کەجەکە ئەرەیاۋناش، کە جە ڕاو ڕاپیماو کۆڵنیوە هەڵمەتەو ئازاڎیی کە جە ١٠/١٠/ ٢٠٢٣ دەسشپنەکەردەبۍ، لووا قۆناغێوە تازێوە و ئەرەیاۋناش، "ئێمە داوا جە گەلەکەیما، دۆساما، ژەنا، گەنجا و تەماموو ئازاڎیی وازا و دیموکراسیوازا کەرمۍ، کە زیاتەر پەرە بە کار و خەباتیشا بڎا، جە چوارچێوەو هەڵمەتەو ئازاڎینە جە گرڎ یاگێنە ۋێشا بیاونا بە ملۋێنان کەسۍ و هەڵمەتەکۍ بیاونا بە سەرکۊتەی".

ئەرەیاۋناکەو کەجەکەی پی جۆرەنە: "جە چوارچێوەو هەڵمەتەو ئازاڎیینە کە بە دروشمەو 'ئازاڎیی پۍ رابەر ئاپۆی، چارەسەری پۍ پرسوو کوردی' جە ١٧و شوباتوو ٢٠٢٤ ینە جە شاروو کۆڵنینە ڕاپیمای و گلێرۊبیەیۍ گەورە سازکریا. سەروو داواو رێکوزیا کوردسانیەکا جە ئەوروپانە و دۆسا گەلوو کوردی، بە دەیان هەزار کەسۍ بەرەو مێڎانوو گلێرۊبیەکەی ڕاپیمایشا کەرد و بە سەڎان هەزار کەسێچ گلێرۊبیەیۍ شکۆمەنڎشا سازکەرد. سڵام چا گلێرۆبیە شکۆمەنڎ و ماناڎارەیە کەرمۍ، گەلە وڵاتپارێزەکەما کە بەشداریش جە گلێرۆبیەکەینە کەردەن و حەرپاسە گرڎوو ئانیشا کە رەنج و مانیایشا کێشتەن، پیرۆزبایشا ۋنەکەروو. دۆسا، ژەنا، گەنجا ئینتەرناسیۆناڵیستی کە پۍ ئازاڎیی جەسڎەیی رابەر ئاپۆی و چارەسەری دیموکراتیکی پرسوو کوردی، ۋەرپرسیاری جە ئەستۆ گێرا، سەرمەشقایەتی پۍ هەڵمەتەو ئازاڎیی کەرا، پیرۆزبایی جە گرڎیشا کەرمۍ، سڵام جە حۊڵەکاشا کەرمۍ، سڵام و رێزشا پێشکەش کەرمۍ. ئاڎۍ هەڵوێسێوە فرە گرنگ، فرە ماناڎارشا نیشانە دا. گەلوو کوردی حۊڵ و هەڵوێسوو ئاڎیشا جە پەشتیوانی گەلوو کوردینە فرە بە قیمەت وینۆ.

جە ڕاو ڕاپیما و گلێرۊبیەو گەورەو کۆڵنیوە هەڵمەتەو ئازاڎیی یاوا بە سەڎان هەزار کەسۍ و پی جۆرە پاش وست قۆناغێوە تازێوە. ئا قۆناغێچە بە جەماوەریبیەو هەڵمەتەو ئازاڎییا. هەڵمەتەو ئازاڎیی کە دۆساو گەلوو کوردی جە ١٠/١٠/ ٢٠٢٣ێنە دەسشا پنەکەردە و سەرمەشقایەتیشا پۍ کەرد، بە گلێرۊبیەو ١٧/١٠/ ٢٠٢٤ بیە بە جەماوەری و یاوا بە قۆناغێوە تازۍ. قەناعەتما پاسەن کە جە ئیسە بە دماوە هەڵمەتەو ئازاڎیی جە گرڎ یاگێنە، جە چوار پارچەو کوردسانی و جە بەروو وڵاتینە بە بەشداری ملۋێنان کەسا جەماوەریتەرە بۆ. سەروو ئا بنەمایۍ داوا جە گەلەکەیما، دۆساما، ژەنا، گەنجا، گرڎوو ئازاڎیوازا و دیموکراسی وازا کەرمۍ، کە کار و خەباتشا فراوانتەر کەرا، جە چوارچێوەو هەڵمەتەو ئازاڎینە جە گرڎ یاگێنە ۋێشا بیاونا بە ملۋێنان مرۆڤا و هەڵمەتەو ئازاڎیی بیاونا بە سەرکۊتەی".