پەیاموو هامسەرۆکایەتی دەسەی ڕاوەبەری کەجەکەی پی جۆرەنە:

"ئاگاڎارکریایمۍ کە هەڤاڵی بەنرخما، شۆڕشگێڵن و وڵاتپارێز نەجمەدین سالاز گیانش جە دەسدان. هەواڵێوە بە ئېش بۍ پۍ ئێمە و گەلوو کوردسانی. ماوېوە فرە بۍ کە هەڤاڵ نەجمەدین قۊرتەی قورسەو تەندروستیش بۍ. بەڵام ئاڎ نەوەشیەکەش پېسە ئاستەنگ و لەمپەرېوە ۋەروودەم و کۊشیای و خەباتوو ۋېشەنە نەۋینا و تا دما هەناسەش درێژەش بە کۊشیای ۋېشدا. تەماموو ژیۋای هەڤاڵ نەجمەدینی بە کۊشیایرە ۋیەرڎ. گەشمەرڎېوە بەنرخوو ئی کۊشیاو کوردسانەینە. پەنەوازەن گەلوو کوردسانی و بە تایبەت گەلوو وانی وڵاتپارێزی بەشێۋېوە وەرچەم خۊتانکەرڎەی چی گەشمەرڎە بەنرخەیە کەرا. پېسە جمیەری و گەلی ئەرکی سەرەکی ئێمەن کە یاڎوو هەڤاڵ نەجمەدینی بە زینڎەیی ڕاگېرمۍ و کۊشیای ئازاڎیی کە ئاڎ گرڎوو ژیۋایش بۊنەشۊ بەخت کەرڎەن، بە شێۋېوە بەقوتتەر بەرمۍ ڕاوە. ئا وەعدەی کە بە گرڎوو گەشمەرڎا ئاخېزی و دیموکراسیما دان، جارێوەتەر جە کەسایەتی هەڤاڵ نەجمەدینینە واوەیش کەرمېوە.

گرڎوو ژیۋایش پەی ئازاڎیی کوردسانی بۍ

هەڤاڵ نەجمەدین سالاز کە جە لایەنوو گەلی وڵاتپارێزی و رای گرڎی کوردسانیوە جە نزیکۊ ئشناسیۍ، شۆڕشگێڵنېوە گەورەبۍ کە گرڎوو ژیۋای ۋېش پەی ئازاڎیی کوردسانی، دمایی ئارڎەی بە سیستمی ستەمکاری، پۍ ئازاڎیی و یەکسانی بەخت کەرڎ و پەی ئانەیچ بێ وچان کۊشیا. جە عمری گەنجیوە تا ئا ساتەی گیانش جە دەسدا بە دڵ و مەژگ و ۋېش بی ببە خەباتکارێوە نەبڕیاوەو دۆزەکەی. جگە جە کەسایەتیە کۊششکارەکەیش، ڕشدبیەیۊ و پەیجوریش سەروو ئەندێشەی بۍ. چنڎین ۋەرهەمۍ رۆشنۋیری و وێژەییش هەنۍ. جەۋەرهەمەکاشەنە وەختۍ راسی ۋېش و تاریخوو ئشناسای گلېرگەو کورڎی کە چنەشەنە و پەی ئازاڎیی ئاڎی کۊشیۊ، جە بنەڕەتەنە ئاژەو گەلوو کورڎی و حۊڵەکا بەرکۊتەیش گېڵنۊوە. ۋەروو ئانەی جە چەقوو کۊشیاینە بی بە خۊتان هەڵوێستېوە ئاخېزی و سڵش جە حیچ قوربانیدایۍ نە کەرڎەبېوە. پېسە فرېوە جە شۆڕشگێڵنا، هامڕا نەجمەدینیچ جە هوشیاربیەیۊ نەتەوەیی گەلوو کورڎی و دەسپنەکەرڎەی کۊشیای جە دژوو کۆلۆنیالیزمینە رەنجێوە فرەش کێشا. دماو کودەتاو ١٢و ئەیلول و ١٩٨٠ ی زینڎانی کریاو جە زینڎانی ئامەڎینە کە بی بە قەڵاو ئەشکەنجەی و ستەمی راگیریا. چا کادرەکۍ جمیەری ئازاڎیی کورڎیش ئشناسۍ و سەروو بنەماو خەتەو ئازاڎیی جە ماوەکا دماتەرینە درێژەش بە کۊشیای دا.

پەڕ جە قینۍ و بێزاریبۍ ۋەران ۋەر بە خیانەتی و داردەسەیی

بە مەڵامەتوو فشارەکا دەوڵەتوو تورکیوە ڕووەش کەرڎە پانیشتوو کوردسانی و چا درێژەش بە کۊشیاکەیش دا. پېسە مزانیۊ جە پانیشتوو کوردسانی قورسایی هەرمانەکاش تەرخان کەرڎ پۍ هەرمانەی رۆنامەوانی. دلۍ خەباتەکاشەنە ئا پەرسەی کە فرەتەرین جەختش سەر کەرېوە، کۊشیای بۍ دژوو خەتەو داردەسەیی و خیانەتی. هامڕا نەجمەدین جە ۋەران ۋەروو خەتەو هامکاری و خیانەتکاری فرە توڕە بۍ. بایەخێوە فرە دۍ بە پاشەکشەپنەکەرڎی بە خەتەو هامکاری و خیانەتی جە کوردسان و جە ۋەران ۋەروو ئانەینە گرینگی دۍ بە پەرەئەسای خەتەو وڵاتپارێزی. دلۍ گرڎوو  کار و خەباتەکاشەنە ئینە بۍ. جە لایۍ تەرۊ پۍ ماوېوە فرەی چنی گەشمەرڎە سەید ئەڤرانی هەرمانەشا کەرڎېنە. گەشمەرڎە بیەو سەید ئەڤرانی کاریگەریېوە فرەش سەر وەش کەرڎ. وەختۍ کە قۊرتە تەندروستییەکېش زیاڎۍ بیۍ، داواش ۋنە کریا کە بڕۍ ئیسراحەت کەرۊ و پۍ ماۋېوە جە هەرمانەو ڕۆنامەوانی دوور گنۊوە، ئاڎیچ ۋاتش کە گەرەکشا تا ئا وەختەی هەناسە مڎۊ هەرمانە کەرۊ و حەر پا جۊرەیچ هەرمانەش کەرڎە. ئا هەڵوێستشە بە نرخ  بۍ و شایەنوو ڕێزی بۍ. جە دەسدای ئینسانۍ پاسە کۊششکاری، ڕۆشنۋیرێوە شۆڕشگێڵ، جە ڕادەبەدەر ئێمەش دڵتەنگ کەرڎ. پرسە و سەرەوەشی ۋېما ئاراسەو گەلی وڵاوتپارێزوو کوردسانی، گەلوو وانی، خانەواڎە و کەسوکاری بەنرخوو گەشمەرڎەی ئەرەیاۋنمۍ.

هەڤال نەجمەدین سالاز وەڵۍ گەشمەرڎەبیەیش باسوو وردبینیەکاش پۍ تەڤگەرەکەیما کەرڎ. وردبینیەکېش سەبارەڎ بە ڕابەر ئاپۆی بۍ. هەم سەرش ورد بیەبېوە، هەمیچ بڕۍ پێشنیارېش کەرڎۍ بېنۍ. بۊنەو یاڎوو بەنرخوو ئاڎیوە، جابەجێکەرڎەی ئا پێشنیارا، بە بنەما گېرمۍ".