کوردیناسیۆنوو کەژەکەی واتش، کە پێویسا چالاکییەکاو ٨وو مارسینە داواو ئازاڎیی جەستەیی ڕابەروو گەلوو کوردی عەبدوڵا ئۆجالانی بەرز کریۆوە و داواش وەنەو گردوو ژەنا کەرڎە، کە جیهانی بکەرا بە مەیڎانوو سەرەوردای و بنیاتنیایوە.
کوردیناسیۆنوو کەژەکەی ئەرەیاوناێوەنە ئاماژەش پانەیە کەرڎەن، کە ڕابەروو گەلوو کوردی عەبدوڵا ئۆجالان بە مانادارترین شێوە ڕاو ئازاڎی و ئاشتییش پەی ژەنا ڕۆشنە کەردۆ و ئەرەیاوناش: "پێویسا جە چالاکییەکاو ٨وو مارسینە داواو ئازاڎیی جەستەیی ڕابەر ئاپۆی کریۆ. سەدەو ویست و یەکینە کۆشیای پەی ئازاڎیی ژەنێ پەیوەندیی ڕاستەوخۆش بە پارادایموو ڕابەر ئاپۆی و خەتەو ئازاڎیی ژەناوە هەن."
ئەرەیاونایەکەو کوردیناسیۆنوو کەجەکەینە سەبارەت بە ڕۆو جیهانیی ژەنە کرێکارا ٨وو مارسینە، بە ناموونیشانوو "پەی ئا ژەنا کە ٨وو مارسینە بەرەو وەهاروو ژەنا ملا" پاسە باس کەرۆ:
"ئێمە سەیەو ئا بەرڎەوامی و کۆکوشییەینە دژوو ژەنا و بە کۆشیای ژەنا، کە پیسە وەری درەوشیۆوە دژوو ئی سێبەرێ، خێرامای وەنەو ٨ مارسێوە تازەی کەرمێ. دژوو عەقڵیەت و سیستموو پیاسالاری، کە هەوڵێ دلێنەبەرڎەی ژەنێ و گەلا مدۆ، ژەنی هومێد بەخشا ومزانیی وەهاروو هومێدی مدا و ژیوای ڕازناوە.
ئێمە نمەتاومێن کۆشیای ئازاڎی ژەنا تەنیا یەک ڕۆنە سنووردار کەرمێ. وەلێ جە ڕوێوە پێسە ٨وو مارسینە، کە سەدان ژەنێ سۆچیێنێ و کوشیێنێ، هەرمانەی حەرە گەورێ ئێمەی ژەنانە کە چی ڕووەنە و گرد ڕوێنە ل چی چوارچوەنە بەرڎەوامی بە کۆشیای بدەیمێ.
جەنگی یەرەموو جیهانی بە ئاشکرا دژوو ژەنا دەسش پەنە نەکرد، بەڵام بەشاریاوەیی بەرڎەوامییش هەن. حەرچندە ئی حەقیقەتە بە هەزاران دروێ و فێڵێ شاریۆوە، بەڵام بارودۆخوو ئیساتێ دۆخێوە قورسا پەی جەنگی.پەوکای کۆشیای ژەنا پەی وەرگێریکەرڎەین جە وێشا دژوو ئی جەنگی. ئەمریکا و وەڵاتاو ئەورووپای و فرەو وەڵاتای تەروو جیهانی ئیساتینە ڕاستەوخۆ دژوو هیچ دەوڵەتێوە نیەنێ جەنگنە، بەڵام وەختێ تەماشەو ژمارەو ژەنە کوشیا و ئەشکەنجەدریایا، کوشتەی و چەوسنایۆ کرێکاری کەرمێ، چەنی ژمارەو خەسارەکاو جەنگی بەراوردشا کەرمێ پێسە یۆی پاسنێنێ. مەکریۆ ئی ژمارا بە هیچ کەلیمێوە تەر پێناسە بکریۆ، جگە جە جەنگێوە قورسی و دەس نیشانکریای.
جگە ئانەیچە چی ساڵاو دماینە، بۆنەو زیادبییەی جەنگوو دەوڵەت-نەتەوەکا و جەنگوو دلێوە، ئی دۆخە ئینا ئاستێوە خۆفناکنە. جەنگەکاو کوردستانی، وەرنیشتی، فەلەستینی، ئۆکرانیای، سودانی، یەمەن، نیجیریا، ئەفغانستان، ئێران، ئازەربایجان، ئەرمەنێستانی و فرەو وەڵاتای تەری، کۆکوشیی ژەنا ئینا ئاستێوە بەرزتەرنە. بێگومان گردوو وەڵاتاو جیهانینە ژەنی ئاستە جیاجیاکانە دژوو ئی عەقڵییەت و پیلانا کۆشیا و گردوو ئی کۆشیایا فرە مانادارێ و گرنگێنێ.
بەڵام چەمکوو جەنگی یەرەموو جیهانی جە کرڎەوەنە پێسەو چەمکێوە دەسەڵاتداریی پیای گرد یاگێوەنە هەوڵێ چەوسنایۆ ژەنا مدریۆ. پەوکای ٨ مارس ڕوێوە فرە مانادار و گرنگا. وەراوەروو ڕاسیی جەنگوو ئیساتێنە کە جیهانش بەرەو وێرانکاری و تاڵانکەرڎەی بەرڎەن و ئێمە پێسە ژەنێ مەبۆ سنووروو دەوڵەت-نەتەوەکا بە وەربەسێوە بوینمێ، پێویسا سنوورەکا نەشناسمێ و پاڵپەشتێ یۆی بیمێ، بە دەنگی بەرز باسوو ئازارەکاما کەرمێ و دژوو جەنگوو دەوڵەتا، کە بە عەقڵییەتی پیاسالارییوە دەسش پەنە کەرڎەن، هێزوو کۆشیای و ڕێکوستەی بنیات بنیەیمێ و دژوو ئا سیستمە جیهانییە، کە دژوو ژەنێ و گەلا جەنگ کەرۆ مردمێوە و گلێرگەی بەرەو ئاشتی ڕێک وزمێ.
عەقڵیەتوو جەنگی یەرەموو جیهانی پەیوەندییش بە نەتەوەپەرەسی، ڕەگەزپەرەسی و ئایینیوە هەن و جەنگ دەس پەنە کەرۆ و چی چوارچوەنە کەرۆش. ئی عەقڵیەتە گردوو ئا یاگانە ڕووبەڕوو کاولکاریی کەرۆوە. پەوکای چی سەرڎەمەنە پێویسا کۆشیای و یاواینەی ژەنا پەی ئارڎەیدیی ئاشتیی سەروو بنەما و رێبازی دیموکراتیکی، پارادایموو ئیکۆلۆژی و ئازاڎیی ژەنا دژوو عەقڵیەتی نەتەوەپەرەسی، ڕەگەزپەرەسی و ئایینی پەرە بە کۆشیا بدریۆ. پێویسا دژوو نەتەوپەرەسی کۆشیای پەی نەتەوەی دیموکراتیکی، دژوو ئایینپەرەسی پەی ئایینی دیموکراتیکی و دژوو ڕەگەزپەرەسی پەی یەکسانیی ژیوای ئازاڎی کۆشیای فراوانتەر کەرمێ و ئاستوو خەباتیما چا چوارچوەنە وزمێ وەڵێ.
ڕابەر ئاپۆ ٢٥ ساڵێن ئیمرالیینە چێروو بارودۆخێوە فرە قورسینە گیریان، بە شێوێوە مانادار ڕاو ئازاڎی و ئاشتییش پەی ئێمەی ژەنا ڕۆشنە کەردێنۆ. پێویسا جە چوارچوەو چالاکییەکاو ئێساڵوو ٨ مارسینە بە داواو ئازاڎیی جەستەیی ڕابەر ئاپۆی خاوەنداریی وێما نیشانە بدەیمێ. جە سەدەو ویس و یەکینە کۆشیای پەی ئازاڎیی ژەنا ڕاستەوخۆ پەیوەندییش بە پارادایگماو ڕابەر ئاپۆی و خەتەو ئازاڎیی ژەناوە هەن.
ئەگەرچی ئێمە پاسە بەهێواشی چارەکی یەکەموو سەدەو ویس و یەکی جیا بازمێ، بەڵام کۆشیای ژەنا مشۆم بە ڕای ئایدۆلۆژی، سیاسەت، ڕێکوستەی، کۆشیای و وێپاریزنای یاواینەی ستراتیژی ئاشتی پەرە پەنە بدۆ. جە ٨ مارسینە ئێساڵ پێویسا گردوو ئا ژەنا چی بوارەنە کوشیایا یاد کەرمێوە، ئاستەنگوو سنوورەکا ویەرنمێ و بە یاواینەی نەتەوەی دیموکراتیکی و کۆنفیدڕاڵیزمی دیموکراتیک پێوە دەنگما بەرز کەرمێوە و پەشتیوانیی یۆی کەرمێ. پێویسا گرد یاگێوەنە دژوو ئا جەنگەیە، کە ژەنی و پێکئامایەکا دلێنە بەرۆ دەنگما بەرز کەرمێوە. هەرپاسە ئێمە دژوو هجوومەکاو بۆکوحەرامی نیجیریانە و تاڵیبان ئەفغانستاننە و وەلایەتوو فەقیهی ئێراننە و دژوو فاشیزموو ئاکەپەینێ تورکیانە پەی سەروو ژەنا. هەرپاسە دژوو دەسدرێژی، کوشتەی، ئەشکەنجەی و چەوسنایۆ هەرمانێ و جەستەی سەروو ژەنا جە سودان، یەمەن، ئۆکرانیا، ئەرمەنێستان، بەرازیل، ئەرژەنتین، مەکسیک، شیلیینە و گردوو وەڵاتاو جیهانینە. چی چوارچوەنە بە کۆشیای یۆبییەی ژەنا قەوەتتەر کەرمێ.
وەرنیشتنە دەوڵەتوو تورکی بە هەقسانایۊ جە شۊڕشوو ژەنا فرە بە وەرفراوانیی هجوومێ کەرۊ، ئا ژەنێچە شەنگال، مەخمور، باشوور، سەرنیشت و تەنانەت پاریسیچنە پەی ئازاڎیی کۊشیا بە ئامانجشا گێرۊ. عەفرین و سەرێکانی و بوارە شۊڕشگێڵنییەکانە ژەنی کە لاو کۊماری فاشیستوو تورکیایۊ گیریێنێ ڕوانە کوشاشا. سەرنیشتنە بە گرد نۊعە شێوازێوە جەنگی تایبەت و جەستەیی پەی گێرتەی و ناستەی دەسکەوتەکاو ژەنا کریۊ. زیندانەکێ پەڕێنێ جە ژەنە کۊشەرا. حەرپاسە قەبرسانەکێ پەڕێنێ چا ژەنا کە لاو پیایا پێسەو ئەردۊغانیوە کوشیێنێ. ٨ مارسوو ئێساڵینە ئەردۊغان و ئا پیاسالارییە دڕندەییە گلێرگەنە پەرەش پنە دان، گرد یاگێونە شەرمەزار کریا. پێویسا دەوڵەتوو ئێرانی کە ژەنی مدۊ قەنارە، ئەشکەنجەشا مدۊ، جەسەشا زیندانی کەرۊ و ڕژێموو تاڵیبانی ئەفغانستاننە و چەتەکاو بۊکۊحەرام هەرپاسە سیستموو سەرمایەداری، کە ڕا پەی گرد جۊرە جەنگ و چەوسایۊیێ وەش کەرا بە دادپەروەریی ژەنا شەرمەزارێ کریا.
بە دروشموو 'ژەنی، ژیوای، ئازاڎی'، مشۊم بە یاواینەی و دادپەروەریی ژەنا جە میراتی هەژموونگەرانەو پیاسالاری گرد یاگێنە پەرسیۊوە. بە ڕاپیمای بەرەو شۊڕشوو ژەنا بە دروشموو 'ژەنی، ژیوای، ئازاڎی'، مشۊم دژوو سیستەموو سەرمایەداری، کە ژیوای دلێنە بەرۊ پەرە بە کۊشیایما بدەیمێ و دژوو سیستموو پیاسالاری، کە تەنانەت خانەکاو جەسەیماش تەنێنێ سەرەوردای کریۊ. ئێمە گردوو جادە، شار، دەگا، کەش، هەرمانگە و گرد یاگێونە هەنمێ، سەرجەموو ئا یاگا هینێ بنیاتنیای سەرەوردایمانێ.
ژەنی بە سەرەوردایش، بەپیمانەکاو ڕەتکەردەیۊ، بە یاواینەی جە ژیوای ئازاڎی و بە بنیاتنیای ژیوای پێسە وەهاری زیندە و گەشی کەرۊوە. بە بۊنەو ٨ مارسیوە داوا وەنەو سەرجەموو ئا ژەنا کەرمێ، کە بە سەرەوردایشا ژیوایشا ئاوەدان کەردەنۊ، چی وەڵاتەنە ڕەفاقەتوو ژەنا قەوەتتەر کەرا و پەرە بە کۊشیای بدا، گردوو جیهانی کەرا بە مەیدانوو سەرەوردای و بنیاتنیایۊ.
