کۆردیناسیۆنو کەژەکەی پېوەس بە ٨و ئاداری ڕۆو جەهانی ژەنە کرێکاراوە ئەرەیاۋنێوە نویسیاش وەڵاکەرڎۆ.

ئەرەیاۋناکەی پی جۊرەنە:

"بە جۆش و هیوایۍ گۊرۆ و ڕۆحو مڎرامانیوە پێشوازی جە ٨ـو ئاداری ڕۊو جەهانی ژەنە کرێکارا مکەرمۍ. جە کەسایەتی ڕۆز، سارا، سالیحە، نەسرینە و سەڤیم بیللیانەکانە کە بە کۊششە پیرۆزەکاشا میراتێوە ئازادیشا پەی جیائاستیمۍ و پەیشا خوڵقنایمۍ، بە ڕێز و پنەزانایۍ گۊرۆ گرڎو گەشمەرڎاما یاڎۍ مکەرمێوە و ڕۊو ٨و ئاداری ڕۆو جەهانی ژەنە کرێکارا جە گرڎو ژەنا پیرۆز مکەرمۍ کە بە سەرهۊردای، ئەشقو ئازادی و جۆشو خرۆش و ۋێشاوە کە جە ئیساتێوە ڕووەشا کەردێنە مێڎانەکا.

بە ڕێز و وەشەسیایۍ گۊرۆ سڵام جە هەمڕای بێهامتای و پارێزوانا ئازادیی ڕابەر ئاپۆی مکەرمۍ کە بە خوڵقنای تەڤگەرو ئازادیی ژەنا ڕۆحو ٨و ئاداریش هۊرچەرخنان دەسوەڵێوستەیۍ پا جۊرەنە کە گرڎ ڕوۍ چنەشەنە مژیومۍ.

بە گرڎو هێز و بیەو ۋێماوە بەشدارۍ "بانگەوازو ئاشتی و گلېرگەی دیموکراتیک"ـی ڕابەر ئاپۆی بیمۍ. سەرمەشقایەتی ژەنا جە سەرکۊتەی ئی پرۆسەینە پېسە ئەرک و شکۆمەندیێوە تاریخی موینمۍ. داوا جە گرڎو ژەنا مکەرمۍ بە ڕۆح و جۆشو ٨و ئاداریوە بەشداری بەشداربیەی جە بانگەوازییەکەی پېسە مانیسفێستۆو سەردەمی تەماشە بکەرا و بە سەرکۊتەی تاجدارش بکەرا.

ئەوەکۊشای ئازادییما جە ۋەرا ۋەر بە کەلتوورو پیاسالارینە کە بە کۆیلەکەردەی ژەنا تا نەواخنو گلێرگەی لووان، ڕا ۋەردەمو سەرجەنۆ ژیۋایۆ ژیۋایۍ ئازادی و گلېرگەی ئازادینە بکەرمێوە کە وابەسەو ئازادیی ژەنان. ژەنی کە جە سەرانسەرو جەهانینە بە فەلسەفەو 'ژەنی، ژیۋای، ئازادی' دەنگشا هۊربڕا و بە گێڵای هامبەش ئازادیی ئەوەکۊشای ڕاوەبەرمکەرا، جەهانی فاڕمۍ. پېسە ڕابەر ئاپۆ واتەنش؛ گرڎو تاریخو شارستانیەتی هامشێوەو ئا گوڵە ۋەروینەینە کە جە ۋەرا ۋەرو زمسانۍ سەردو ۋەروینەنە کە پەشتیش هێقمەنە بە ستەم و درۆکەردەی ۋەرا ۋەر بە ژەنا، ئا ۋەروۍ و بەستەڵەکیە موېیەرنۆنە و ئازادبیەی ژەنا پێکمارۆ."

 

شۆڕشو ژەناما بەرەو ئازادیی ملۆ، کە جە هەلومەرجو جەنگی یەرەمی جەهانینە کە جە لایەنو مۆدێرنێتەی سەرمایەدارییوە جۆشدریان و جە لایەنو کەلتوورو تێگەی هۆشمەندی پیاسالارییوە خوڵقیان، بەردەوامبیەی تاریخی بە پاو بەرژەوەندییەکا ژەنا فاڕیۆ و کەلتوورو ئازادیی ژەنا تازە مکەرۆوە. سەرمەشقی ژەنا مڎرامانکەری کە بە گرڎو بیەو ۋێشۆ بە عەشقێوە گۊرۆ بەشدارو شۆڕش و ئەوەکۊشای ئازادیی ژەنا بیەن، نەک بە تەنیا پەی ژەنا، جە فاڕیای گرڎو گلېرگەینە ئەرکێوە کاریگەر و یەکلاکەرەوەش جە ۋێش گێرتەن. جە کەسایەتی شۆڕشو ژەنا ۋەرنیشتینە، بە مۆدێلو ژەنۍ ئازادۍ و گلېرگەی ئازادی ئیتر ئیسپات بیەن کە مۆدێرنێتەو ژەنا دیموکراتیکی پېسە یاگەگیرێوە بەرکۊتەن و بیەن بە سەرچەمەو ئیلهامی و هیوای پەی گرڎو جەهانی. تاریخ سەرو خاکو میزۆپۆتامیایۆ شایەتی سەرجەنۆ ژیۋایۆ ژەنۍ ئازادۍ و ۋەهارو ژەنا مکەرۆ جە ۋەرا ۋەرو زمسانو تاریکو سیستەمو پیاسالاری و یاگەگیرکەردەی وەڵۍ وینای 'سەدەو ویس و یەکینە مەبۆ بە سەدەو ژەنا'و ڕابەر ئاپۆی پێکمارۆ.

پەکەکە کە جە سەرمەشقایەتی تەڤگەرو ژەنامانە، بە ئەوەکۊشای ئازادیی دوورودرێژی ٥٠ ساڵەیشۆ، بیەی، چارەسەری و ئازادیی پرسو کوردیش کەرد بە مەرامو ۋێش و چا سنوورەنە چنەشەنە ئەرەمەرزیان پڕاوە پەی سەرانسەرو جەهانی. پەکەکە کە چنی بانگەوازییەکەو ڕابەر ئاپۆی ئەرکی تاریخی ۋێش یاۋنا مەنزڵ، بە بنەماگېرتەی دەسکەوتەکا کە جە بەرژەوەندی ژەنا و گەلانە خوڵقناش، سەرو بنەماو سەرجە نۆ ژیۋایۆ و ئاواکەردەی گلېرگەی دیموکراتیکی هەنگامەکاش بەرەو ئازادیی منیۆ.

بۊنەو سەرکۊتەی 'بانگەوازو ئاشتی و گلېرگەی دیموکراتیک'ی وەڵۍ گرڎ چێوێنە جەختش جە مەیسەرکەردەی ئازادیی بەڎەنی ڕابەر ئاپۆی و پێکئاوردەی هەلومەرجو هەرمانکەردەی ئازادی، بە هۊرگېرتەی هەنگامنیای یاسایی پەنەوا و ڕەخسنای زەمینەی سیاسەتو دیموکراتیکی ئەرک و شەرتەکۍ پرۆسەکەیش کەردۆ. ئەرەیاۋنای ئایێربەسی کە دماو بانگەوازییە تاریخیەکەیۆ جە لایەنو پارتیما پەکەکەیۆ جە ڕوو وەڵێکۊتەی ئی پرۆسەیۆ بە شێوێوە سەرکۊتو زەمینێوە گرنگش ڕەخسنا. بەرمەبناو ئا زەمینەینە ڕەخسیان، مشۊم گرڎو پێکئامای و بەشەکا جە کوردەسان و تورکیانە بەشدارۍ ئی پرۆسەیە بانۍ و بانگەوازی تاریخی 'ئاشتی و گلېرگەی دیموکراتیک'ی دلۍ تەمامو گلېرگەینە یاگەگیر بۆنە.

بانگەوازو ڕابەر ئاپۆی؛ جە ۋەرا ۋەرو جەنگی جەهانی یەرەمو هێزەکاو مۆدێرنیتەی سەرمایەدارینە کە مېیانەکەش ئینا ۋەرکۊتوو مېیامینی و کوردەسانەنە، جە ۋەرا ۋەرو باڵادەسی پیایانە کە بە جەنگەکا بەهێز کریان و ۋێش دلۍ گرڎو گلێرگەینە نیشانە مڎۆ، جە ۋەرا ۋەرو کەلتوورو دەسدرێژی، کوشتەی ژەنا و جە ۋەرا ۋەر بە کلتوورو گرڎ جۆرە تنوتیژیێوە مەبۆ بە سەرکۊتەی کلتووری ئازادیی ژەنا. ئی بانگەوازە تاریخیە، چارەسەرکەردەی پرسو ئازادیی ژەنا بە ئامانج گێرۊنە. ژەنی، گەرەنتی سەرکۊتەی دیموکراسینۍ. بەبێ ژەنا ئاشتی کۆمەڵایەتی و دیموکراتیزەبیەی نمێنە دی. هەتا ویرکەردەیۆ و ڕوانگەو باڵادەسی پیایا ۋەرا ۋەر بە ژەنا و ئازادیشا نە فاڕیۆ و کێشەکۍ ژەنا چارەسەرۍ نمەکریا، کێشەکۍ دیموکراسی، ئازادییەکۍ، کێشە ژیۋگەییەکۍ و ئابوورییەکۍ چارەسەر نمەکریا. پەیوەندییەکۍ گەلاو کورد، تورک، عەرەب و فارسی، کە ئانە ٢٠٠ ساڵېن بە پیلانەو هێزەکا باڵادەسی پیایا مۆدێرنیتەو سەرمایەداری خراپۍ بیێنۍ، مشۊم سەرو بنەماو واوەی بنیاڎنیای گلېرگەی دیموکراتیکی، ئاشتیێوە شکۆداری و کلتوور و کۊششو ئازادیی ژەنا پێک بۍ.

پېوەس پینەیۆ، ئەرەیاۋنمێش کە بە هۆشیاری و ۋەرپرسیاری تاریخیما پەی پێگەو ستراتیجیما، جە گرڎ شۊنێنە بە سەفەربەری ڕێکوستەی، پەروەردە و چالاکییە دیموکراتیکەکا بەشدارۍ بانگەوازو ڕێبەر ئاپۆی پەی "ئاشتی و گلېرگەی دیموکراتیک"ی کە پەشتی بە ئازادیی ژەنا بینۆ، بیمۍ.

تەڤگەرەکۍ ژەنا جە سەرنیشتوو کوردەسانی و تورکیای جە ۋەراۋەرو سیاسەتە ڕەگەزپەرسەکا کە دژو ژەنا وەڵۍ وزیێنۍ، ئەوەکۊشایۍ گۊرەشا ڕاوەبەر کەردەن. دەورو تەڤگەرەکا ژەنا جە سەرنیشتوو کوردەسانی و تورکیانە ۋەرا ۋەر بە وەڵێکۊتەی ئی پرۆسەیە جە چوارچێوەو ئازادیی ژەنانە فرە گرنگا. بە نیایرەو بەرنامەکا ئازادیی ژەنا و ڕزگاری و بەشداریکەردەیشا پەی ئی پرۆسەیە بە شێوێوە ڕێکوستەکریا، چوارچێوەو پرۆسەکەی دیاری مکەرۆ. یۆ جە مەڵامەتە بنەڕەتییەکا نادیموکراتیکبیەی کۆماری، چارەسەرنەکەردەی کێشەو ژەنان.

دیموکراتیکبیەو کۆماری جە سەدەی دووەمەنە، بە بەشداری ژەنا پەی پرۆسەکەی بە ڕەنگو ۋێشا، دیدگاکاو چارەسەرییشا و هێزەکاشا پێک مۍ. تەڤگەرە دیموکراتیکەکاو ژەنا جە تورکیا، پېسە تەڤگەرەکاو ئاشتی پەی پرۆسەکەی، ڕووبەڕوو ئەرک و ۋەرپرسیاریێوە تاریخینۍ. پەی چارەسەرکەردەی کێشەکاو ژەنا و بنیاڎنیای گلېرگەی دیموکراتیکی، داوا جە گرڎو ژەنا تورکیای مکەرمۍ کە بە ئەرک و ۋەرپرسیاری تاریخی خاوەنداریی چی پرۆسەیە بکەرا و بە شێوێوە چالاکانە بەشدارۍ با. چنی دەسوەردایەکا سووریای و وڕای ڕژێمو بەعسی، پرۆسێوە تازە جە ۋەرکۊتوو مېیامینینە دەسش پنەکەرڎ. مۆدێلو گلېرگەی دیموکراتیک کە چنی شۆڕشو ژەنا ۋەرنیشتی بەرکۊت، ئڼەو پارێزنایەکا جە ۋەرا ۋەرو ویرو سەلەفی، هەلومەرجو وەڵابیەیشۆ پەی گرڎو سووریای و ۋەرکۊتوو مېیامینی پێکئامان. ئەوەکۊشای ژەنا سووریای دیموکراتیکی کە بە سەرمەشقایەتی تەڤگەرو ژەنا کە چنی گرڎو کەلتوور و گەلا پێکئامان، ڕاو کۆمارو سووریای دیموکراتیکی مکەرۊوە. پەی ئانەیچ ئێمە جەنگەوانا ئازادیی، ژەنا یەپەژەی کە چی پرۆسەینە جە ئەوەکۊشای دژ بە هێزە ئەرەگیرەکانە گەشمەرڎۍ بیۍ و ژەنا سەرمەشقۍ ئەرەمەرزنای یاڎۍ مارمێوە و سڵام جە مڎرامانیشا مکەرمۍ.

جە ئێران، درووشمو "ژەنی، ژیوای، ئازادی" بە سەرمەشقایەتی تەڤگەرو ژەنا وەرکەوتی بییەن بە فەلسەفەو ژەنا و ئەوەکۆشای گرڏو جەهانی. ئەوەکۆشای و عەشقو ئازادیی ژەنا جە وەرکەوتوو کوردەسانینە وەڵێ کەوتەن، ئنە بەهێزا کە بە زینان و سزاو جە قەنارەدای ڕادەس نمەبۆ. و شەریفە محەمەدی، کە نوێنەرایەتی کلتووری ئەوەکۆشای تەڤگەرو ژەنا کوردی و ئێرانی مکەرۆ، ڕاو کۆمارو دیوکراتیکو ئێرانی مکەراوە. فشار و بەربەسە کێ جە وەراوەرو ئەوەکۆشای ژەنا جە عێراق و سیاسەتەکێ کە دەسکەوتەکا ژەنا دلێنە بەرا، رۆ بە ڕۆ قووڵتەرێ باوە و هەوڵ دریۆنە بە تنوتیژی ژەنی کەرانە کۆیلە. جە وەراوەر و ئی سیاسەتا، ئەوەکۆشای تەڤگەرو ژەنا جە پانیشتوو و عێراقەنە، ڕا پەی یۆبییەو ئەوەکۆشای ژەنا مکەرۆوە. جە وەراوەرو ئا یاسایا کە بەرێ کریانە و کۆیلەکەردەو ژەنا پێسەو بنەمێ نریۆرە، چنی چالاکبییەو کاریگەر، ڕێکوزتەی و هۆشیاربییەیۆ، گلێرگەو دیموکراتیکو پانیشتی و عێراق ئەرەمەزیۆرە. ئەوەکۆشای تاریخی تەڤگەرەکا ژەنا ئێزدو شنگالی، ڕاسی جینۆسایدو پەنچ هەزار ساڵەو وڕنا و تاریخی جە نۆوە جە چوارچێوەو بەرژەوەندی ژەنانە منویسۆوە. بە ڕێکوزتەو وێشا بەرەو ئازادیی و بە تازەکەردەیۆ ئەشقو عەدوولە بەرەو سەرکەوتەی ملانە.

تەڤگەرو ژەنا کوردی جە گرڏ مێڏانەکا ئەورووپای و چبەرو کوردەسانی بە حەسرەتو وڵاتی و خەیاڵو وڵاتو ئازادی جە ئەوەکۆشاینە، دلێ جەهانی بییەو ئازادیی ژەنا و چارەسەرکەردەو پرسو کورد بییەی بە سردێ بەهێزو گۆرە. جە مییانو مۆدێرنێتو سەرمایەدارینە بە وزەو ئەوەکۆشایۆ جە دژو سیستەمینە پێسەو خوڵقناو ئاشتی و گلێرگەو دیموکراتیکی و هێزە سەرمەشقەکێ بەشدارێ بانە.

ئارۆ جە سەرانسەرو جەهانی، جە گرڏ کیشوەرەکانە و جە وەرکەوتوو دلێڕاسەینە هرووژمی سەختو پیاسالاری ئینا ئارانە و جە وەراوەرو ئی هرووژمانە جە لایەنو ژەناوە، تەڤگەرەکا ژەنا، و واڵاماوە ئەوەکۆشای بێهامتا ملۆڕاوە. جە ئیسەنە جە سایەو بییەو ئەوەکۆشای ژەناماوە، ئەخلاق، کلتوور، هێزو ژیوای و عەشقێ کە جەلایەنو ژەناوە زینە ڕاگیریان، جیهانما و مرۆڤایەتی هەناسێوە ئاسوودەی هور کێشانە.

پەی ئی ئامانجەیە ژەنی جە گرڏ و کاتەکا ژیوایشانە قوربانی مڏانە و بەردەوامێشەنێ. ئامانجو ئاشتی و گلێرگەو دیموکراتیکی، ویرو ژیوای ئازادی و زەریفی، گۆرەتەرین خەیاڵو ژەنێ، ئەڏێ و جوانامانە. داوا جە گرڏ ژەنا و، تەڤگەرەکا ژەنا مکەرمه کە بە ئامانجو ئازادییۆ مژیوا، هەنگامە منییا و سەرهور پڕا پشتگیری ئی پرۆسەیە بکەرا کە ئینا ئارانە. یۆبییەو ئەوەکۆشای ژەنا نەتەوەیی، هەرێمی و جەهانی، جەنگ و کلتوورو تنوتیژی پیاسالاری هورشێوناوە و سەدەو ٢١ـەمین فاڕانە سەدەو ئازادیی ژەنا.

پەنەوازا ئاشتی و گلێرگەو دیموکراتیکی پەی ژەنا فرە گرنگ بۆنە. هەڵمەتەو ،ژەنی ژیوای ئازادی بەرەو شۆڕشو ژەنا هەنگامە منییەیمێ'ـ. پێسەو ژەنا متاەمێنە بە زینەکەردەیۆ گلێرگەو دیموکراتیکی و سەرهوردای جە وەروەرو پیاسالاری جە گرڏ یاگێنە سیستەمو کۆنفیدراڵیزمو ژەنا مەرزنمێرە. ئیمکانو خاستەر وێپارێزناو بە ئاشتی و گلێرگەو دیموکراتیکین.

 بۆنۆ و ٨ـی ئاداری ڕۆو جەهانی ژەنە کرێکارا داواکاریی جە گرڏ ژەنا مکەرمێنە بە درووشمو 'بە ئەرەمەرزنارەو گلێرگەی دیموکراتیک، بەیدێ پێوەرە گرڏو ڕووەکاما کەرمێنە ڕۆو ژەنا' ڕووە کەرمێنە مێدانەکا  و جە وەراوەرو پیاسالارینە ئەوەکۆشمێنە، هۆشمەندیما گۆرە کەرمێنە.

سەرو خاکو میزۆپۆتامییای ئا وەهارەی کە بە ئەوەکۆشای ژیوایما خوڵقیان، پێسەو وەری مژدەو ژیوایۆ ژەنا مڏۆنە. پەیوەس پانەیە ٨ـو ئاداری ڕۆو جەهانی ژەنە کرێکارا جە گرڏ ژەنا موبارەک مکەرمێنە و هامبەشی جە سەرهوردای، جۆشوخرۆش و مڏارامانیشا مکەرمینە."