بە دروشمەو "پۍ ئازاڎیی" کۆنگرەکە جە هۆڵوو وەرزشی ئەتاتورکینە جە ئەنقەرە دەسشپنەکەرد.

جە چوارلاو تورکیای و کوردسانیوە هەزاران کەسۍ  بەشڎارۍ کۆنگرەکەی بېنۍ. بەمەڵامەتوو بەشڎاریۍ فرەیۊ خەڵکێوە فرە جە بەروو هۆڵەکەینە مەنېوە.

 ۋەروو ئانەی چوەرۊ ڕا نەمەنېنە، شاشېوە گۊرۍ جە بەرۊ نریېنەرە پۍ ۋینای کۊنگرەکەی.

جە کۆنگرەکەنە بەردەوام دروشمەو "بژیۋۊ مدرامانوو ۋەرنیشتی" بەرز کریېوە. جە دلۍ و بەروو هۆڵەکەینە هۊرپڕای و زەماۋنە گېڵنا.

 هۆڵەکە بە عەلەمەو پارتوو چەپی سەوزی و لافیتۍ کە سەرشاوە نۋیسیان "چارەسەری دیموکراتیک پۍ قۊرتەو کورڎی"، "نا پۍ گۆشەگیری، حەر ئیسە ئاشتی "، "دەستووری بنەڕەتی دیموکراتیک" و "سیستەمی فاڕدۍ" ڕازیانۊ.

وەڵۍ دەسپنەکەرڎەو بەرنامەو کۆنگرەی، نوێنەرەکۍ یاگەکاشانە بنەشا وستە. نزیک بە وەختوو نیمەڕۆی  ٨٠٠ نوێنەرۍ دەنگ مڎا و لیستوو ئەنڎاما ئەنجومەنوو پارتی و هامسەرۆکا هۊرچنا.

 ئەنجومەنوو پارتەکەی جە ٨٠ ئەنڎاما سەرەکیۍ و ٣٥ ئەنڎامۍ یاگەگیرۍ و ١٠ ئەنڎامۍ فەخریۍ واتە بە گرڎی جە ١٢٥ ئەنڎاما پێک مۍ.

 حەرپاسە جە کۆنگرەکەنە دەسەی دیسپلینی ناوەنڎی و ئەنڎاما لوجنەو ئاشتەوایی دیاری کریا.

نامۍ تازۍ پارتەکەی بۊ بە هەدەپ

بەپاو زانیارییەکا کۆمیسیۆنوو ئاماڎەکاری و ئاشتەوایی، نامۍ تازۍ پارتەکەی بۊ بە پارتوو یەکسانی و دیموکراسی (هەدەپ).

 چارەسەری دیموکراسیانەو قۊرتەو کورڎی و گۆشەگیرکەرڎەی ڕابەروو گەلوو کورڎی عەبدوڵا ئۆجالانی و دەستووری تازە بانۍ بە ئامانجی سەرەکی هەرمانەو کۆنگرەکەی.

 نوێنەرۍ فرېوە جە لایەنە سیاسییەکا بەشڎارۍ کۆنگرەی بېنۍ. هامسەرۆکوو کۆنگرەو گلېرگەی دیموکراتیک (کەجەدە)ی بەدران ئۆزتورک، هامسەرۆکوو واتەواچاو کۆنگرەی دیموکراتیکی گەلان (هەدەکە)ی ئەسەنگول دەمیر و جەنگیز چیچەک، هامسەرۆکا گرڎین و پارتوو هەرێمە دیموکراتییەکا (بەدەپە)ی ساڵیحە ئایدنیز و کەسکین بایندر، هامسەرۆکا گرڎین و پارتوو دیموکراتی گەلان (هەدەپە)ی سوڵتان ئۆزجان و جاهید کرکزاک، سەرۆکا گرڎین و پارتوو شۆڕشگێڵنی ئەلیف تۆرون، هامسەرۆکوو واتە واچا پارتوو بنیاڎنیایۊ سۆسیالیستی (یەسەکەپە)ی کەنعان یوجە و جاڤیت ئوگور، پارتوو سۆسیالیستی چېردەسا (ئەسەپە)ی، بە نامۍ پارتوو گەلی کۆماری (جەهەپە)ی، دەڤریم بارش چەلیک یاگەگیروو سەرۆک کۆماری و فرېوە جە وەرپەرس ونوێنەرۍ تەرۍ بەشڎارۍ کۆنگرەکەی بېنۍ.

 حەرپاسە بە نامۍ پارتوو چەپیوە ئیلکنور بەشەر و وەرپەرسا پارتوو دەڤای بەشڎارۍ کۆنگرەکەی بېنۍ.