کۆنگرەو نەتەوەیی کوردەسانی (کەنەکە) ڕۆو زوانی کوردیش پیرۆز کەرد و بە ئاماژەدای پا مەترسیا کە سەرو زوانی کوردیی ئینۍ ئارانە واتش: "زوانی کوردی بیەو نەتەوەو کوردین، زوانی کوردی شناسنامەمانە و پەنەوازا گرڎو گەلی پارێزنۊش."
کۆمسیۆنو زوان و کولتوور و پەروەدەیی کەنەکەی، سەبارەت بە ڕۊو زوانی کوردی ئەرەیاۋنێوەش وەڵا کەرڎۆ.
جە ئەرەیاۋناکەو کەنەکەینە جەخت سەرو گرنگی پارېزنای زوانو کوردی کریانۆ و ئامان: "زوانی کوردی بیەو نەتەوەو کوردین، زوانی کوردی شناسنامەمانە، ١٥ و گوڵانی ڕۊو زوانی کوردی جە گرڎو کورد و کوردەسانیا پیرۆز بۆ.
سەڎان ساڵێن، هەر جە سەردەمو کۆلۆنیالیزمی و ئارۊو ئەرەگیری، گەلو کوردی بە زوان و تایبەتمەندییە نەتەوەییەکاشۆ ئینا چېرو زوڵم و زۆرداری و بەش بەش بیەی و دلېنەبەردەینە، دژمنۍ بە پلانە و ۋێسەپنای هەوڵشا دان زوان و کولتوورو کوردا دلېنە بەرا و نازاش."
جە بەردەوامینە ئاماژە بە مڏرامان و گەلوو کوردی پەی پارێزناو زوان و کوردیی کریان و ئامان: "گەلوو کوردی بەدرێژایی ئی تاریخییە جە وەراوەر و نیاز و ئامانجو دوژمنا چۆکش نەڏانەرە و پەی مەنەیۆ و ئاستەیۆ زوان و بییە و وێش خەبات و ئەوەکۆشایش کەرد، قوربانی گۆرەش پەی پێشکەش کەرد. سووپاس و ستایش پەی سەرمەشقا کوردی و ئەڏێ پەروەردەکاری، کە زوان و کوردی، ئا زوانە ڕەسەنەی، کە ڕەگ و ڕیشەش ئاوێتەن بە سروشت و خاکو کوردەسانی، بە زینەی ئاستشاوە و تا ئەبەد مەنۆوە، بە گیانی فیداکارانە ئاڏشاوە ١٥ــی گوڵانی جەژنەو زوانو کوردی جە گەلەکەیما موبارەک مکەرمێ."
جە درێژەنە ئامان: "هامکاتەنە، ئارۆ ١٥ـو گوڵانی بە قەرارو کۆنفرانسێوە کۆنگرەی نەتەوەیی کوردەسانی (کەنەکە) کریا جەژنەو زوانو کوردی. گەلوو کوردەسانی با بۆنۆ بە وەشی و شادی زەماوەنە گێڵنا و مەراسیمی جیا جیا پێشکەش مکەرا، ئینەیچ یاگێ وەشخاڵی و ڕێز و پنەزانایا.
جە دما دما و ئەرەیاوناکەینە بانگەوازی پەی پارێزناو زوانو کوردی کریان و ماچۆن: "ئێساڵیش بە گەرم و گوڕیێ فرۆ بە تایبەت جە سەرنیشتوو وەرکەوتوو کوردەسانی، بە شێوێوە دیار و سەرکەوتوانە ئامادەکاری و چالاکی پەی ئی جەژنێ ئەنجام مڏۆنە و پیرۆزش مکەرمێ.
هیواڏارێنمێ جە ساڵەی ئایندەنە سەرتاسەرو کوردەسانی بە ئازادی و سەرفەرازی هەمیشەیی، گرڏ و ڕووەکا ساڵەو ١٥ـو گوڵانیش چنیش بە جەژنەو سەرکۆتەی و یاوای بە مافە ڕەواکا گەلوو کوردی زەماوەنە و وەشی، چونکە زوان شناسنامە و هەر میللەتێ و نەتەوێوەن، پۆکەی پەنەوازا زوان و کوردی پارێزنمێ."
