دەوڵەتوو تورکی مەنتێقەو سەیسادەقوو سەر بە سلێمانیینە سەیارێوە ڕۆنامەواناش کەرد ئامانج، ڕۆنامەوانێ گولستان تارا و هێرۆ بەهادینە مەردێ و ڕۆنامەوان ڕێبین بەکر (٣٠ ساڵ)ە خەڵکوو سلێمانی کە وەرپەرسوو  میدیای دیجیتاڵیی دەزگاو چەترین، بریندار بی.

کۆمەڵەو ڕۆنامەوانە ژەناو میزۆپۆتامیای (مەکەگە) و کۆمەڵەو ڕۆنامەواناو دیجلە فورات (دەفەگە) بە ئەرەیاوناێوە هجوومەکەشا شەرمەزار کەرد.

ئەرەیاونایەکەینە ئامان: "ئینە ئەوەڵین هجووم نییەن سلێمانینە دژوو ڕۆنامەوانا مکریۆ، ٤و تشرینوو یوەموو ٢٠٢٢ێنە ئەندامەو ئەوەکۆڵیای ژەنۆلۆجی و ئەکادیمیسیانە و ڕۆنامەوانە ناگیهان ئاکارسەلە ڕاو هجوومی چەکداریوە وەردەموو یانەکەیشنە کوشیا".

ئاماژەیچ پانەیە مکەرۆ ٢٠و تشرینوو دوەموو٢٠٢٢ێنە دێرکوو سەنیشتینە و وەرکەوتوو سووریاینە هجومی عاسمانی دەوڵەتی ئەرەگیروو تورکینە، پەیامکیانوو ئاژانسوو هەواڵوو هاواری، عیسام عەبدوڵا و ٩ کەسێ مەردێ و ٣ێچ بریندارێ بیێ.

ئینجا ٢٤و ئابینە سەروو ڕاو قامیشلۆ-عامودایوە سەیارێوە ژەن تیڤی کریا ئامانج و نەجمەدین فەیسەڵ حاجی گیانش جەدەس دا.

 ٨ و تەموزوو ٢٠٢٤ شەنگالەنە هجوومێونە پەیامکیانوو چرا تیڤی موراد میرزا ئیبرایم گیانش جەدەس دا، خەباتکارێ چرا تیڤی مەدیا حوسەین و خەڵەف خدر بریندارێ بیێ.

ئەرەیاونایەکەینە ئامان: " ئازادیی چاپەمەنی یۆن جە پایەکاو گلێرگەی دیموکراتی. هیچ فشار و هەڕەشێوە نمەتاوۆ ڕۆنامەواناو ڕاو حەقیقەتی و ڕاسی کپ بکەرۆ".

ماچۆیچ: "ڕۆنامەوانێ گوڵستان تارا و هێرۆ بەهادینە و عیسام عەبدوڵا و نەجمەدین فەیسەڵ حاجی و موراد میرزا ئیبراهیم پەی یاونای راسی بە گلێرگەی، فیداکارانە هەرمانەشا کەردێنە و گیانسا پەی بەخشان،بە قەڵەم و کامێرەکاما یادشا بەرز مرمانمێ".

مەکەگە و دەفەگە داوا وەنەو ڕێکوزیا میاننەتەوەییەکا مکەرا،کە هەرمانەو وێشا بیاونا یاگێ،کە تاوانبارێ بێ سزا بەرێنەشا،هومێدوو خاسبییەیوە پەی بریندارەکا موازا و سەرەوەشی وەنەو بنەیانەو گەشمەردەکا مکەرا، ماچا:" سەرەو ڕێزی مکۆمنمێرە پەی یادوو گوڵستان تارێ و هێرۆ بەهادینێ و عیسام عەبدوڵای و نەجمەدین فەیسەڵ حاجی و موراد میرزا و ناگیهان ئاکارسەلێ".