ناوەندوو ئەوەکۆڵیای ژەنۆلۆژی کەمپوو پەنابەراو گەشمەردە ڕۆستەم جودی (مەخموور)ەنە ماوەو دوێ مانگا مبۆنە، بە بەشداریی ژەنە گەنجا و ژەناو کەمپەکەی وەش بییەن و وۆرکشۆپش سەروو ٥تەوەرا چا گرووپانە کەردەن. ناوەندوو ئەوەکۆڵیای ژەنۆلۆژیی مەخمووری ڕوەکاو٢٣-٢٤و ئابی کۆنفرانسوو یوەمیش بە دروشموو "بە ڕێکوستەی هەستوو ژەنێ و ژەنبییەی، ژیوای جە ئەرەگیری و عەقڵیەتوو دەسەڵاتدارانە ئازاد مکەرمێ"،ێش بەست. کۆنفرانسەکە بە بەشداریی ١٠٠ ئەنداما یانەو گەلینە بە دەیەقێوە مدرای پەی گەشمەرداو ئازادیی دەسش پەنە کەرد.

دمایی ئرمانایەکاو ڕابەروو گەلوو کوردی سەبارەت بە ژەنۆلۆژیی ونیێوە، دمایی کوڵە فیلمێوە سەبارەت بە ژەنۆلۆژیی پێشکەش کریا، دمایی ئا پەیامێ شەنگال و پانیشتوو کوردسانیوە پەی کۆنفرانسەکەی کیانیێبێنێ ونیێنوە.  

دمایی بەشەو دووەمەو کۆنفرانسەکەی دەسش پەنە کەرد و بابەتێ پێشکەشکریێ ٢ڕووەو کۆنفڕانسەکەی ئینێ بێنێ:

*کاریگەریی کۆمەڵایەتی-دەروونی کۆچی بەزۆری سەروو ژەناوە.

* مافەکێما کامێنێ؟ ئێمە چندە مزانمێ و چندەنمێ.

*هۆشیاریی ڕەگەزی و هەستکەردەی بە ڕەگەزیی.

* شیکاریی تاریخیی کۆمەڵشناسی پەی کولتووروو بۆتانی.

* پایەکاو دیموکراتیزەکەردەی بنەیانەی.

 دووەم ڕۆو کۆنفڕانسەکەینە، ئەندامەو لوجنەو ژەنولۆژیی مەخمووری، سۆنگوڵ گولەرە، قسێش کەردێ.

سۆنگول گولەرە، یوەمین کۆنفرانسوو ژەناش وەنەو سەرجەموو ژەنا مەبارەک کەرد و واتش:" کۆنفرانسەکە پێشکەش بە گردوو ژەنە مدرامانکەرا مکەرمێ، سپاسوو گردوو ئا کەسا مکەرمێ، جە ئامادەکاری و وۆرکشۆپەکانە هامکارێ و پەشتیوانێما بێنێ. هومێدەوارێنمێ ئی کۆنفرانسە بۆ بە ئامرازێوە پەی بەرزکەردەیوە ئاستوو کۆشیای ژەناو کوردی و جیهانی."

قەرارەکاو ئاخروو کۆنفرانسەکەی ئینێنێ:

"ژەنۆلۆژی بنەماو زانستی ئازادوو کۆمەڵشناسیینە. بە شێوێوی گردین زانست  دەورش جە چارەسەرکەردەی قۆرتە کۆمەڵشناسییەکاو ئیساتێنە نەبییەن، ئەگەر زانستێوە پەی گلێرگەی نەبۆ و دژوو گلێرگەی هەرمانە بکەرۆ، کۆمەڵشناسیی پەرە بە ئازادیی نمەدۆ و نمەتاوۆ میتۆدی هەقەتین پیشکەش بکەرۆ. بەداخۆ زانست جە شیکەردەیوە کۆمەڵشناسینە بە دەور ووەرپەرسیی زانستییوە، نزیک نەبییەنۆ. ژەنۆلۆژی بانگەشەو پێشکەشکەردەی ئا زانستەیە مکەرۆ، کە چێروو کاریگەریی دەسەڵاتینە قۆرخ کریان. یانێ پێسەو یاگەدارێوە وەراوەروو زانستوو سەرمایەدارییوە مکۆشیۆ و چالاکییەکاش مکەرۆ.  

پی هۆشیاریی ئازادیی کۆمەڵایەتییوە، زانستوو ژەنولۆژی مەخموورەنە هەرمانەکاش مکەرۆ،ئامانجی گرنگی پێسەو ئەوەکۆڵیای، سیمپۆزیۆم و وۆرکشۆپی مکەرۆ. چا چوارچوەنە ٢٣-٢٤و ئابوو ٢٠٢٤ یوەمین کۆنفرانسوو وێش بەستش.

قەرارەکاو کۆنفرانسەکەی:

- بە پاو بنەیانەی دیموکراتیکی هامپەیمانی وەش بکەرمێ.

- مۆدێلوو بنەیانەی دیموکراتیکی چەنی کاریگەر مبۆ.

- مشۆم پەی بنەیانەی دیموکراتیکی فاڕیای بکریۆ.

- مشۆم هامسەرگیری بەپاو پیمەرە دیاریکریایەکا بدریۆ.

-ژەنێوی گەنجە کە گەرەکشەن هامسەرگیری بکەرۆ مشۆم وەڵینەی داراییش بۆ، تا بتاوۆ بژێویی وێش بۆش،پێسەو مەرجێوی تایبەتی دیاری بکریۆ.

- پەنەوازا هەڵمەتێوە پەی بەکارناردەی بەرهەمە پلاستیکییەکا دەس پەنە بکریۆ.

 کۆنفرانسەکە بە واتەیوە درووشما 'بژیوۆ سەرۆک ئاپۆ'ی، 'بێ سەرۆکی ژیوای نمەبۆ' و 'ژەنی، ژیوای، ئازادی'ی تەمامیا.