هامسەرۊکایەتیی دەسەو ڕاوەبەریی کۊما جڤاکێن کورڎسان (کەجەکە)ی پەیامێوەنە پەی کۊچی دمایینوو فریاڎ هیرانی، نویسەر، ڕۊنامەنویس و ئەنداموو کۊنگرەی نەتەوەیی کورڎسان (کەنەکە)ی ئەرەیاونانش: " بە داخ  و  پەژارێوە فرەوە، هەواڵوو کۊچی  دمایینوو  کەسایەتیی  دیاروو  پانیشتوو  کورڎسانی،   پێشمەرگەی دێرین، ڕۊنامەنویس  و  ئەنداموو  کۊنگرەی  نەتەوەیی  کورڎسانی  "فریاڎ  حەسەن   ئەحمەد" ئشناسیا  بە "فریاڎ هیرانی"یمان  ژنی.  پی بۊنە  خەمناکۊ پەرسە  و سەرەوەشیی وێما  ئاڕاسەو  گەلوو کورڎسانی، هامڕایاما و  هامسەنگەرا و بنەیانەی هێژاو کاک فریاڎی کەرمۍ و وێما بە هامبەشوو خەم و پەژارەیتا مزانمێ".

واتەنیچش: " کاک فریاڎ هیرانی پێسە ئینسانێوە ئازادیواز، کۊشەر و نیشتمانپەروەری کە عومروو گەنجیشنە  بەشداریی کۊمەڵەو ڕەنجدەراو کورڎسانییش کەرڎەن و دمایی حیزبوو شیوعیی کورڎسانینە درێژەش بە خەباتی دان. جە ئەرەپڕای جەماوەریی گەلەکەیمانە پانیشتوو کورڎسانینە بە تایبەت ئازادکەرڎەی شاروو هەولێری و کەرکووکینە دەورێوە چالاکش بییەن. کاک فریاڎ هیرانی پێسە نویسەرێوە بەئەزموونی  و قەڵەمێوە قەوەتی جە ئشناسای دۊزی ڕەواو گەلەکەیمانە و هۊشیارکەرڎەیۊ کۊمەڵاو خەڵکوو کورڎسانینە دەورێوە گرنگش بییەن و  بە هەرمانۍ ڕۊنامەنویسیێوە درێژەش بە کۊشیای دان.  وێستگەی دمایینوو کۊشیای سیاسی  و کۊمەڵایەتیی کاک فریاڎ هیرانی، کۊنگرەو نەتەوەیی کورڎسان KNK بێ،  کە پێسە کەسایەتیێوە نەتەوەیی و نیشتمانیپەروەرێوە دڵسوزی پەی پتەوکەرڎەی یۊبییەی نەتەوەیی گەلوو کوردی خەباتش کەرەن.  کاک فریاڎ هیرانی گردوو ئی یاگاو ژیوایە سیاسی و کۊمەڵایەتییەینە بە هەڵوێست و ویر و پەیلوایەکاش یاگۍ ڕێز و بڕوا و متمانەو هامڕایا و گەلەکەیش بییەن."

ئاخروو پەیامەکەو هامسەرۊکایەتیی دەسەو ڕاوەبەریی کەجەکەینە ئامان: " جارێوە تەر بۊنەو کۊچی دماینوو کاک فریاڎ هیرانییوە پەرسە و سەرەوەشییما ئاراستەو گەلوو کوردی، هامڕایاش و هامسەنگەرا، ئەنداماو کۊنگرەی نەتەوەیی کورڎسانی و بەتایبەت بنەیانەی هێژایش کەرمێ. هومێدما هەن پەروەرەدگاری مەزن ڕۊحوو کۊچکەرڎەی بە بەهەشتی فراوانی شاڎ کەرۊ و سەبووری و دڵنەوایی بە بنەیانەی و هامڕایاش بەخشۊ".