کەجەکە دەسنیشانش کەرد کە مدرمانوو گەلوو وانی ئاخێزێوەن و ئەرەیاۋناش، "گەلوو وانی بە شێوۍ تازەو سەرهۊردای کە بە تەمامەتی بە هوشیاری، ئیراڎە و دینامیکی سیاسی ۋێشۆ وەڵێش وست، جە کۊشیای ئازاڎیی کوردسانینە دەسشا بە قۆناغێوە تازەی کەردەن".
هامسەرۆکایەتی دەسەو ڕاوەبەری کەجەکەی سەبارەڎ بە حۊڵدای پەی زەوتکەردەی ئیراڎەو وانی ئەرەیاۋنێوەش وەڵاکەردۆ.
کەجەکە ئەرەیاۋناش، "دەسەڵاتداری فاشیستوو ئاکەپە-مەهەپەی کە شکسوو ۋێش قبوڵ نەکەرد، حۊڵشدا ئیرادەو گەلوو وانی زەوت بکەرۆ. ئا حۊڵە جە ئەنجاموو مدرامانینە ئاستەنگ کریان و پوچ کریانۆ. ئا مدرامان و سەرکۆتە تاریخیەی وانەنە یاوا ئاکام، بەرەنجاموو یۊگێرتەی و ڕەنجوو گرڎوو گەلا تورکیای بۍ. سڵام چا مدرامانە گەورە، ماناڎارە تاریخیەو گەلا مکەرمۍ و پیرۆزش مکەرمۍ. فرەو مەنتیقا تورکیاینە بە تایبەتی جە شارەکا کوردانە پەی پەشتیوانی گەلوو وانی چالاکیۍ ئەنجامدریۍ و جە دژوو زەوتکەردەی ئیرادەی جە تەرەفوو دەسەڵاتوو ئاکەپە-مەهەپەیۆ گرڎوو گەلا تورکیای و هێزە دیموکراسیەکاوە هەڵوێسێوە فرە ماناڎار نیشانەدریا. ئا هەڵوێسە ماناڎارەو گەلا و هێزە دیموکراسیەکا جە دژوو زەوتکەردەی ئیرادەی، گەلێش جە یۊترینی نزیک کەردێوە، هەستوو ژیۋای هامبەشی و بواروو کۊشیایش بەقوەت کەردەن. سەرکەتەکەو وانی سەرکەوتەی حەقەتینەو دیموکراسیا. جە دژوو حۊڵەکا دەسەڵاڎداری ئاکەپە-مەهەپەی پۍ بە ئەرەمەرزیا کەردەو فاشیزمی، ئا هەڵوێسە دیموکراتیکەی جە تەرەفوو گەلاوە نیشانەدریا، ڕاش ۋەروو دەم و دیموکراتیکبیەو تورکیاینە کەردۆ؛ نیشانەشدا کە بە مدرامان و کۊشیای هامبەشوو گەلا جە دژوو فاشیزمی، تاڵانی و دزی متاویۆ ئەنجام بەدەسبۍ. چی مەعنێنە وەڵێکۊتەیۍ یەکجار تاریخی و ماناڎارا".
وانەنە تەماموو تورکیای رزگارکریا
جە ئەرەیاۋناکەو کەجەکەینە ئامان، "بە شێوێوە ئاشکرا ئانە وزیا ڕووە کە سیاسەتوو دەسەڵاڎداری ئاکەپە-مەهەپەی سەروو بنەماو دوژمنایەتی ۋەرا ۋەر بە کوردا بە چ شێوێوە تورکیاش گیرۆدەو قەیرانۍ کەردەن و بەرەو کارەساتش بەردەن" و پی جۆرە درێژەش پنەدان، "دەسەڵاڎداری ئاکەپە-مەهەپەی نەک هەر ستەم جە گەلوو کوردی مکەرۆ، جە هەمان وەختەنە خراپەکاری ۋەراۋەر بە تەماموو تورکیای و گەلا تورکیای مکەرۆ. رەنج، مانیایی، سەرچەمەکا و بەهاکا تورکیای تاڵان مکەرۆ، گلێرگەی بە فشاری فاشیستی چەوەسنۆوە و بەرەو ئاورای و هەژاریشا بەرۆ. داواکارییەکۍ گلێرگەی پەی ئازاڎیی، دیموکراسی، دادپەروەری، ژیۋایۍ مافڎاری و شکۆداری بە تەمامی سەرکوت مکەرۆ و حۊڵ مڎۆ تورکیانە رژێمێوە کۆلۆنیالیستی فاشیستی رەها ئەرەمەرزنۆ. بە شێوێوە ئاشکرا گرڎ ڕووۍ هەڕەشۍ جە کوردا مکەرۆ، گلێرگەی پارچەپارچە کەرۆ، حۊڵ مڎۆ گرڎ کەسی بکەرۆ بە دوژمنوو کوردا و گەلا بکەرۆ بە دوژمنوو یۊی و دۊشا گژۍ یۊترینیرە. ۋەرا ۋەر بە گولانەتەرین داواکاری دیموکراتیکیچ دڎان مەگێرۆ ۋێشەرە، چێروو نامۍ ۋەرەنگاربیەیۆ کوردانە تورکیاش جە دیموکراسی و ئازاڎیی ماڵانەرە و ئاینڎەو تورکیای دزۆ. گەلوو کوردی، گەلوو تورکی و گەلا تەروو تورکیای رووبەڕوو فشاری، کۆلۆنیالیزمی و ئا ئەقڵیەتە نەژاڎپەرست، فاشیست، دماکەوتە، دز و تاڵانکارەیە بیێوە. کۊشیای گەلا جە دژوو ئی ستەمە، تاڵانکارییەیە جە بنەڕەتەنە هامبەشا. گەلوو کوردی دژوو نکۆڵی، نەژاڎپەرسی و فاشیزمی کۊشیای ئازاڎیی و دیموکراسی مکەرۆ. چارەسەری پرسوو ۋێش جە دیموکراتیکبیەو تورکیاینە موینۆوە و پەی ئانەی کۊشیۆ. دیموکراتیکبیەو تورکیای تەنیا داواو گەلوو کوردی نییا، داوێوە هامبەشەو گرڎوو گەلا تورکیاین. ئانە بە بەقوەتی وانەنە بە کردەیی بی، ئیرادەو تەماموو تورکیای رزگاربی. ئانەی مدرامانەکەو وانی گەورە و ماناڎار کەرۆ ئا تایبەتمەندیەشەنە. ئانە وەڵێکۊتەیۍ فرە گرنگا و مایۍ دڵوەشینە".
جە یۊدایەکۍ فاشیزمی سەرشا نەگێرت، مدرامانوو گەلا جە یۊدایەکۍ ئاڎیشاش تێکدۍ
جە ئەرەیاۋناکەو کەجەکەینە ئی خاڵۍ وزیێنۍ ڕووە؛
"هۊرچنیە دلێینەییەکۍ ٣١و ئاداری جە تورکیانە ئاژێوە تازەش ئارد ئاراوە. فشار و فرت و فێڵ ئەنجامش نەگێرت و فاشیزموو ئاکەپە-مەهەپەی مەڕیا. ئانەی سەرکەوت گەل و هێزە دیموکراتیکەکێنۍ. دەسەڵاڎداری ئاکەپە-مەهەپەی نەتاواش ئا شکسە تاریخیە قبوڵ بکەرۆ، بە پیلانگێڵنیی تازە حۊڵشدا ئیرادەو گەلا زەوت بکەرۆ. هەم جە کوردسان و هەمیچ جە فرەو مەنتیقا تورکیاینە پەناش پۍ فرت و فێڵ و پیلانگێڵنی بەرد. بەڵام گەلا هەم جە تورکیا و هەمیچ جە کوردسانەنە جە دژوو ئا پیلانگێڵنیاو ئاکەپە-مەهەپە هەڵوێسی ڕۊشنشا نیشانەدا. ئا هەڵوێسۍ جە ۋەرکەوتوو تورکیای و کوردسانینە ئامۍ ئاراوە فرە گرنگێنۍ، گرڎ بە ئامانجوو مسۆگەرکەردەی دیموکراسینۍ. مدرامانەکە و وانیچ پا ئامانجۆ ئەنجامدریا و بە سەرکۊتەو ئا مدرامانا جە سەرانسەروو تورکیاینە دژوو پیلانگێڵنیەکا وەڵۍ وزیێبێنۍ، بەقوەتتەر کریۍ. دەسەڵاڎداری ئاکەپە-مەهەپەی پلانەش نیێبێرە کە ئیرادەو گەلوو وانی زەوت بکەرۆ و جە گرڎوو کوردسانی و تورکیاینە دەس سەروو ئیرادەو گەلیرە گێرۆ. ئەگەر وانەنە سەرکۊتۍ، هەنگام بە هەنگام جە کوردسان و تورکیانە جابەجێش کەرۍ. بەڵام ئا جە یۊدایۆ و فاشیزمی سەرش نەگێرت و یۊگێرتەی و مدرامانوو گەلا ئا جە یۆدایشۆ پوچ کەردۆ.
گەلوو وانی بە شێوازی تازەو سەرهۊردای قۆناغێوە تازێش دەسپنەکەردە
بێگومان گەلوو وانی جە ناوەندوو مدرامانەکەینە یاگێش گرتە. گەلوو وانی مدرامانێوە بێهامتاش گێرتەنە ۋەر و گورزەی گۊرێش ۋنەو فاشیزمی شانا. مدرامانوو گەلوو وانی کە جە ٢ۍ نیسانینە دەسشپنەکەرد و جە ٣ۍ نیسانینە بەسەرکەوتەی یاوا ئەنجام، ئاخێزێوەن. گەلوو وانی، بە شێوەی تازەو سەرهۊردای کە بە تەمامەتی بە هوشیاری، ئیراڎە و دینامیکی سیاسی ۋێش وەڵۍ وزیا، جە کۊشیای ئازاڎیی کوردسانینە دەسش بە قۆناغێوە تازەی کەردەن. مبارەکبایی و سڵام ئاراسەو ئا مدرامان و ئاخێزە بێ هامتایەو گەلوو وانی مکەرمۍ و رێزوو ۋێماشا پێشکەش مکەرمۍ. هاموەخت سەرەڕاو گەلوو وانی سڵام و مبارەکبایی ئاراسەو گرڎوو گەلوو کوردی مکەرمۍ، کە جە گرڎوو شارەکا کوردسانینە پۍ پەشتیوانی جە گەلوو وانی مدرامانشا کەرد. حەرپاسە بە تایبەتی مبارەکبایی جە ژەنا و گەنجا مکەرمۍ کە سەرمەشقی مدرامانیشا کەرد.
پەنەوازەن عالتەر مردای سەروو ئا سەرکۊتەیە بکریۆ کە جە ٣ۍ نیسانینە بەدەسئاما. ئا قۆناغەی ئێمە پۊرەشەرە ویەرمۍ، ئانەی موازۆ کە هێزە دیموکراتیکەکۍ زیاتەر یۊبیەی ۋێشا وەڵۍ وزا. ئانە گرنگتەرین ئەنجاما کە جە سەرکۊتەکەو ٣ۍ نیسانینە بەدەسبۍ. ۋەروو ئانەی ئا سەرکەوتەیە دژوو فاشیزمی ئەنجاموو کۊشیای هامبەشی و یۊگێرتانەی بۍ. ماڕای تەمامەتی ئەقڵیەتی فاشیستی نەژاڎپەرسی، دماکۊتەی، دزی، تاڵانکاری و وەڵۍ وستەی دیموکراتیککەردەی تورکیای تەنیا بە زیاتەر بەقوەتکەردەی کۊشیای هامبەشی و یەکڕیزیی متاوۆ بێنە دی. وانەنە ئا ڕۍ کریاوە و هەنگامەی یووەمەش نریا. ئانەی مشۊم ئەنجام بڎریۆ، گەورەکەردەی ئانەینە. پا هیوا و قەناعەتۆ، ئێمە داوا جە گەلا و هێزە دیموکراتیکەکا مکەرمۍ کە یۊبیەی ۋێشا بەقوەت بکەرا".
