کۊمیتەو پەیۋەنڎییەکا جبەرو کۊما جڤاکێن کورڎسان (کەجەکە)ی دماو تیرۊرکەرڎەو حوسێن تورەلی جە دهۊک ئەرەیاۋنېۋەش ۋەڵاکەرڎۊ. جە ئەرەیاۋناکەنە سەرنج وزیان سەرو پرۊسەو ھورچنیەکا و ئا ئاژاوەگێڵییا، کە دۆڵەتو ترکی ئەنجامشا مڎۊ.
ئەرەیاۋناکەنە سەرنج وزیان سەرو تاوانەکا دۊڵەتو ترکی جە پانیشتوو کورڎسانی و جە بارەو ھەرمانە تێکدەری و ئاژاوەگێڵییەکا ڕژێمەکا ئاکەپەی و مەهەپەیۊ ئاگایش دان.
جە ئەرەیاۋناکەو کۊمیتەو پەیۋەنڎییەکا جبەرو کۊما جڤاکێن کورڎسان (کەجەکە) ینە ئامان:
"گەلا تورکیای پۍ ئاینڎەو ۋێشا لوۋۍ دلۍ مەرحەلەو ئاخرو ھورچنیېۋە، کە پۍ ئاڎیشا فرە گرنگا. ھورچنیەکۍ ١٤و ئایاری پۍ ئاینڎەو ۋڵاتی و مەنتیقەکەی فرە گرنگېنۍ و فرەش نەمەنەن. چڕیەو ئێمە پۍ ڕای گرڎی تورکیای و مەنتیقەکەی و هێزە میان دۊڵەتییەکا ئانەن، جە دژوو ھەرمانە تێکدەری و ئاژاوەگێڵییەکا دۆڵەتو ترکی فاشیستی و حکومەتو مافیای – تیرۊریستی وریېبا.
دەسەڵاتو مافیای - تیرۊری ئاکەپە و مەهەپەی، کە ۋەرەن ڕوو شکسی و دۊڕیای بۊۋە، بە ھجومۍ تیرۊریستی پۍ سەرو تەیارەخانەی میان دەوڵەتیی سلێمانی، نیشانەو گرڎیماش دا، کە پەنا بەرۊنە ۋەرو گرڎ ڕێۋە. ئا ھجومە نامەرڎانۍ، کە کەرڎېنێش سەرو تاوانەو تیرۊری میان نەتەوەیی، حۊڵش دان چالاکیەکا جمیەرەکەیما جە تەیارەخانەو سلێمانی و سەرانسەرو شارینە بەھانېش پۍ بارۊۋە. وەزیرو جبەرو حکومەتو مافیای - تیرۊری مەولوڎ چاوش ئۊغڵو سەرو شاشۍ تیڤیەکاوە بۍ ئانەی شەرم کەرۊ، قسۍ دروۍ و دور جە ڕاسیی مکەرۊ. ئەرەیاۋناش، تەڤگەری ئازاڎییما ئینا ئاژەو کۊنترۊڵکەرڎەو تەیارەخانە و شارو سلێمانینە. ئێمە گەرەکمانە بە ڕۊشنی بە گەلە قارەمان و بەنرخەکەیما و ڕای گرڎی جەهانی واچمۍ، ئانەی دۊڵەتو ترکی جەبارەو تەیارەخانەو سلێمانی و دۊروبەریشۊ ماچۊش، گرڎش دروێنە. کێشەی ئەساسی ئانەن، کە دۊڵەتو ترکی بێزارو قەڵسا جە خەباتو هامبەشو یۊبیەی (یەنەکە) و قەسەدەی و هێزەکا هامپەیمانی میان دەوڵەتیی دژ بە داعشی. زەمینەو ئارگۊمێنت و ئەنەیاوای فاشیستی بە ۋەڵېۋەبیەی یانەو ئەردۊغانی و باخچەلی و پارتی (پەدەکە)ی بە سیاسەت و ڕاۋەبەری ۋێش مجۊشەرە.
چی ساڵا ئاخرینە جە سلێمانی و دۊروبەرشەنە چنڎین ۋڵاڎپارێزۍ و هەڤاڵېما بەمەڵامەتو ھجومەکا ڕێکوستەی تیرۊریستیی میتیۊ گەشمەرڎۍ بیۍ. جە گرڎو ئا ھجومانە، گرڎو کوشەرەکا جە هۊلێرۊ ئامېنۍ و دماتەر لوۋېنۍ پۍ هۊلێری. گرڎو ئا ھجوما هامکاریی بەینو میتی و – دەزگاو پارێزناو پارتی بەبەڵگۊ سەلەمنا. هۊلێر و دهۊک بیێنۍ بەهامشێۋەو بارەگا و قەرارگەکا میتی، کە رێکوستەیە تیرۊریستیین. دماین نموونەو ئی هامکارییە تاوانکارییە، ئانە بۍ، کە ١٧و نیسانیەنە جە میانگەو شارو دهۊکینە ۋڵاڎپارېز "حوسێن تورەلیی" خەڵکو باکوورو کورڎسانی تیرۊرکریا. ۋەرو ئانەی دۊڵەتو فاشیستیی ترکی گەرەکش بۍ "حوسێن تورلی" گېرۊ و زینڎانیش کەرۊ، "حوسێن تورەلی" نزیک بە دە ساڵا چېۋەڵتەر ئاما پۍ پانیشتوو کورڎسانی و چاگە ئەرەنیشتە بی و دەسش بە ھەرمان و کاسبی کەرڎ. پارتی (پەدەکە) جمیەرەکەیما کەرۊ بە بەھانۍ ھجومەکا سەرو سلێمانی، بەڵام ئی تیرۊریە بە چېش ڕۊشن مکەرۊۋە، دەسەڵاڎ دارا شارەکېشا کەرڎېنۍ بە یاگۍ ئیسراحەتی و پەناگە پۍ تیرۊرکەرا کورڎی. گەل چەمەڕاو جوابیشا ۋنەمکەرۊ. ھەڵای ۋنەو حوسێنی وشکە نەبیێنۊ، کە یاۋنەریەکۍ پارتی (پەدەکە)ی، چېرو کۊنترۊڵی میتینە ، حۊڵېۋە فرە مڎا پۍ ئانەی ئێمە کەرا بە ۋەرپرسیارو ئا ھجومەیە. ئێمە کوشتە و تیرۊرکەرڎەی نامەردانەو حوسێن تورەلی، کە ئینسانۍ وڵاڎپاریزما بۍ شەرمەسار کەرمۍ و سەرەوەشی جە خانەۋاڎەکەیش و گەلە وڵاڎپارێزەکەیما مکەرمۍ. جە کەسایەتیی گەشمەرڎە حوسێن تورەلی نە، جارێتەر ماچمۍ، بە دڵنیاییۊ حەقەو گرڎو گەشمەرڎەکاما مسانمېۋە.
بۆنەو ئا ھجومیۊ، ئا زانیاریۍ، کە جە سەرچەمە گرنگەکاوە یاۋێنۍ دەسما، گەرەکمانە بە ۋەروچەم گېرتەیشا گرڎ کەسۍ جە دژوو ھەرمانە تێکدەری و ئاژاوەگێڵییەکا دۊڵەتو ترکی فاشیستی و حکومەتو مافیای – تیرۊرستی هوشیار کەرمېۋە. دۊڵەتو فاشیستی ئەرەگیری، حکومەتو مافیای – تیرۊری کە جە گرڎ ڕوۋێۋە تووشو زەعیفی و تەنگەتاوی بیەن، جە تەرسەو شکسی و دۊڕیای تەرسۊ، پۍ ئانەی ئارامیی مەنتیقەکەی تێک بڎۊ، دینامیکە هەرێمییەکا مارۊنە پاڵو یۊی، ئێمە مزانمۍ، کە گەرەکشا جە عێراق و سوریا و ۋەرنیشتوو پانیشتوو کورڎسانینە ئەرەتەقایۊ، ھجوم و تیرۊر ئەنجام بڎۊ و ئانیشایچ وزۊ ملو جمیەرەکەیما.
چا چوارچێوەنە، بە تایبەتی مشۊ ۋەرپەرسا عێراقی و پانیشتوو کورڎسانی و خەڵکو ئاگەی جە دژوو گەمەکا حکومەتو تیرۊری – مافیایی دۊڵەتو ترکی ئاگاڎارۍ وھوشیارۍ با.
ۋێڕاۋەبەریەکەما سەرنجش وست سەرو ئا زانیارییا، کە دۊڵەتو ترکی ئەرەگیری و دوژمنو کورڎا ڕاو فرتوفێڵی و چەواشەی و ئاژاوەگێڵی و تێکدەری گېرۊنە ۋەر، قەرارو مرڎناو چالاکی، کە ئێمە بەمەڵامەتو بوومەلەرزەکەیۊ داما تا دماو ھورچنیەکا ١٤و ئایاری درێژکریاۋە.
چنی دماین ۋەڵېکەوتە و زانیاریەکا، کە پنەما یاۋێنۍ، جارێۋەتەر ڕاسی و دروسیی قەرارەکەیما سەلەمیا.
ئێمە داوا جە حکومەتو عێراقی و لایەنە سیاسییەکا دەسەڵاڎدارا پانیشتی و هێزەکا تەری و هێزە میان نەتەوەییەکا مکەرمۍ، چی بارۊ بە ۋەرپەرسیاریی ۋێشا ھوربېزا و ڕاو جا پۍ ڕاگېرتەی چا حۊڵە ئاژاوەگێڵییا گېرانە ۋەر."
ھ.ش
