کتێبو ”کەشکۆڵی شاعیرانی هەوارمان“ی کە جە نویستەی و کۆکەردەی نویسەر و شاعیر و پەیجۆرکار (محەمەد ڕەشید ئەمینی)نین و ژیوای و سەرگوزەشتێ و بەرهەمێ ٢٦ شاعیران جەوەێش مەگێرێون، چاپ و وەڵاو کریاوە و کتێبخانەو هەورامانی و کوردستانیش پنە؟زەنگین تەر کریا.
ماوێوەن جە وەرهۆرزو هەورامانی بە تایبەتی جە شارەکێ پاوە-ی و مەریوان-ی و سنە-یەنە، نویستەی کتێبێ بە زوانی هەورامی و چاپ و وەڵاوکەردەیشان پەرەش ئەسانان و ماوە ماوە بە چاپ یاونای و وەڵاوکەردەی کتێبێوی نۊینی هەورامی، کتێبخانەکێ هەورامانی و کوردستانی وناریاوە و زەنگین تەرێ مەرکریانێ.
جە ئی چوارچێوەنە پەلیانەو سەلام پاوەی وەڵاوش کەردەنەوە: کتێبو ”کەشکۆڵی شاعیرانی هەوارمان“ی کە جە نویستەی و کۆکەردەی، نویسەر و شاعیر و پەیجۆرکاری هەورامانی مامۆستا (محەمەد ڕەشید ئەمینی)نین، چاپ و وەڵاو کریانەوە و جە بازار و کتێب-ۋرەشیەکێ هەورامانی و کوردستانیەنە وەردەستەن.
کتێبەکە کە ٦٤٨ لاپەلێن و سازی چاپ و پەخشو کوردستانی جە سنە ئەرکو چاپ و وەڵاوکەردەکەیش جە ئەستۆگێرتەن، میانشەنە ژیوای و سەرگوزەشتێ و بەرهەمێ ٢٦ شاعیران جەوەێش مەگێرێون، کە نامێ و شیعرێ بڕێ جە شاعیرەکان پەی یەکەمین جارین وەرو گۆشی بگنانێ و بنویسیانێ و چاپێ و وەڵاوێ بکریانێوە کە نامێ ئاندیویشان بە ئی جۆرەنێ: :میرزا مەحمود مستەوفی، میرزا مەحمود بادفری دووریسانی،محەمەد کوره درەیی، شێخ مستەفا تەختەیی، میرزا شەفیع کولیایی، میرزا شەفیع پاوەیی، محەمەد ڕەزا پاوەیی، غەمین (غەمگین)، سەید ئەحمەد بەگی ئێناخی، میرزا نامی....ت د.
هەرپاسە کەشکۆڵەکە ژمارێو شیعرێ تازێ و وەڵاونەکریێ شاعیرانێنوی چوون: بێسارانی، خان ئەڵماس خانی کەنۆڵەیی، صەیدی هەورامی، خانای قوبادی، ئەحمەد بەگی کۆماسی-چش، چنەنێ کە بە کۆشش و مانیای مامۆستا (محەمەد ڕەشید ئەمینی) کۆکریێنێوە و تا ئیسە جە هیچ لایێ تەرەنە چاپێ و وەڵاوێ نەکریێنێ و یان فرە کەمتر ئەژنەویێنێ و کەم تەر زانیاریێ دەربارەشان بییەن.
