یۆ جە ڕاوەبەرا جمیەری سۆسیالیستی پانهێلینیکی (PASOK)ی و یۆ جە ڕێکوزاو ئەنجامنامەو ڕێکوزیاو جمیەروو میچالیس چارالامپیدیسی، ڕۊو چوارشەممەی ٢٧و ئاداری، پڕێنە کۆچی حەقەتینش کەرد.

هامسەرۆکاو مەجلیسوو کۆنسەی ڕاوەبەری کەجەکەی بەسێ هۆزاتە و جەمیل بایک پەیامێوە هامخەمیشا پی بۆنۆ وەڵاکەردۆ. دەقوو پەیامەکەی پی جۊرەنە:

"هەواڵوو دڵتەزناو کۆچی حەقەتینوو بەڕێز میچالیس چارالامپیدیسیما پنەیاوا، پی هەواڵەیە فرە دڵتەنگۍ بیەیمۍ، ئێژا میچالیس چارالامپیدیس پارێزوانوو کۊشیای ئازاڎیوازی گەلوو پۆندۆسی و دۆسێوە گۆرەو گەلوو کوردی بۍ. بەڕێز میچالیس چارالامپیدیس ماوەو دە ساڵا، جە یۆنان و ۋەرکەوتوو دلێڕاسەینە چنی کوردی و سەرمەشقەکاش نیشتەنەرە و پۍ چارەسەری پرسوو کوردی کۊشیان. حەرپاسە هامڕا و دۆسوو جمیەرەکەیما بۍ. جە ساڵەکا نەوەڎەکا سەڎەی ویەردەینە جە وڵاتوو سوریای، چنڎین جارۍ سەردای ڕابەرایەتیما بەڕێز عەبدوڵا ئۆجالانیش کەردەن و چەمپنەکۊتەیش چنی ئەنجام دان. تەنانەڎ دماو گێرتەی سەرۆک ئاپۆی، جە گرڎ مەجالەکانە بەشداری بانگەشەو ئازاڎیی ڕابەر ئاپۆی و داکۆکیش جە مافەکاش کەردەن.

بنەیانەو چارالامپیدیسی مەردموو شاروو ترابزۆنینۍ، بە مەڵامەتوو دڕنڎەیی و کۆمکوشییەکا دەوڵەتوو تورکیوە ڕووەشا جە یۆنانی کەردێنە. بەڕێز میچالیس چارالامپیدیس یۊن چا کەسا کە کۆمکوشییەکاو دەوڵەتوو تورکیش جە گرڎ مەجالەکا جەهانینە وست ڕۆژەڤۆ. بەرێز میچالیس چارالامپیدیس پێسە کۊششکارێوە گەلوو پۆنتۆسی بەرکۊتەن و کۊشیای گەلوو پۆنتۆسیش بە جەهانی ئشناسا. هەمان وەختەنە گەلوو پۆنتۆسیش بە کوردیچ ئشناسا و بی بە سردەو دۆسایەتی بەینوو گەلاو کوردی و یۆنانی و پۆنتۆسی. نەک هەر پێسە دۆسێوە، بەڵکوو پێسە هەڤاڵێوە جە چارەسەرکەردەی پرسوو کوردینە هەرمانەش کەردێنە. دماو دەسپنەکەردەی ئاخێزوو ۋەرنیشتی بی بە وەرگریکاروو ئاخێزوو ۋەرنیشتی. هەمان وەختەنە چنڎین کتێبێش سەروو سردەو بەینوو پۆنتۆسی و کوردی نوویستێنۍ و چاپش کەردێنۍ. حەرپاسە دەیان وتارۍ و چەمپنەکۊتێش چی مەجالەنە نوویستێنۍ و وەڵێش کەردێنۍ. سەروو ئاستوو جەهانی، پێسە شارەزێوە سەروو پۆنتۆسی و پرسوو کوردی، جە دەیان کۆڕ و سیمینار و پانێڵێنە وتارێش  پێشکەش کەردێنۍ و پەیامش سەروو چارەسەری پۆنتۆسی و پرسوو کوردی وەڵاکەردەنۍ.

ئێژا میچالیس چارالامپیدیس بە درێژایی ژیۋایش پۍ گلێرگێوە ئازاڎی و یەکسانی، پۍ سیستمێوە دادپەروەرانەی و دیموکراتیکی یۆنانەنە کۊشیایش کەرد. بەخەباتە بێ وێنەکاش جە گرڎ بوارەکانە بیەن بە هاموڵاتیێوە بەقیمەتوو گەلوو یۆنانستانی. کۆچی دماینوو ئێژا میچالیس چارالامپیدیسی خەسارێوە گەورەن پۍ گەلاو کوردی و یۆنانی و پۆنتۆسی. ئێمە بە کۆچی حەقەتینوو بەڕێز میچالیس چارالامپیدسی، فرە خەمبارێنمۍ و هامبەشۍ خەم و ناوەشی بنەیانەیش و هەڤاڵەکاشەنمۍ. پی بۆنۆ پرسە و سەرەوەشی ۋێما ئاراسەو بنەیانەو بەڕێز میچالیس چارالامپیدیسی و هامڕایاش و تەماموو مەردموو یۆنانی و پۆنتۆسی مکەرمۍ.

جە کۊشیای ئازاڎیی گەلوو کوردسانینە، یاڎەوەریەکۍ بەڕێز میچالیس چارالامپیدسی بە زینڎەیی بەرز ڕاگێرمۍ و بەردەوام بە دڵێوە گەرمۆ یاڎش مارمێوە.