جە ئەرەیاۋناکەو هامسەرۆکایەتی دەسەو ڕاوەبەری کەجەکەینە ئامان، کە دەوڵەتوو بکوژوو گەلا حیچ داواکاری و چەمەڕایېش ۋنەمەکریۆ و ئانەیچ وزیان ڕووە، "گەلوو کوردی بە دڵنیاییوە ئازاڎیی مسۆگەر کەرۆ و ۋنەپەرسایۆ جە گرڎوو کۆکوشیەکا کەرۆ".

ئەرەیاۋناکەو کەجەکەی پی جۊرەنە: "دەوڵەتوو تورکی کۆلۆنیالیستی قڕکەری جە ٢٨و کانونوو یووەم و ٢٠١١ ینە هجومش کەرڎ سەروو ٣٤ کوردا کە فرەیشا زارۊڵۍ بېنۍ و پۍ پەیڎا کەردەو پەنەوازیەکا بژېوی ۋېشا سەروو سنووروو سەرنیشت و پانیشت و کوردسانی هەرمانە کەرېنۍ. جە ئاکاموو ئا بۆردومانەیۆ کە جە ڕاو فڕۆکەیۆ ئەنجامدریا حەر ٣٤ کوردەکە بە شێوېوە وەحشیانە گەشمەرڎۍ کریۍ. جە کۆکوشیەکەنە ئانۍ کە عەمرەو خوڎایشا کەرڎە خەڵکوو دەگاو رۆبۆسکی بېنۍ، حەرپۊکەی پېسە " کۆکوشی رۆبۆسکی" نامەکېش پېسە فرەو ناما تەری کە جە دژوو کوردا ئەنجامدریێنۍ، لووا دلۍ تاریخی. جارێوەتەر ئا کۆکوشیە ناجوامێرانەیە بە توڕەییۆ و فرە بە تنی شەرمەزار کەرمۍ، جە کەسایەتی ئا ئینسانانە کە ژیۋایشا جە دەسدا گەشمەرڎا دیموکراسی و ئاخېزی گرڎیشا بە رێز و پنەزانای فرۆ ۋیر مارمېوە و ئا وەعدەی بە گەشمەرڎاما دان جارێوە تەر واوەیش کەرمېوە.

سەرەڕاو ۋیەرنای ١٣ ساڵا سەروو کۊکوشی رۆبۆسکیرە، پېسە کۆکوشیەکا تەری، رۆبۆسکیچ پەردەپۆش کریا. ۋنەپەرسایۆ جە ئەنجامدەرا و وەرپەرسا کۆکوشیەکەی نەکریا و جە هەمان وەختەنە کۆکوشیەکەیچ بە غەڵەت نەنریارە، بەڵکم داکۆکیش ۋنەکریا. پېسە مزانیۆ سەردەسەو فاشیستەکا تەیب ئەردۆغان کە خودوو ۋېش ئەمرەو کۆکوشیەکەیش بەرکەردېنە، بە شێوېوە ئاشکرا داکۆکیش جە کۆکوشیەکەی کەرڎ و مبارەک بایش جە ئەنجامدەرا کۆکوشیەکەی کەرڎ. تەیب ئەردۆغان بە خۊتانکەرڎەی جە کۆکوشی و کۊکوشکارا هەم دەوروو ۋېش جە کۆکوشیەکەنە و هەمیچ هەڵوێسوو دەوڵەتوو تورکیش ۋەران ۋەر بە کوردا نیشانەدا. کۆکوشی رۆبۆسکی یۆ چا دەیان کۆکوشیانە کە دژوو کوردا ئەنجامدریېنۍ و حیچ کام چانیشا بە غەڵەت و جە روو نەزانیوە نەکریېنۍ. گرڎوو کۆکوشیەکا جە چوارچێوەو پلانەو دەوڵەتوو تورکینە پۍ جینۆسایدوو کوردا ئەنجامدریېنۍ. کۆکوشی رۆبۆسکیچ بەهەمان شێوە ئەنجامدریا و سیاسەتوو کۆکوشی دەوڵەتوو تورکی بەردەواما.

بۆنەو ١٣ەمین ساڵیاڎوو کۆکوشی رۆبۊسکیوە، گەرەکمانە جارێوەتەر سەرنج وزمۍ سەروو ئی ڕاسیا، ئا دەوڵەتەی کە گەلا، بەتایبەتی گەلوو کوردی کوشۆ، حیچ چەمەڕایێش پې دادپەروەری سەر هۊرمەچنریۆ، ئانەی دادپەروەری مارۆ دی و ۋنەپەرسایۍ تاریخی کەرۆ کۊشیای گەلان. گەلوو کوردیچ پېسە ئانەی تا ئیسە کەردەنش، جە ئیسە بەدمایچۆ گوڕ بە کۊشیایش مڎۆ، ئازاڎیی ۋېش دەسەبەر کەرۆ و پی جۆرە ۋنەپەرسای جە کۆکوشی و کۆلۆنیالیزمی قڕکەری کەرۆ. گەلوو کوردی ئازاڎیی مسۆگەر کەرۆ و ۋنەپەرسای جە گرڎوو کۆکوشیەکا کەرۆ. ئێمە گەل و جمیەرېوە پا جۆرەنمۍ کە ئا وەعدەما دان. مشۊم ئێمە زیاتەر گوڕ بە کۊشیای ئازاڎیی بڎەیمۍ و وەعدەکەیما بەرمۍ سەر. سەروو ئی بنەمۍ پۍ ئانەی ۋنەپەرسای جە کۆکوشی رۆبۆسکی و گرڎوو کۆکوشیەکا کریۆ، داوا جە گرڎ لېوە کەرمۍ کە زیاتەر پەرە بە کۊشیای بڎا و عالتەر کۊشش کەرا".