سەزای تەمەلی سەرۆک گرووپو دەم پارتی جە پەرلەمانەنە کۆنگرێوە ڕۆنامەوانیش ئەنجامدا و ڕۆژڤەکێش هورسەنگنێ.

تەمەلی جە قسەکاشەنە ئاماژەش پانەیەدا وەرکەوتوو دلێڕاسەی ئینا دلێ جەنگینە و ئامادەکاری پەی جەنگی جەهانی مکەرۆ و واتش: "جەهان رووبەڕوو جەنگێوە قورسو جەهانی یەرەمی بییەنۆ. ئینەیچ کاریگەری نەرێنی و قورسش سەرو ئابووری هەن. قەیرانی ئابووریچ گۆرەتەرین کاریگەری سەرو وڵاتە لاوازەکا مکەرۆ کە تورکیا یۆن جا وڵاتا."

بانگەوازەکەس عەبدوڵا ئۆجالانی ڕا نیشاندەرا

سەزای تەمەلی جە بەردەوامی قسەکاشەنە ئاماژەش پانەیەدا کە تاکە ڕا پەی چارەسەرو قەیرانەکا حەر جە ئەنجوومەنو نوێنەرا، جادەکێ و کارگەکا هەتا کێڵگەکێ بەرهەم ئاردەو ڕێککەوتەین بە یاوانەو گلێرگری دیموکراتیکی و واتش: " ئێمە پەنەوازیما بە زەمینێوە ڕێککەوتەو دیموکراتیکی هەن. ئی بانگەوازییە چکۆوە ئاما؟ جە ٢٧و شوباتینە جە ئیمرالیۆ ئاما. ئی پێناسە کە جە بانگەوازەکەو ئێژا ئۆجالانینە ئامان ڕا پەی پرۆسەو سیاسی جە ئایندەنە نیشانە مڏۆنە فرە گرنگا، پرسو ڕێککەوتەو دیموکراتیکی کە ڕا نیشاندەرا، مشۆم گرڏما بەئەنجامش یاونمێ. کەچی جەولاوە حکومەت هەوڵ مڏۆنە رێککەوتەو شارەکا بە تاوانە نیشانە دۆنە.

حکومەت جە ٢٧و شوباتیۆ بێدەنگا و هیچ هەنگامێوەش نەنییەنە، بەردەوام جە حکومەتیۆ مشنەومێ کە ماچۆنە؛ پەنەوازا پەکەکە کۆنگرەو ویش بەسۆنە و پەکەکە چەک بنیۆرە، خاسا پەکەکە چنین کۆنگرە بەسۆنە؟ پەی جابەجێ کەردەو کۆنگرەی حکومەت هیچ هەنگامێوەش نەنییەنە. ئاسایش و ئارامی کۆنگرەی، ڕێبازە یاساییەکا کۆنگرەی و چنین بەشداربییەو ئێژا ئۆجالانی و چنین قەراردای جە کۆنگرەەنە باسش سەر مەکریۆنە، بەس بەردەوام قسێ سەرو چەک نییارەی کریۆنە. با جۆرە چنین چەک بنییەیمێرە؟ کەواتە حکومەت جە مەسەلێ چەک نییارەی کات بەسەر بەرۆنە. دمای پی کات بەسەر بەردەی وهەڕەشەکەردا باردێنە و بەشێوێ جدی و ڕاستگۆیانە جواب و گلێرگەی دەیدێوە. پەنەوازی و داواکارییەکێ گلێرگەو دیموکراتیکی حەرچێوێ بۆنە، پەرلەمان سەرو ئا بابەتەیە ئامادەن گلێربۆوە. ئامادەن کۆمیسیۆن ئەرەمەزنۆرە و ئەرەنیشتەکا بەرۆ ڕاوە. شاندو پارتەکەیما چا بارۆ هەرمانەی فرێش ئەنجامدێنە و بەردەوامش بۆنە جە هەرمانەکاش."