کەنەکە داواو بەشداری گەلیش کەرڎ جە هۊرچنیەکا عێراقینە
کەنەکە داواش جە گەلوو کوردسانی کەرڎ بەشداری جە هۊرچنیەکا ئەنجوومەنوو پارێزگاکا عێراقینە کەرا.
بانگەشەو هۊرچنیەکا جە عێراقەنە بەردەواما و جە ١٨و کانوونوو یوۋەمیەنە هۊرچنیەو ئەنجومەنوو پارێزگاکا ملۊڕاوە. ئیجارە کورد بە لیستی هامبەش بەشداری هۊرچنیەو کەرکوکی مەکەرۆ، ئینەیچ تەرسیش سەروو پێگە و کاریگەری کوردی هەرێمەکەنە وەش کەرۆ.
کۆنگرەو نەتەوەیی کوردسانی (کەنەکە) سەبارەڎ بە هۊرچنیەکاو عێراقی ئەرەیاۋنېوەش ۋەڵاکەرڎۆ.
ئەرەیاۋناکەو کەنەکەی پی جۊرەنە:
"کوردسانیاو تەماموو شار و شارۆچکڵەکا دەیان ساڵېن ڕووبەڕوو هەڕەشا و کوشتەی و ئاوارەبیەی و ئېش و ڕېشوو ڕژێمەکا عێراقی بیېنێوە، چن هۊرچنیەی و بەشداریکەرڎەی گرنگا، بەتایبەتی پۍ کوردی ئانە ئەرکێوەن و هۆشداریێوە گرنگا پۍ ئانەی تاریخوو ستەمکاری و چەوسنایۊ دلېنە بشۆ. دەسوەردای دلېینەی و هەرێمی، پېسە تورکیا، ئێرانی بەردەوام مەڵامەتوو بۍ باوەڕی و دووبەرەکی بیەن دلۍ پېکئامایەکا کەرکوکی و دەوروبەریشەنە، بەتایبەت دەوڵەتوو تورکی کاراکتەری ئەساسی دەسوەرداین جە ئاژەو کەرکوکی و مەنتیقە ئەرەبڕیەکا جە هەرێمی.
هۊرچنیەی متاوۆ بۆ بە هۊرچەرخنایۍ و جوابوو گرڎوو پیلانەکا بڎۊوەو دمایشا پنە بارۆ. پۊکەی داوا جە گەلوو کوردی کەرمۍ، پېسە گەلێوە ستەم ۋنەکریای بە گرڎوو قوەتیشاوە بەشداری هۊرچنیەکا کەرا. بە بەشداریکەرڎەی جە هۊرچنیەکانە، سزاو سیاسەتوو پارچەکەرڎەی گەلی بڎەیدۍ.
ئێمە پېسە کۆنگرەو نەتەوەیی کوردسانی داوا کەرمۍ بە شێوېوە ئازایانە بەشداری جە هۊرچنیەکانە کەرڎۍ، ١٨ساڵېن حیچ هۊرچنیېوە جە کەرکوکەنە ئەنجام نەڎریان، پۍ ئینەیچ ئی هۊرچنیەیە بە دەرفەتێوە گرنگ وینمۍ."
