دماو ١٨ ساڵا پۍ ئەوەڵجاری هۊرچنیەی ئەنجومەنوو پارێزگاکا جە کەرکوکەنە ملۊڕاوە و سەعات ٧:٠٠و سەر سەعبوو ئارۊی دەنگدای تایبەتوو پرۆسەکەی دەسشپنەکەرڎ و ڕۊو دووەشەممەیچ دەنگدای گرڎیی ملۊڕاوە.
دماو ٤٥ ڕووا جە بانگەشەو هۊرچنیەی ئەنجوومەنوو پارێزگاو کەرکوکی هېزی سەعات ٦ سەرسەعبی بانگەشەو هۊرچنیەی بە شێوېوە ڕسمی جە تەرەفوو کۆمسێۆنوو سەربەخۆو هۊرچنیەکاو عێراقیۆ مردا و ئارۊیچ سەعات ٧ سەرسەعبی دەنگدای تایبەت دەسشپنەکەرڎ.
جە دەنگدای تایبەتوو ئارۊینە هێزە ئەمنیەکۍ پۆلیس، سوپا، وەرگری شارستانی، حەشدی شەعبی و تەماموو کەرتەکاو وەزارەتوو دلېینە و وەرگری بەشدارېنۍ، مافوو دەنگدای تیابەتیشا هەن.
بەپاو زانیاریەکاو کۆمسیۆنوو سەربەخۆو هۊرچنیەکا عێراقی، شاروو کەرکوکیەنە ٥٧ هەزار دەنگدەرۍ تایبەتۍ هەنۍ، پۍ ئا پرۊسەیچە ئارۆ جە کەرکوکەنە ٢٦ بنکۍ و ١٣٥ ویستگۍ دەنگ دای ڕووەو دەنگەدەرا تایبەتیرە کریێوە.
ئانەی یاگۍ ئاماژەیا هۊرچنیەو ئەنجوومەنوو پارێزگاو کەرکوکی دماو ١٨ ساڵا پۍ جاری یووەمیا ە شاروو کەرکوکینە ملۊڕاوە، چونکی وەڵتەر بە بەهانۍ ئاژەو تایبەتی مەنتیقە کوردسانیە کېشە جە سەرەکا بەینوو حکومەتوو عێراقی و هەرێمی بە تایبتەیچ کەرکوک جە هۊرچنیەی بێ بەش کریان.
دماو ڕووەدایەکا ڕیفراندۆم و ١٦ و ئۆکتۆبەری، پارێزگارێوە بەوەکالەتی عەرەب سەروو شارەکەیرە سەپیا پۊکەی قەوارە و لایەنە سیاسیەکۍ کوردی بە گڕووتینۆ هەرمانە پۍ ئانەی کەرا کە فرەتەرین خەڵکی بەرا سەروو سنوقەکا دەنگدای و فرەتەرین ڕیژەو دەنگی بە دەس بارا.
بە پاو زانیاریەکاو ئۆفیسوو کەرکوک و کۆمسێۆنوو باڵاو سەربەخۆو هۊرچنیەکا عێراقی: شاروو کەرکوکینە یەک ملۋېنوو ١٥٣٠٠٠ کەسۍ مافوو دەنگدایشا هەن، بە پاو دماین ئامارەو کۆمسێۆنی تا هېزی ٨١٣٠٠٠ کارتۍ بایۆمەتریۍ ئاماڎەکریېنۍ پۍ هاموڵاتیا، چا ژمارەیچە ٪ ٧٥ هاموڵاتیا کەرکوکی کارتەکېشا هۊرگېرتێنۍ.
قەرارا ڕۊو ١٨و ئی مانگۍ دەنگدای گرڎیی پۍ هۊرچنیەکاو ئەنجومەنوو پارێزگاکاو عێراقی (جگە جە پارێزگاکاو هەرێم)ی بلۊڕاوە.
