کۆردیناسیۆنو کەژەکەی ڕۆو پەیدابییەیی ڕابەرو گەلو کوردی عەبدوڵا ئۆجالانیش مەبارەک کەرد و داواش کە رڎە پەی "گەورەکە رڎەی هومێد و ئازایەتی" بانگەوازش کەرد، کەژەکە واتش: "ئێمە ٤ نیسانی ئامارنە پێسەو ڕۆو ئازاڎیی مەبارەک مکەرمێ".
کۆردیناسیۆنو کەژەکەی بە بۆنەو ڕۆو پەیدابییەی ڕابەرو گەلو کوردی عەبدوڵا ئۆجالانیوە ئەرەیاوناێوەش وەڵا کەردۆ و داواش کەرڎە "هەڵمەتەو ڕابەرێتی" قەوەتتەرە بکریۆ.
ئەرەیاونایەکە ئینەنە:
"٤ و نیسانی ڕۆو پەیدابییەی ڕابەر ئاپۆی، ئەوەڵ وەنەو ڕابەر ئاپۆی و ژەناو کوردی کە بە پارادایمو ژیوایی ئازاڎو ڕابەر ئاپۆی بیێ بە ساعیبو ئیرادەی، چا ڕۆڵا کە نامێ ئازاڎیینێ، جە گەلو کوردی کە پێسەو ولێوی سەرو تەوەنێوە زیان، جە گەلاو وەرکەوتو دلێراسینی دێرینی، جە گردو گەلاو جیهانی کە دژو سیستمو سەرمایەداری ڕووە مکەرانێ پارادایمی ئازاڎیپارێزنو ژەنێ و ئیکۆلۆژیکی و دیموکراتیکی، گردو هامڕایا کەشنە و زینداننە و شارەکانە مدرامان مکەرانێ، مەبارەک مکەرمێ. هومێدەوارێنمێ مانگەو نیسانی، کە مانگەو خێروبێرینە، وەهار و سرووشت مگەشیاوە، وەراوەرو ئا ژیوای سەرمایەدارییە گەرەکشا دلێشنە بەرۆ، بۆ مایێ گەشبییەیۆ بەهاکاو ئینسانیەتی.
ئێمە وڵاتپارێزنە بەڕێزا، هامڕا مسەفای و مەعسومی بەشکۆوە یاڎێ مکەرمێوە و سەرو بناغەو دماییئا رڎەی بە گێرتەی ئیمراڵینە، وەعد مدەیمێ دڵسۆزێ یاڎەوەرییشا بیمێ.
ڕابەر ئاپۆ هاموەخت چەنی هەڵوێستو مردایۆ وەراوەرو گردو چێوە سەپیایەکا، سەرەڕاوپەیدابییەی جەسەیی وێش بە پارادایمو ئازاڎیپارێزنو ژەنێ، دیموکراتیک و ئیکۆلۆژیک، بە عەشقو ژیوایۆ وێش واوەی خولقنا. زیندانو ئیمراڵیینە هەوڵێ مدا دەنگش کپ بکەرانێ و ڕو ئازاڎینە دوورش بوزاوە و ملکەچش بکەران، پی ئامانجۆ گۆشەگیریی مسەپنا، بەڵام دەنگش یاوان گردو جیهانی، ملوێنان کەسێش وستێ سەرو ڕاو ئازاڎی و پارادایمو ژیوای ئازاڎیش گردو جیهانیرە وەڵا کەردۆ.
بە پەیدابییەی یەرەمی دوورگەو ئیمراڵیینە، کاریگەریی یاگێش سەرو ئینسانیوە و بەرۆ نیارە، دلێ ئی سیستمەینە کە گرد چێوێ شت قڕ مکریۆ بانگەوازش جە گرد لاێوە کەرد، کە وێشا ئازاڎ موینان، ڕاسیی ئازاڎیی بیاوانە و پاسە بژیوانێ. ئانێ جە گرد لاێوە زیاتەر جە ئازاڎیی بێبەشێنێ، ئێمەی ژەنانمێ، پەوکای ئانێ پێویسا زیاتەر جە گرد لایێ گۆش بدا ئی بانگەوازەیە، ئێمەی ژەنانمێ. مشۆم بزانمێ پەی ئێمەی ژەنا ئازاڎی جە نانی و ئاوێ زەروورتەرا، مشۆم پی ئەنەیاوایۆ کۆشیەیمێ.
کۆشیای ئازاڎیما بە سەرمەشقایەتیی ڕابەر ئاپۆی دەسش پەنە کەرد و سەدەو ٢١ما کەرد بە سەدەو ژەنێ، ئینەیچ پەی ئێمەی ژەناو کوردی و گردو ژەناو جیهانیوە مانا و گرنگییێوە گەورەش هەن، ڕابەر ئاپۆ هێز و ئازایەتیێوەش دایمێ پەنە، کە بتاومێ وەراوەرو سیستمی سەرمایەداری و هەژموونگەرایی پیایۆ ئەرەپڕایمێ. ئارۆ ئی ئیرادە و ئازایەتییە کوردستاننە و تەمامو جیهانینە، دژو هەژموونو پیای و دەوڵەتی یانەنە و هەرمانە و مەکتەب و جادەکانە پێسەو درووشمو "ژەنی، ژیوای، ئازاڎی"ی بەرزێ مکریاوە.
ئا ژەنێ کە جە پەیدابییەی ڕابەر ئاپۆینە وێشا موینا، سەرمەشقایەتی جە هەڵمەتەو "ئازاڎیی پەی ڕابەر ئاپۆی، چارەسەری سیاسیی پەی پەرسەو کوردی" مکەرا، کە بییێنە بە هەڵمەتێوی گەردوونییە. ئی سەرمەشقایەتییەو ژەنا جە ورچنییەیە وێمانەکاوسەرنیشتو کوردستانینە و تورکیانە بەرکەوت، کوردستان بە ئیرادە و ڕەنگ و جۆشو ژەناوە ڕازیاوە. جە ئەدایاو ٧٠ ساڵەی تا کناچە گەنج و زارۆڵەکاما، ژەنی پی مدرامان و ئیرادە و جۆش و مۆراڵەوە ئەرەپڕێ و بە جیهانیشا وات "ئینەنە شۆڕش"، مەبارەکبایی ئی ڕەنج و سەرکەوتەیە جە تەمامو ژەنا مکەرمێ.
جە ورچنیەیە وێمانەکاو سەرنیشتو کوردستانی و تورکیانە گەلەکەما وەراوەرو حیچ فرتوفێڵێونە دەسبەردارو هەڵوێستەکەیش نەبێ، خاوەنداری جە ئیرادە و زوان و چاند و ڕابەرەکەیش کەرد، ئا ژەنێ دەسبەردارێ خەتەو هامسەرۆکایەتی نەبێنێ، سەرکەوتێ. گەلەکەما وەختو خەباتو ورچنییەی و دماو ورچنیەی دروشمو "بژیوۆ سەرۆک ئاپۆ"ـیش بەرز کەردۆ و پێسە سەرچەمەو سەرکەوتەی بە دەسەڵاتی فاشیستو ئاکەپە-مەهەپەی و جیهانی نیشانە دا. بە واتەی "ئێمە جە ڕابەر ئاپۆیۆ فێرێ مدرامانی و سەرکەوتەی بیینمێ"، سەرکەوتەی دژو فاشیزمیش کەرد بە دیاری ڕابەر ئاپۆی. گەل و ژەناو ئێمە وەراوەرو گردو فشار و فێڵەکاو دوژمنیوە سەرکەوتەیشا بەدەس ئاورد. ئێمە ئینایمێ چا باوڕەنە کە ژەنی وەراوەروو سیاسەتەکاو قەیومی و دەسبەسەرکەرڎەینە سەرێ گنا و بە مدرامان سەرێ گنا.
مزانیی گەریلای، سەرکەوتەی ورچنیەی گەلەکەیما و هەڵمەتەو ڕابەرێتی، کە بییەن هەڵمەتێوی میاننەتەوەیی، نیشانەش دا، کە پەیدابییەی جەسەیی ڕابەر ئاپۆی جە ٤ نیسانینە و پەیدابییەیۆی یەرەمی ئیمراڵیینە بیێنێ بە یۆ، یاوان ئاستێوی بەرزی مانایی و سەرەڕاو گردو هجوومە قێزەونەکاو دوژمنی، نیشانەش دا کە حەرگیز نمەگنۆ.
بە بۆنەو ڕۆو پەیدابییەی ڕابەر ئاپۆیوە بانگەواز وەنەو ژەنێ و گەنجا، بانگەواز وەنەو تەمامو گەلەکەیما و دۆسەکاما مکەرمێ هومێد و ئازایەتییشا گەورەتەر بکەرا، ئا خاکە بە هێزو ٤و نیسانی دەسما کەوتەن سەوز و جوانش بکەرمێ، ڕۆو پەیدابیەی ڕابەریما ئامارەنە پێسەو ڕۆو ئازاڎی مەبارەک بکەرمێ. ٤و نیسانینە پێوە هەڵمەتەو ڕابەرێتی بیاونمێ بەرزتەرین ئاست".
