسایۆی خراپ کەرا ئی هەڵوێست و ئیرادەیەو ملوێنا ئینسانا وەراوەرو وێشانە مویناوە. یۆ جە پەیامە حەرە گرنگەکاو نەورۆزو ٢٠٢٤ ئینە بێ؛ گەلو کوردی نیشانەش دا، کە فشار نکۆڵیکەردەی، دلێنەبەردەی و قڕکەردەی بێ دەرەنجام بۆ، گەلو کوردی کۆشیای و مدرامانو وێش دژوو ئی سەپنایە قەوەتتەر مکەرۆ و بەردەوام بۆ. پەوکای نەورۆزو ٢٠٢٤ بی بە جوابێوە  قەوەت وەراوەرو سیاسەتە قڕکەرەکاو دەسەڵاتداریی ئاکەپە-مەهەپەی فاشیستینە کە دژومنو کوردان. ئەرەیاوناش کە ئی سیاسەتە بێئەنجام مەنۆوە.

دوژمنایەتیی دەسەڵاتداریی ئاکەپە-مەهەپەی پەی کوردا، سیاسەت و ویرکەردەیۆی فاشیست، نەژادپەرسی و نەتەوەپەرسیی تورکیاش بەرەو کارەساتی بەردەن. دەسەڵاتدارێتیی ئاکەپە-مەهەپە گرد ڕوێ ئینەیە زیاتەر قووڵ مکەرۆوە. ئیرادەو گەلو کوردی نەورۆزنە نیشانەش دا، دژو فاشیزمو ئاکەپە-مەهەپەی کە تورکیاش بەرەو کارەسات بەردەن، بی بە هەڵوێستێوە قەوەت. ئی هەڵوێستە هەڵوێستێوە ژیواین پێوە، بە پەشتیوانیی گەلاوە و سەروو بناغەو دیموکراتیزەکەردەی تورکیای و ڕزگارکەردەیشا جە کارەساتی، نەورۆز پیلانەو ئا هێزاشە خراپ کەردە، کە شۆنەو چارەسەرو یاگە جیاوازەکارە مگێڵانێ، چارەسەر جە قڕکەردەینە مویناوە، نەورۆز نیشانەش دا کە پیلانەی غەڵەتە ئامەدنە سەر مەگێرۆ، نەورۆزو ئامەدی ئا پەیامەش دا، ئەنجامێوە پاسنەش خولقنا، پەوکای مشۆم نەورۆزو ئامەدی بە ڕاسی بیاومێشنە، ئێمە بە تایبەت نەورۆزو ئامەدی مەبارەک مکەرمێ، سڵام وەنەو گردو ئا کەسا مکەرمێ، کە بەشدارییشا کەردەن نەورۆزو ئامەدینە.

نەورۆزو ٢٠٢٤ کۆشیای ئازادیی گەلو کوردیش یاونا ئاستێوە باڵا، نیشانەش دا کە ساڵەو ٢٠٢٤ بۆ بە ساڵەو سەرکەوتەی، ئاستی تەکنیکی و تەکتیکی گەریلای مۆڕاڵێوە بێوێنەش بە گەلەکەیما بەخشا، پاسەش کەرد، کە نەورۆز بە جۆشۆ و بەقەوەتی مەبارەک بکریۆ، نەورۆزنە کۆشیای گەل و گەریلای یۆترینشا تەمامنا، بنکەو سەرکەوتەیش نیارە، جارێوە تەر بە تینەو ئایرو نەورۆزیوە جەژنەی نەتەوەییەو گەلەکەیما مەبارەک مکەرمێ."