کەجەکە ئانەش وست ڕووە کە گەلوو کوردی جە هۊرچنیەینە دژوو گۆشەگیریی ئیمراڵی، رژێموو قەیومی، سیاسەتوو نکۆڵی و قرکەردەی دەسەڵاڎداری ئاکەپە-مەهەپەی هەڵوێسی ڕۊشنش نیشانەدان و ئەرەیاۋناش، "مشۊم ئا هەڵوێسەو گەلوو کوردی بوینیۆ و ۋەرووچەما بگیریۆ".
هامسەرۆکایەتی دەسەو ڕاوەبەری کەجەکەی سەبارەڎ بە ئەنجامەکاو هۊرچنیەی ٣١و ئاداری جە تورکیا و کوردسانەنە، ئەرەیاۋنێوەش وەڵاکەردۆ. کەجەکە بۊنەو بەدەسئاردەی ئا سەرکۊتە تاریخیەی کە جە هۊرچنیەی دلێینەینەبەدەس ئاما مبارەکبایش جە گەلوو کوردی کەرد و ئەرەیاۋناش، کە مشۆم گرڎ لێوە هەڵوێسوو گەلوو کوردی، دەوروو ئا سەرکۊتەیە تاریخیە بوینا و بە عالی چنەش بیاوانە.
ئەرەیاۋناکەو هامسەرۆکایەتی دەسەو ڕاوەبەری کەجەکەی پی جۆرەنە:
"جە هۊرچنیە دلێینەییەکا ٣١و ئاداروو ٢٠٢٤ینە جە سەرنیشتوو کوردسانی و تورکیاینە گەلەکەما ئیرادەو ۋێش نیشانەدا و سەرکۊتەیۍ فرە گرنگ و تاریخیش بەدەسئارد. ۋەروو ئا سەرکۊتەیە تاریخیە، مبارەکبایش جە گرڎوو گەلوو کوردسانی، بەتایبەتی گەلەکەیما جە سەرنیشتوو کوردسانی مکەرمۍ.
ئا سەرکۊتەیە کە گەلوو سەرنیشتوو کوردسانی بە دەسشئارد تەماموو پارچەکا تەروو کوردسانیش دڵوەشۍ کەردۍ، گرڎوو گەلوو کوردسانی پا سەرکۊتەیە سەربەرزێنۍ. سەرکۊتەیۍ تاریخی جە هۊرچنیە دلێینەییەکا ٣١و ئادارینە جە کۊشیای ئازاڎیی گەلوو کوردینە یاگێوە گۊرێش گرتێنە و کۊشیای ئازاڎیی گەلوو کوردیش بەقوەتکەردەن. بێگومان چی قۆناغێنە دەور و هامکاری ئانیشا شانەشا دان ۋەروو باروو ۋەرپرسیاریی و رەنجشا کێشا، پۍ ئا ئەنجامە تاریخیەیە یەکلاکەرەوە بیەن. گرڎما دی کە رەنجێوە بێهامتا دریا. ۋێش جە ۋێشەنە گەلەکەما ئەنجامێوە تاریخیش هۊرگێرت و پی جۆرە گرڎ لایۍ بە عالی جوابوو ئا رەنجەیشا داوە. ئێمەیچ مبارەکبایی چا هەڤاڵا مکەرمۍ. حەرپاسە مبارەکبایی جە ئەڎایا کوردی، گەنجا و ژەنا مکەرمۍ. ئەڎایا کوردی جە ڕاو چالاکییەکاو پەشتیوانی جە زینڎانیا ویژدانوو گلێرگەیشا هوشیار کەردۆ و وستشا دلۍ جموجوڵیوە. پێسە ویژدانوو گلێرگەی دەوروو ۋێشا یاگۍ یاونا. چا ئەنجاما کە هۊرگیریێنۍ، ئا دەورە تاریخیەو ئەڎایا بیەن بە خاوەن پێگێوە گرنگ. بە رێزۆ سڵامشا ۋنەکەرمۍ. حەرپاسە پەی سەرکەوتەی تاریخی کە بە دەسئامان، هەڵوێسوو ژەنا و گەنجا پۍ وەڵێکۊتەی و پارێزناو کۆڵەکەکاو ئازاڎیی، بیەن بە خاوەن پێگێوە گرنگ. هەڵوێسوو ژەنا و گەنجا گەمەکۍ ناوەندەکاو جەنگی تایبەتیش پوچۍ کەردۍ، بی بە مایۍ ئانەی فەلسەفەو ژیۋای ئازاڎیی ئێمە سەروو بنەماو ئازاڎیی ژەنۍ سەرگنۆ. چا ڕوۆ ئێمە سڵام پێشکەش بە گرڎوو ژەنا و گەنجا مکەرمۍ و مبارەکبایشا ۋنە مکەرمۍ.
کوردسان ڕاش بە فاشیزموو ئاکەپە-مەهەپەی نەڎا
جە هۊرچنیەو دلێینەی ٣١و ئادارینە گەلەکەما جە دژوو گۆشەگیری سەروو رابەر ئاپۆی، رژێموو قەیوومی کە ئیرادەو گەلوو کوردیش زەوت کەردەن، سیاسەتوو نکۆڵی و قڕکەردەی دەسەڵاڎداری ئاکەپە-مەهەپەی هەڵوێسێوە ڕۊشنش نیشانەدا. ئیراڎەو گەورەو نەورۆزی جە هۊرچنیەو دلێینەی ٣١و ئاداریچەنە نیشانەدریا، گەلوو کوردی واتش کە گۆشەگیری و فاشیزم ڕاشا مەبۆوە و بەقوەتتەرین جوابشا داوە. کوردسان ڕاش بە فاشیزموو ئاکەپە-مەهەپەی نەڎا. فاشیزموو ئاکەپە-مەهەپەی کە ٩ ساڵێن مەتاوۆ سەرە بە گەلوو کوردی بنامنۆرە، گەلوو کوردی جە رابەر ئاپۆی و هەڵوێسوو ئازاڎیی بڕۊرە و گلێرگەو تورکیای بکەرۆ بە دوژمنوو کوردا، جە گلێرگەو تورکیایچەنە زلـلێوە تاریخیەش وەرکۊتە و بەرەو هۊروێڵیای ورش وێڵناوە. ئا خەتەو کۊشیای هامبەشی و یۊبیەی دیموکراتیکی گەلوو کوردی، سەرکەوتە کە چنی گەلاو تورکیای و هێزە دیموکراتیکەکا وەڵێش وست. ئا سەرکۊتە تاریخیەی جە هۊرچنیە دلێینەییەکا ٣١و ئادارینە بەدەسئاما، وەڵێکۊتەی هۆشمەندی نەتەوەی دیموکراتیکی بەربڕۆ. ئەقڵیەتی فاشیستی نەتەوە-دەوڵەتپەرسی شکسش ئاردەن و هوشیاری نەتەوەی دیموکراتیک کە گوزارش جە واڵەو-برایەتی گەلا و ژیۋای هامبەشی مکەرۆ، سەرکۊتەن. حەرپۊکەی ئا سەرکەوتە تاریخیە، سەرکەوتەی کۊشیای هامبەشین کە گەلوو کوردی و گەلاو تورکیای ئا کۊشیا هامبەشەی بە ئەقڵیەتوو نەتەوەی دیموکراتیکی پێوەرە وەڵێشا وست. ئا کۊشیا هامبەشەو گەلوو کوردی، گەلاو تورکیای، ژەنا، هێزە سۆسیالیست و دیموکراتیکەکا، ئیکۆلۆژیست، باوەڕمەندا، عەلەوی و رەنجدەرا، گرڎوو ئانیشان کە پۍ ئازاڎیی و دیموکراسی کۊشیا. جە لێوەتەرۆ ئا ئەنجامەی بەدەسئامان، پۍ هێزە دیموکراتیکەکان، کە پۍ ئازاڎیی و دیموکراسی کۊشیانە بیەن بە بانگەوازێوە کە هەڵوێسوو تەسکوو ۋێشا ۋیەرنا و یۊبیەی و هامپەیمانی ۋێشا زیاتەر وەڵۍ وزا.
ورچنیەی کورڎساننە بە تەمامەتی دۊخێوی دژەدیموکراتیکنە کریا
بێگومان پێسە وەڵتەرێچ باسما کەرڎەبۍ، ورچنیەی دۊخێوی دژەدیموکراتیکنە کریا. وێش پەی وێش کورڎسان ٩ ساڵێن لاو وشکنەرە کۊلۊنیالیستیەکاوە چێرو یاساو سەروازیوە مبریۊ ڕاوە. قەیوم تەنیا لایەنیوی ئانەینە. کورڎساننە بەتەمامەتی کەشێوی سەروازی- فاشیستی ئینا ئارانە. ورچنیەی چا کەشەنە کریا و گەل دلۍ دۊخوو فشار، هەڕەشا، تۊقنای و تندوتیژیینە بەشداریی ورچنیەییشا کەرد. بە دەیان هەزار کەسۍ پێسەو سەرواز، پۊلیس، مەدەنی، کارمەندۍ و هتد فاڕیێوە پەی کورڎسانی و دەنگشا دا. ئا کرڎە بەرش موزۊ، کە فاشیزمو ئاکەپە-مەهەپەی ساعیبو چە ئەقڵیەتێەوەن و چندە جە دوژمنداریی دژوو کورداوە قووڵا. تا ڕۊو ئارۊیچ ئەمرۊش حیچ سیستمێوی پەناش پەی شێوازێوی چانەی نەبەرڎەن. سەرکەوتەی تاریخی کورڎساننە جگە گردو ئا فشارایچە دەسەبەر بییەب. ئانەیچ بە شێوێوی ڕاس بەرش موزۊ، کە ئا ئەنجاماو گەلو کوردی بەدەسشا ئاردێنۍ، چا ئەنجاما بە ئەرەیاونای ڕسمیی وزیێنۍ ڕووە، زیاتەرێنۍ. ئاکەپە-مەهەپەی فاشیست، کە دوژمنۍ کوردانۍ، حیچ شارۍ، شارەکڵۍ و دەگێوی کوردانە ڕاشا نمەبۊوە. کورڎساننە بەتایبەتی ناوەند و یاگەکاو شڕنەخ، جۊلەمێرگ، قەرس، بەدلیس و چەولیگینە گردو ئا یاگا بە نامۍ ئاکەپەیوە نویسیێنۍ، یاگۍ زەوتکریێنۍ. گەلو کوردی بەدڵنیاییەوە ئا دۊخەیە قبووڵ نمەکەرا و دژو زەوتکەرڎەکەی مرداوە.
مشۊم گرد کەس ئیرادەو کوردا بوینۊ
هەڵوێستو گەلو کوردی جە ورچنیەیی وێمانەو ٣١ ئادارینە، دەورێوی کە گێڵنانش و سەرکەوتەی تارێخی، کە بەدەس ئامان، لاو گرد کەسیوە بە دروسی بونیۊوە و بیاومێشنە. دەسەڵاتداریی فاشیستی ئاکەپە- مەهەپەی بە واتەی و سیاسەتی نەژادپەرسی، نەتەوەپەرسی، ئایینپەرسی کە سەرو بنەماو دوژمنایەتی وەراوەرو کوردانە پەیڕەوش مکەرۊ، گەورەتەرین زەرەرش بە تورکیای یاونان. بەینو ٢٢ ساڵا دەسەڵاتداریی وێشنە بەتایبەتی تایبەتی جە ٩ ساڵی ویەرڎەنە ئا دۊخە کە تورکیاش یاونا پەنە، بە کوڵی قەیرانێوەن و گەلاو تورکیای بەرەو هەژاریێوی گەورە مبەرانۍ. تورکیا فاڕیان پەی هێلانۍ و حەشارگەی سیخوڕی، مافیا، چەتە، ڕانت و تاڵانکارا. گەلو کوردی و جمیەرو ئازادیی کوردی چندین ساڵێن دژو ئا ئەقڵیەتە فاشستە دژە ئینسانییە مکۊشیۊ. ئا کۊشیایە ئەنجامی تارێخییش بییەن، پێسەو ئانەیە ورچنیەیی ئی دمایچەنە وینیا، سیاسەتو ئەرەگیرکەری و کۊلۊنیالیستی ئاکەپە-مەهەپەی وڕیای و دەسەڵاتداریی فاشیستییش تورکیانە ماڕا. چا قۊناغەشنە ئێمە یاوێنمێش پنە ئێمە بڕواما هەنە، کە ماناو کۊشیای گەلو کوردی خاستەر هەستش پنە مکریۊ. بێگومان گەلاو تورکیای و هێزە سۊسیالیستە دیموکراتیکەکۍ دژو فاشیزمو ئاکەپە-مەهەپەی بیێنۍ بە پارچێوی گرنگو کۊشیای. ئیساتۍ بەدماوە بە دەسەڵاتداری ئاکەپە-مەهەپەی تورکیا زیاتەر چینەی لاو ئانیشاوە نمەبریۊن ڕاوە. دەسەڵاتداری ئاکەپە-مەهەپەی ئینا هەوڵۍ و ئامادەکاریینە پەی قووڵتەرکەرڎەیۊ جەنگی دژو کوردا. ئینەیچە دۊخی خراپی تورکیای خراپتەر مکەرۊ. مشۊم ڕۊشنویرۍ، نویسەرۍ، هونەرمەندۍ و سیاسەتمەداراو تورکیای ئانەیە بوینانۍ و قبووڵش نەکەرانۍ. تورکیا پێویسییش بە قووڵتەرکەرەیۊ جەنگی دژو کوردا نییا. پێویسش بە دیموکراتیکبییەی تورکیای، چارەسەری سیاسی دیموکراتیکو پەرسەو کوردی هەن. گەلو کوردی نەورۊزنە و هەم ورچنیەینە بە شێوێوی ئاشکرا هەڵوێستو وێش نیشانە دا و ئەرەیاوناش، کە مشۊم زووتەرین وەختنە، گۊشەگیری سەرو ڕابەر ئاپۊی دماییش پەنە باریۊ، ئازادیی جەسەیی ڕابەر ئاپۊی مسۊگەر بکریۊ و جە چارەسەرو پەرسەو کوردینە ڕابەر ئاپۊ پێسەو بەرڎەنگی و موخاتەبی بنریۊرە. مشۊم گردلایۍ ئا هەڵوێست و ئیرادەو گەلو کوردی بوینانۍ و بەهەندش وربگێرانۍ.
بانگەوازما پەی دەوڵەتە هەرێمی و هێزە میاننەتەوەییەکا ئانەنە، با کەس پەشتیوانیی جە پلانەکاو ئاکەپە-مەهەپەی نەکەرانۍ، کە قڕکەرڎەی کوردا قووڵتەر مکەرۊوە و دلۍ گەلانە جەنگ و ماڵاییۊیرەی ساز مکەرۊ. مشۊم گرد لێوە ئیرادەو گەلو کوردی بوینانۍ و بەپاو ئانەیە بجووڵیانێوە.
ئێمە واوەی سەرکەوتەی تاریخیی گەلو سەرنیشتو کورڎسانی، ئەدایاو کوردی، گەلاو تورکیای و هێزە دیموکراتیکەکا، ژەنۍ و گەنجا جە ورچنیەیی وێمانەو ٣١ ئادارینە مەبارەک مکەرمۍ و سەرکەوتەیشا پەی موازمێن".
