گلێرگەو ژەنا ئازاڎیی ۋەرکۆتوو کورڎەسانی سەرەڕاو شەرمەزارکەردەی تیرۆرکەردەی رۆنامەنوویسا گوڵستان تارا و هێرۆ بەهادینی جە لایەنو دەوڵەتو تورکی ئەرەگیریوە، ئەرەیاۋناش: " جەمۍ ژەنۍ هوشیارۍ پېسە رۆسیدا مێردینۍ، دەنیز فوراتۍ، گوڵستان تارۍ هێرۆ بەهاینی و پەخشان عەزیزیۍ.. ئەرکو رۆنامەگەری بە عالی جابەجۍ مکەرا، ئاڎۍ بە بەهاو گیانیشا، ژیۋای ئازاڎیشا سانان و کەردەنشا بە سەوقاتی پەی گلێرگەی."

هەرپېسە ئەرەیاۋنانیچش: " ڕاو گەشمەرڎە گوڵستان تارۍ و هێرۆ بەهادینی درێژەش هەن، چونکی ئاڎۍ پەی ڕۆشنکەردەیۆ گلێرگەی هەنگامەی فرێشا نیا و جە ۋەرا ۋەرو هیچ هرووژم و پەلامارێوەنە بێدەنگۍ نەبیۍ، کەواتە سەرو هەریۆ جە ئێمە ئەرکا کە درێژەپنەدەرۍ ڕاو ئاڎیشا بیمۍ و ڕا نەڎەیمۍ ئی بەشەو کورڎەسانی بۆ بە مېڎانێوە پەی جابەجێکەرڎەی سیاسەتی نامرۆڤانەو دەوڵەتو تورکی و خیانەتو بنەیانەو بارزانی. "

دەقو ئەرەیاۋناکەو کۆمیتەو ئەرەیاۋنای و چاپەمەنی گلێرگەو ژەنا ئازاڎیی ۋەرکۆتوو کورڎةسانی (کەژار)ی پی جۆرەنە:

دەوڵەتو تورکی فاشیستی نمەتاوۆ دەنگو ئازاڎیوازیی ژەنا کپ بکەرۆ

دەوڵەتو تورکی رۆ دماو رۆی هرووژمەکێش جە دژوو ژەنا جە گرڎوو بوارەکانە چڕتەرۍ مکەرۆوە و ئامانجو ئی هرووژما دلێنەبەردەی حەقەتینێوەن کە جارێوە تەر بە سەرمەشقایەتی ژەنا جە هەر چوار پارچەو کورڎەسانینە ئاشکرا بییەن. ئا ژەنۍ تاواشا جە کەشەکاوە تا جاڎەکا و جە شار تا دەگایەکا،  جە سەکۆ و ئەرەیاۋنایۆ تا زیڼانەکاشا کەرڎەن بە مېڎانوو مڎرامانی و جە گرڎ شۊنێنە دروشمەو "ژەنی، ژیۋای، ئازاڎیی" ماچاوە. ئا ژەنۍ تەرسی و بیمشا وستەن گیانو دەسەڵاتێوە فاشیستی پېسە دوڵەتو تورکی، کە گەرەکشا باڵاو قەڵەمی چەمنۆوە، بێدەنگی دەرواردو کەلیمۍ بڎۆ و هاوارەکا جە سینەشەنە خنیکنۆ. پەلامارەی ئاسمانیە و زەمینیە بە دڕندانەتەرین شێوە دژوو گەریلاکاو ئازاڎیوازی کورڎەسانی و تیرۆرو چالاکاو بوارە جیاجیاکا پېسە کۆمەڵایەتی، ژەنا، ئەرەیاۋنای و هاموڵاتیایچ نمونەی زەقو ئی پەلامارانۍ. جە حەقەتینەنە دوژمنایەتی دەوڵەتوو فاشیستی تورکی، جە دژوو ژەنا فرە ڕۆشن و ئاشکران. چونکی ژەنی سەربارو گرڎ سەرکوت و سانسۆرێوە بیێنۍ بە دەرچەو هیوای پەی تەماموو گلێرگەی ئازاڎیواز.

دەوڵەتو تورکی ئەرەگیری ئینا لاوازتەرین قۆناغەو ۋێشەنە، جە لێوە مڎرامان و ئەرەکۊشای گەریلاکاو ئازاڎیی کورڎەسانی بی بە مایۍ خوڵقنای دەسکۆتی گەورەی جە کورڎەسان، ۋەرکۆتوو میامېینی و جیهانەنە، بە جۆرێ ئاڎۍ بیۍ بە گەورەتەرین خاڵەو هیوای، جە لێوەتەرۆ ئا ڕۆنامە وانۍ راسیو  حەقیقەت درکنانە و پەرڎە سەرو درووەکا دەسەڵاتی ئەرەگیرکەری ماڵارە، تەرسی  فرێشا وستێنە دڵو حکومەتو ئاکەپەیۆ، حکومەتێ کە سەرو بنەماو دروا، دزی، دەسدرێژی،دەسسەرەرەگېرتەی و زەوتکەردەی گرڎوو مافەکا توێژەکاو گلېرگەی، ئەشکەنجە، گێرتەی و کۆمکوژی وەش بیەن، قەڵەم، کامێرا و سەکۆو رۆنامەوانا بە مەترسی پەی سەرو ۋێش مزانۆ، هەرپۊکەی هەوڵ مڎۆ کە هرووژم و پەلامارەکاش پەی ئی مێڎانوو ئەرەکۆشایە زیاڎ بکەرۆ و پەی ئەنجامدای ئا کردەو دڕندانا هیچ سنورێوە نمەشناسۆ.

جە لێوەتەرۆ بنەیانەو بارزانی سیاسەتی نامرۆڤانەو دەوڵەتو تورکی پانیشتەنە جابەجێ مکەرۆ و ئینا هەوڵوو ئانەینە تا رەوایەتی بە خیانەتەکاش جە دژوو گەلوو کورڎی بڎۆ. ئانەی ئارۆ پەدەکە مکەرۆش، جگە جە شەرمەزاری جە ئاینڎەیچەنە هیچ دەسکۆتێش پەی ئاڎیشا نمەبۆ. وە ئانەی ئارۆ ئەنجامش مڎۆ، رێک هۆرگیرو ئا پەیامەینە کە دەوڵەتو تورکی، کورڎیی ئازاڎیوازش کەردەن ئامانج. پەدەکەیچ ڕاش پەی ئی کردەوە وەحشیانۍ کەردەنۆ. رێک چا کاتەنە کە دووۍ ئەندامۍ ئەرەیاۋنای ئازاڎیی جە کورڎەسانەنە مکریا ئامانج، میدیاو سەر بە هێزەکاو دژەتیرۆرو پەدەکەی دروۍ وبانگەشەی بێ بنەماشا وەڵاکەردۆ، یۆ ئامانجش هوشیارکەردەیۆ گەلان و ئەویتەر نکۆڵی جە حەقەتینەکا.  چی ڕوۆ ئا ژەنۍ کە بیۍ بە دەنگو ئازاڎیوازی گلېرگەی، مکریا ئامانج. جەمۍ ژەنۍ هوشیارۍ پېسە رۆسیدا مێردینۍ، دەنیز فوراتۍ، گوڵستان تارۍ هێرۆ بەهاینی و پەخشان عەزیزیۍ.. ئەرکو رۆنامەگەری بە عالی جابەجۍ مکەرا، ئاڎۍ بە بەهاو گیانیشا، ژیۋای ئازاڎیشا سانان و کەردەنشا بە سەوقاتی پەی گلێرگەی. لێنزو کامێرەو دەنیز فوراتۍ، جگە جە راسی و حەقیقەتی ڕووە نەکەرۍ هیچ چێوۍ تەری. قەڵەمی قەوەتوو هێرۆ بەهادینی و گوڵستان تارۍ، قسۍ دڵ و ناخو گلێرگەی نویسێنێوە، رۆسیدا مێردینە کە تاواش حەقەتینەو ئەرەکۆشای ئازاڎیوازی پەی چڼەها جارا بیاونۆ ۋەرو گۆشا جیهانی و نویستەیاکا پەخشان عەزیزیۍ کە تاواشا بانۍ بە ڕانیشاندەرۍ ئازاڎیوازا، گرڎ یەک حەقەتینەی بەروزا و ئاڎیچ بریتیا چانەی "ژەنی هوشیارە، گلێرگەی هوشیار مکەرۆوە".

جە دمادمایینە سەرەڕاو شەرمەزارکەردەی ئی کردەوە دڕندانۍ دەوڵەتو تورکی فاشیستی، سەرەوەشی جە کۆمە:گلېرگەو رۆنامەنوویسا، بنەیانەو گەشمەرڎا و گرڎوو ژەنا ئازاڎیوازی مکەرمۍ و ئەرەیاۋنمێش کە ئی هرووژمۍ دەوڵەتو تورکی فاشیستی، نەک هەر نمەبا بە مایۍ وەڵابیەیۆ تەرسۍ و تۆقنای، بەڵکم بە پێچەوانۆ هەوڵ و ئەرەکۆشای سەرەمڕەو ئازاڎیوازاش چنە گنۆوە. جە ۋەرا ۋەرو ئا خیانەتەو بنەیانەو بارزانینە، مڎرامانۍ نمونەیی ئینا ئارانە کە نەک هەر کورڎەسانین، بەڵکم یاوان ب ئاستۍ جیهانی و رۆ دماو رۆی فراوانتەر مبۆ. بێگومان، ڕاو گەشمەرڎە گوڵستان تارۍ و هێرۆ بەهادینی درێژەش هەن، چونکی ئاڎۍ پەی ڕۆشنکەردەیۆ گلێرگەی هەنگامەی فرێشا نیا و جە ۋەرا ۋەرو هیچ هرووژم و پەلامارێوەنە بێدەنگۍ نەبیۍ، کەواتە سەرو هەریۆ جە ئێمە ئەرکا کە درێژەپنەدەرۍ ڕاو ئاڎیشا بیمۍ و ڕا نەڎەیمۍ ئی بەشەو کورڎەسانی بۆ بە مېڎانێوە پەی جابەجێکەرڎەی سیاسەتی نامرۆڤانەو دەوڵەتو تورکی و خیانەتو بنەیانەو بارزانی.