کەسایەتییەکاو کەرکووکی، دژوو دەسدرێژییەکاو دەوڵەتی ئەرەگیروو تورکیای جوابشا داوە و داوا جە گلێرگەی میاندەوڵەتی کەرا، سنوورێوە پەی دەسدرێژی و پاشێلکارییەکاو دەوڵەتی ئەرەگیروو تورکیای بنیارە.
وێرەگاو هیزی چوارشەممەی جە سەنتەروو ڕۊشنویریی شاروو کەرکووکینە، جە پانیشتوو کورڎسانینە، نزیکەو ٢٠ کەسا بە نامۍ ئەنجوومەنوو کەرکووکیوە، کە پێکۍ ئامێبێنۍ جە ڕۊشنویرا، نویسەرا، سیاسەتمەدارا، ڕۊنامەنویسا، مامۊسایا و کەسایەتییە کۊمەڵایەتییا و کەسانۍ وەڵاتپارێزنۍ شاروو کەرکووکی، هەڵوێسوو وێشا دژوو دەسدرێژییەکاو دەوڵەتی ئەرەگیروو تورکیای ئەرەیاونا.
کەسایەتییەکاو شاروو کەرکووکی جە کۊنگرێوە ڕۊنامەوانینە، دژوو هجووم و دەسدرێژییەکاو دەوڵەتی ئەرەگیروو تورکیای و پاشێلکەرڎەی سەروەریی خاکوو کورڎسانی و عێراقی، ئامێوە جواب و داواشا جە گلێرگەی میاندەوڵەتی کەرڎە، سنوورێوە پەی دەسدرێژی و پاشێلکارییەکاو دەوڵەتی ئەرەگیروو تورکی بنریۊرە.
ئینجا داواشا کەرڎە، کە ماددەو ١٤٠وو دەستوری جابەجا کریۊ، جە مەنتێقە کورڎستانییەکاو جبەروو هەرێموو کورڎسانینە، ئیدانەو حەوڵۍ بەعەرەبکەرڎەی کەرکووکیشا کەرڎە، جە لاو پارێزگاری سەپیاو کەرکووکیوە، کە خەریکوو بەعەرەبکرڎەی کەرکووکین و داگیرکەرڎەی زەمینوو کوردی و تورکمانین بەتایبەتی جە مەنتێقەکاو تۊپزاوەی و تەڕکەڵانینە.
گەرەکشا نییا کەرکووکنە دەستوروو دماو وڕیای بەعسی هەرمانەش پەنە کریۊ
جە کۊنگرە ڕۊنامەوانییەکەنە، "عەبدولڕەحیم حەسەن" بە نامۍ ئاماڎەبییاوە بەیاننامەو کەسایەتییەکاو کەرکووکیش واناوە، کە دلێشنە ئامابێ: "جە وەختێوەنە یادوو وڕیای ڕژێموو بەعسی کەرمێوە، هومێدی فرەما بۍ، کە دماو وڕیای ڕژێموو بەعسی گەلاو عێراقی بە مافە یاسایی و دەستورییەکاشا بیاوا، بەتایبەتی دماو نویستەیۊ دەستوروو عێراقی جە ساڵەو ٢٠٠٥ینە، کە تەماموو گەلاو عێراقی دەنگشا پی دەسوورییە دا، پەی مسۊگەرکەدەی مافە ڕەوایەکاشا، بەڵام کەسانێوە هەنۍ شاروو کەرکووکینە گەرەکشا نییا دەسووروو دماو وڕای حیزبوو بەعسی بەرقەرار بۊ، کە دلێشنە ماددەو ١٤٠وو دەسووری، کە بۊ بایسوو دماییئامای ملەملۍ تاریخییەو ئشناسنامەو کەرکووکی".
ئیدارەو کەرکووکی سەروو بنەماو نەتەوەی نادادپەروەری کەرۊ
ئینجارە "عەبدولڕەحیم حەسەن" سەبارەت بە گەندەڵەییەکاو ئیدارەو کەرکووکی جە سەیەو پارێزگاری سەپیاو کەرکووکینە واتش: "سەرەڕاو بییەی واریاتێوە فرەی جە شاروو کەرکووکینە، مشکیلەو داگیرکەرڎەی زەمیناو هاموەڵاتییە کورڎا و تورکمانا هەن، بەتایبەتی جە مەنتێقەکاو تۊپزاوەی و تەڕکەڵانینە، حەرپاسە مشکیلەو نەبییەی خزمەتگوزاری هەن و ناهامسەنگییچ هەن جە پێشکەشکەرڎەی خزمەتگوزاری بە پێکئامایەکاو شارەکەینە، ئینەیچ بە مەڵامەتوو نادادپەروەری ئیدارەی و پارێزگاروو شارەکەی وەراوەروو نەتەوەکاو کوردی و تورکمانی".
تورکیا ڕوانە فشار وزۊ سەروو گەلاوعێراقی
حەرپاسە سەبارەت بە بەرڎەوامیی دەسدرێژی و پاشێلکەرڎەی سەروەریی عێراقی و هەرێموو کورڎسانی لاو دەوڵەتی ئەرەگیروو تورکیایۊ "عەبدولڕەحیم حەسەن" واتش: "سەرەڕاو قۊرتەکاو دلۍ قۊرتۍ گەورەتەرێچ یەخۍ گەلاو عێراق و کورڎسانی گێرا، کە ئادیچ ئا دەسدرێژیێنۍ، کە کریا سەروو خاکی مەبارەکوو کورڎسانی بەتایبەتی جە لاو دەوڵەتی ئەرەگیروو تورکیایۊ، پەوکای داوا جە گلێرگەی میاندەوڵەتی کەرمۍ کە سنوورێوە پەی دەسدرێژی و هجوومەکاو دەوڵەتی ئەرەگیروو تورکیای بنیۊرە، کە تورکیا ڕوانە فشار وزۊ سەروو گەلاو عێراقی جە ڕاو بۊمبارانکەرڎەی شارەکاو کورڎستانیوە بە تەیارەی هەمەنۊعە و وستەیرەی سنوورەکا".
ڕەفتارۍ و کرڎارەکاو دەوڵەتی ئەرەگیروو تورکیای دوژمنکارانێنێ
جە درێژەو قسەکاشنە سەبارەت بە بەرڎەوامیی دەسدرێژییەکاو دەوڵەتی ئەرەگیروو تورکیای پەی سەروو خاکوو کورڎسانی، نامێبریا ئاشکراش کەرد: "تورکیا دەس مەپارێزنۊ جە هجووم پەی سەروو خاکوو کورڎسانی، کە دمایین دەسدرێژیش هجوومە ناڕەواکەو سەروو تەیارەخانەو سلێمانین، ئێمە ئا ڕەفتار و کرڎاراو تورکیای بە دوژمنکارانۍ مزانمۍ، چەنی ئانەی دەسدرێژییەکاو تورکیای سەرکۊنە کەرمۍ داوا جە ناوەندە میاندەوڵەتییەکا و ڕێکوزیایەکاو مافوو مرۊڤی و لایەنە پەیوەندیدارەکاو هەردووە حوکمەتا عێراقی و هەرێموو کورڎسانی کەرمۍ، کە سنوورێوە پەی دەستدرێژییەکاو دەوڵەتی ئەرەگیروو تورکیای بنیارە و سەرکۊنە و سەرزەنشتش کەرا".
داگیرکەرڎەی خاکوو وەڵاتا خەتەی سوورەنە
جە ئاخرۊ "عەبدولڕەحیم حەسەن" بە نامۍ کەسایەتییەکاو کەرکووکیوە واتش: "داوا جە مینگە میاندەوڵەتییەکا و ڕێکوزیایە میاندەوڵەتییەکاو تایبەت بە مافوو مرۊڤی کەرمۍ، کە داوا جە هەردووە وەڵاتاو تورکیای و ئێرانی کەرا، کە بە سیاسەت و ڕەفتارەکاو وێشرە بلۊوە وەراوەر بە گەلاو عێراقی و کورڎسانی، هجوومۍ و کوشتەی خەڵکی بێتاوانی و سڤیلی و داگیرکەرڎەی خاکوو وەڵاتای تەری خەتەی سوورەو مینگە میاندەوڵەتییەکانە ".
س.ز
