کوشیای و برینداربییەی٧ کۆڵبەرا نەوسوودەنە
ئەنجاموو تەقەو گولــلەو هێزەکاو ئێرانیوە سنووروو نەوسودەو کرماشانینە، کۆڵبەرێوە کوشیا و شش کۆڵبەرێ تەرێ بریندارێ بیێ.
بە پاو زانیارییەکا بەرەبەیانوو ئارۆی هێزەکاو دەوڵەتوو ئێرانی سنووروو نەوسودێنە تەقەشا وەنەو پۆلێو کۆڵبەرا کەردەن و کۆڵبەرێوی خەڵکوو سەلاسوو باوەجانی بە نامێ ئەیوب محەمەدیوە کوشیان.
ئاماژە پانەیچ کریان، کە چا تەقەنە شش کۆڵبەرێ تەرێ بریندارێ بیێنێ، کە سەرجەمشا خەڵکوو دەگاو زیرانوو سەر بە جوانڕۆینێ.
بەپاو ئامارەکاو کۆڵبەر نیوزی جە شش مانگوو ئەوەڵوو ئێساڵینە ٣٤ کۆڵبەرێ کوشیێنێ و ٢٣٦ کۆڵبەرێچ بریندارێ بیێنێ.
جە کۆو ئا ٢٧٠ کۆڵبەرە کوشیا و بریندارانە، ٢٠شا ئینێ واروو ١٨ ساڵیوە.
ئامارو کوشیای و برینداربییەی کۆڵبەرا شش مانگوو ئەوەڵوو ساڵەو ٢٠٢٤ بەراورد چەنی ئاماروو ماوەو هامشێوەو ساڵێ وەڵینێ سەدەنە ٢١٨ زیادش کەردەن.
