٢٧ ڕێکوزیێ چاپەمەنیێ میان نەتەوەیی دژوو گێرتەی و فشاروو سەروو ڕۆنامەوانە کوردەکا ئەرەیاونێوەشا وەڵاکەردۆ و واتشا: "پێویسا تورکیا یاساکاو دادگاو مافوو مرۆڤوو ئەوروپای جابەجێ بکەرۆ و دەس جە بەئامانج گێرتەی میدیاو کوردی هۊرگێرۆ".
٢٧ ڕێکوزیێ چاپەمەنی میان نەتەوەیی، دلێشانە ئینستیویتی چاپەمەنی میان نەتەوەیی، کۆمەڵەو میدیا و خەباتی یاسایی، ناوەنڎوو ئازادی چاپەمەنی و میدیای ئەوروپی، یۆبیەی ڕۆنامەوانا و ئەرەیاوناکاو جیهانی، پەیوەس بە گێرتەو پەیامنێراو ئاژانسوو میزۆپۆتامیای محەمەد ئاسڵان و ئەسرا سۆلین دالە و ڕۆنامەوان ئەردۆگان ئالایوماتی ئەرەیاونێوە هامبەششا وەڵاکەردۆ.
ئەرەیاوناکە سەرنج وزۆ سەروو ٣ ێ ئایاری ڕۊو جیهانیی ئازادیی چاپەمەنی و فشاروو سەروو خەباتکارا چاپەمەنی ئازادی، ماچۆ: "دەسوەردای خێراو ئازادی میدیایی جە ساڵەو ٢٠٢٢ یوە ٤٣ ڕووەدایێش تۆمارکەردێنێ کە ١١٨ ڕۆنامەوانێ و خەباتکارێ میدیایی ئەرەمەرزیا کوردییەکا کریێنێ ئامانج".
ئەرەیاۋناکەی داوا کەرۆ دەوڵەتوو تورکی هجووم و هەڕەشەکاش پەی سەروو ڕۆنامەوانا کوردی هۊرگێرۆ و بەپاو یاسای جمۆوە و سلامەتی ڕۆنامەوانا پارێزنۆ، ماچۆ: "حەرپاسە داوا کەرمێ دمایی بە پاشێلکەردەی خاڵەو ١٠ و پەیماننامەو مافوو مرۆڤوو ئەوروپای بارانۍ پەیوەس بە ئازادی کار و ئازادی میدیایی. پێویسا دەوڵەتی تورکیای وەرپرسیارێتییەکا پەیوەس بە یاساو چاپەمەنی و دەستووری کۆماری تورکیای و دادگاو باڵاو مافەکاو مرۆڤوو ئەوروپای جابەجێ کەرۆ و میدیای کوردی نەکەرۆ ئامانج. پیشەو ڕۆنامەوانی پێکئاوەرێ سەرەکی و بێ یاگەگیروو گلێرگەی دیموکراتیکین، پۊکەی پێویسا گردوو ڕۆنامەوانا دوور جە فشاری و بەشێوێوە ئازاد پیشەکەیشا ئەنجام بڎا".
