وێرەگاو ئارۊی، ناوەند و کتێبخانەو دیالۊگینە شاروو کەرکووکوو پانیشتوو کوردستانینە، بە ئامادەبییەی زیاتەر جە ٥٠ کەسا نویسەر و ئەدیب، کەسایەتیۍ وەڵاتپارێزن، ڕۊنامەنویس، چالاکۍ بوارەکاو ژەنا و گەنجا و گلێرگەی مەدەنی، کەسایەتیی ڕۊشنویرۍ شاروو کەرکوکی و هۊگراو کتێبی، ساڵیاڎوو گەشمەرڎاو کۊکوشیی پاریسینە، مەراسیمێوە ئشناسای و دابەشکەرڎەی کتێبوو (ژیوایم هەمیشە کۊشیای بێ) لوا ڕاوە.

مەراسیمەکە لاو ڕێکوزیاو ژەنە ئازاداو کوردستانی (ڕەژاک)یوە ساز کریابێ، یاگۍ ئاماژەینە کتێبوو"ژیوایم هەمیشە کۊشیای بێ" نویستەی شۊڕشگێڵنۍ تیرۊرکریۍ گەشمەرڎە ساکینە جانسزێن، باس جە ژیوای و کۊشیاییش و دۊزوو کوردی کەرۊ.

١١ ساڵۍ چیوەڵتەر، ساکینه‌ جانسزە ئشناسیۍ بە "سارا"، دماو نزیکەو ٤٠ ساڵا کۊشیای،چەنی هامڕایاش  فیدان دۊغانۍ ئشناسیۍ بە "ڕۊژبین"ۍ و له‌یلا شایله‌مه‌زۍ ئشناسیۍ بە "رۊناهی"یێ،  ٩ کانوونوو دووه‌موو ٢٠١٣ وڵاتوو فه‌ڕه‌نساینە به‌ پیلانگێڵنیێوە  وه‌رفراوانی میانده‌وڵه‌تی گەشمەرڎۍ کریێ.

ئەوەڵوو مەراسیمەکەی بە دەیەقێوە مردای پەی گیانی پاکوو گەشمەرڎاو ڕاو ئازادیی دەسش پەنە کەرد، دماتەر لاو "ڕوناک مەجید"ێوە ئەندامەو ئەنجوومەنوو ڕێکوزیاو ژەنە ئازاداو کوردستانی (ڕەژاک)، باس جە ژیواینامەو گەشمەرڎە ساکینە جانسزۍ و هامڕایاش کریا و کتێبوو "ژیوایم هەمیشە کۊشیای بێ" بە ئامادەبییا مەراسیمەکەی ئشناسنیا.

لە مەراسیمەکەنە ڕوناک مەجیدە ئەندامەو ئەنجوومەنوو (ڕەژاک)ی، سەبارەت بە ژیواینامە و کتێبەکەو گەشمەرڎە ساکینە جانسزۍ واتش: " ساکینە جانسزە ژەنە کۊشەرەو کوردی ماوەو نزیکەو ٤٠ ساڵا ژیوایش دلۍ کۊشیایی ئازادخوازی گەلوو کوردی و ئینسانیەتینە کتێبێوەش بە نامۍ (ژیوایم هەمیشە کۊشیای بێ) نویستەن، پێسە وێش واتەنش، کتێبەکەش بەرهەموو خەبات و ڕەنجوو ئەوەڵوو جمیەروو ئازادی، مدرامانوو زیندانەکا و مەیدانەکاو کۊشیاین.

حەرپاسە نامیبریۍ سەبارەت بە ژیوایی ئا ژەنە شۊرشگێڵنۍ واتیچش: "ژیوای و کۊشیای گەشمەرڎە ساکینە جانسزۍ هامڕا "سارا"ی،  کاریگه‌ریێوە قەوەتش هەن‌، هه‌ڵوێستی سه‌ربه‌رز و شه‌ره‌فمه‌ندانه‌ش و وەشەسیایش پەی ئینسانی فرە جیاوازا‌، هه‌نگامە پەڕ جە ئیراده‌کێش، پشوودرێژییه‌که‌ش و گژیایش پاسەش کەرڎەن بیاوۊ پا حاسە بۊ بە یوە چا ژەنه‌ قەوەت و به‌توانایا جە ئەرەمەرزنای پارتوو کرێکاراو کوردستانینر دەورش بۊ و زیاتەر جه‌ یەرۍ چاره‌کاو عومریش و گیانیش به‌ ئازادیی ژەنۍ و گه‌له‌که‌یش به‌خشۊ".

ئینجا ڕوناک مەجیدە درێژەو قسەکاشنە سەبارەت بە ژیواینامەو ژەنە گەشمەرڎۍ شۊڕشگێڵنۍ ساکینە جانسزۍ واتش: "گەشمەرڎە ساکینە جە ئەوەڵوو عومریشۊ کەوتە ملەملۍ چنی کولتووری و خانەوادەکەیش، ئامانجش بۍ خەبات کەرۊ پەی ئازادیی گەلەکەیش، وەروو ئانەی ساکینە ورقوڵیۍ کۊکوشیی دێرسیمی بێ، ئەوەڵوو چالاکییەکاش نە وەختۍ دەس پەنە کەرۊ کە شاروو ئیزمیرینە پێسە کرێکارێوە هەرمانگێوەنە هەرمانە کەرۊ و دلۍ کرێکارەکانە هەرمانەو ڕێکوستەیچ کەرۊ و ڕاپیمایێوە کرێکارانە دروشموو "کوردستان ئەرەگیر کریان"ی بەرز کەرۊوە، سەروو ئا هەڵوێستەیە و دروشمەیە زیندانییە کریۊ".

ئاخرۊ، ڕووناک مەجیدە واتش: "ئێمەیچ بتاومۍ ڕاو ساکینەکا و لەیلا قاسمۍ و ئایشە گوڵەکا حیچ وەخت وەرە نەدەیمێ، چونکوم ئی ڕۍ کۊشیایێوەنە پەی گەلوو کوردی، پەوکای خەباتوو ئێمە و خەباتوو ساکینەکا بەرڎەوامییش هەن پەی ئازادیی ژەنۍ و گلێرگەی و ئازادیی ژیوای، ئی کتێبەیچە پێسە خەڵاتێوە مدەیمۍ بە ئامادەبییا تا بیاواشنە و پەیڕەوکەرڎەیی ژیواینامەو ساکینە جانسزێنە بتاومۍ ژەنۍ و کناچاو گلێرگەکەیما هەمان ڕۍ گێرا، چونکوم ئەگەر یانەو وێماوە دەس پەنە نەکەرمۍ حیچ وەخت مەتاومۍ سەرکەوتۍ بیمێ".

دماو سیمینارەکەی دەربارەو ژیواینامەو گەشمەرڎە ساکینە جانسزۍ و گەشمەرڎاو کۊکوشیی پاریس، حەر یەرە بەرگوو کتێبوو (ژیوایم هەمیشە کۊشیای بێ)  گەشمەرڎە ساکینە جانسزۍ پێشکەشوو ئامادەبییا مەراسیمەکەی کریا.

یاگۍ واتەینە، کتێبوو " ژیوایم هەمیشە کۊشیای بۍ " یەرۍ بەرگێن، سەرجەموو لاپەلەکاشا ٢٢٠٠، چاپوو یوەموو بەرگوو یوەمیش ساڵەو ٢٠١٧ وەڵا کریاوە، دماو لوایۊپۊرەیۍ وردی پەیش و ورگێڵنایش هه‌ردووە به‌رگه‌که‌ی وەڵا کریاوە.